Sudeep Sharma : शाहरुख-अमिताभसोबत काम का करायचं नाही? 'पाताल लोक'च्या दिग्दर्शकाचं थेट उत्तर

सुदीप शर्मा यांनी स्पष्ट केलंय की, त्यांना शाहरुख खान आणि अमिताभ बच्चन यांच्यासारख्या सुपरस्टार्ससोबत काम करण्यात कोणताही रस नाही. आपलं लक्ष स्टारडमवर नाही, तर आपल्या पद्धतीच्या कथा आणि दमदार पात्रं तयार करण्यावर आहे, असं ते म्हणाले.

Sudeep Sharma on Working With Superstars: बॉलिवूडचे सुपरस्टार शाहरुख खान आणि अमिताभ बच्चन हे असे दोन दिग्गज कलाकार आहेत, जे पडद्यावर येताच प्रेक्षकांना खिळवून ठेवतात. त्यांचं स्टारडम इतकं मोठं आहे की, प्रत्येक लहान-मोठा फिल्ममेकर त्यांच्यासोबत काम करण्याचं स्वप्न पाहतो. अनेक लेखक आणि दिग्दर्शकांसाठी या महान कलाकारांसोबत काम करणं म्हणजे आयुष्यात एकदाच मिळणारी संधी असते. पण, 'पाताल लोक' आणि 'कोहरा' सारखे प्रचंड गाजलेले शो बनवणारे प्रसिद्ध क्रिएटर सुदीप शर्मा या मताशी सहमत नाहीत.

'डिजिटल कमेंट्री'ला दिलेल्या एका ताज्या मुलाखतीत, या लेखक-दिग्दर्शकाने सांगितलं की, त्यांना या दोन्ही आयकॉनिक कलाकारांसोबत काम करण्यात "अजिबात रस नाही".

जेव्हा सुदीप शर्मा यांना विचारण्यात आलं की, शाहरुख खान आणि अमिताभ बच्चन यांच्यासारख्या सुपरस्टार्ससोबत काम करण्याचं तुमचंही स्वप्न आहे का? तेव्हा ते म्हणाले, "नाही, माझी तशी कधीच इच्छा नव्हती. म्हणूनच मी त्या प्रकारचं काम करण्याचा कधी प्रयत्नही केला नाही. मी इथे कोणत्यातरी खास स्टारसोबत काम करायला आलेलो नाही; मी इथे माझी गोष्ट सांगायला आलोय, जशी मला सांगायची आहे तशी गोष्ट सांगायला आलोय, जे सिनेमे मी पाहिले आणि जे मला आवडले, तसे सिनेमे बनवायला आलोय. माझ्यासाठी हे कधीच आकर्षणाचं केंद्र नव्हतं. खरं तर, संधी मिळाली तरी मी नर्व्हस होईन, कारण ही खूप मोठी जबाबदारी आहे."

सुदीप यांनी पुढे स्पष्ट केलं, "बघा, एक स्टार स्वतःसोबत एक विशिष्ट इमेज घेऊन येतो आणि मग तुम्हाला त्या इमेजभोवती एक माध्यम तयार करावं लागतं. ते कसं करायचं हे मला माहीत नाही. मला एक पात्र (character) लिहायचं आहे आणि जो कोणी ते साकारायला येईल, त्याने त्यात पूर्णपणे झोकून दिलं पाहिजे. चाहते कशी प्रतिक्रिया देतील किंवा स्टारडमचा त्यावर काय परिणाम होईल, याचा विचार करण्याची जबाबदारी मला घ्यायची नाही. बऱ्याचदा सिनेमापेक्षा त्याच्या आजूबाजूच्या गोष्टींचीच जास्त चर्चा होते आणि मला त्यात अजिबात रस नाही."

सुदीप शर्माबद्दल काही खास गोष्टी

सुदीप यांनी अनुष्का शर्माच्या 'NH10' या सिनेमातून फीचर स्क्रीनरायटिंगमध्ये पदार्पण केलं. हा सिनेमा सत्य घटनांवर आधारित ऑनर किलिंगच्या प्रकरणांवरून प्रेरित होता. यानंतर त्यांनी 'उडता पंजाब' आणि 'सोनचिडिया' या सिनेमांसाठी पटकथा आणि संवाद लिहिले. या सिनेमांना समीक्षकांनी खूप वाखणलं, पण बॉक्स ऑफिसवर ते अयशस्वी ठरले.

सुदीप यांना खरी ओळख OTT प्लॅटफॉर्मवरच मिळाली. ते 'पाताल लोक' आणि 'कोहरा' यांसारख्या लोकप्रिय सिरीजचे क्रिएटर, शोरनर आणि लेखक आहेत. त्यांच्या अलीकडच्या कामात 'कोहरा' सीझन 2 चा समावेश आहे, ज्याचं त्यांनी सह-दिग्दर्शनही केलं होतं. या शोमध्ये बरुण सोबती आणि मोना सिंग मुख्य भूमिकेत आहेत, तर रणविजय सिंग आणि पूजा भामराह यांच्याही महत्त्वाच्या भूमिका आहेत. या शोला प्रेक्षक आणि समीक्षकांकडून खूप चांगला प्रतिसाद मिळाला. हा शो नेटफ्लिक्सवर ग्लोबल टॉप 10 नॉन-इंग्लिश शोच्या रँकिंगमध्येही सामील झाला होता, ज्याला पहिल्या आठवड्यात 16 लाख व्ह्यूज मिळाले होते. हा शो नेटफ्लिक्सवर पाहण्यासाठी उपलब्ध आहे.