हेरा फेरी 3 : अक्षय कुमारने परेश रावलला ठोठावली ₹25 कोटींची नुकसान भरपाईची नोटीस!

हेरा फेरी 3 चित्रपटातून अचानक बाहेर पडल्याने अभिनेता अक्षय कुमारने सहकलाकार परेश रावल यांच्यावर ₹25 कोटींच्या नुकसानभरपाईसाठी कायदेशीर नोटीस बजावली आहे. परेश रावल यांनी करार करूनही आणि चित्रीकरण सुरू झाल्यावर चित्रपटातून बाहेर पडण्याचा निर्णय घेतला.

मुंबई: हेरा फेरी 3 चित्रपटाच्या सेटवरुन एक मोठी आणि धक्कादायक बातमी समोर आली आहे. अभिनेता अक्षय कुमारने सहकलाकार परेश रावल यांना ₹25 कोटींच्या नुकसानभरपाईसाठी कायदेशीर नोटीस पाठवली आहे. आधी करार करून, चित्रीकरण सुरू झाल्यावरही अचानक चित्रपटातून बाहेर पडणे आणि निर्मात्यांच्या आर्थिक व व्यावसायिक हितांना फटका पोहोचवणे यामुळे ही नोटीस बजावण्यात आली आहे.

हेरा फेरी 3 या बहुप्रतीक्षित आणि सुपरहिट चित्रपटाच्या तिसऱ्या भागाचे शूटिंग एप्रिल महिन्यात दिग्दर्शक प्रियदर्शन यांच्या मार्गदर्शनाखाली सुरू झाले. अक्षय कुमार, परेश रावल आणि सुनील शेट्टी या तिघांनी चित्रपटात पुन्हा एकत्र येत फॅन्समध्ये प्रचंड उत्सुकता निर्माण केली आहे.

परेश रावलने अचानक घेतला एकतर्फी निर्णय

परेश रावल यांनी गेल्या आठवड्यात एका मुलाखतीत हेरा फेरी 3 मधून बाहेर पडण्याचा निर्णय घेतल्याचे जाहीर केले. त्यांच्या मते, “सध्या मन नाही” असा कारण दिले गेले, जे चाहत्यांना अजिबात पटले नाही. त्यांचा हा निर्णय सोशल मीडियावर प्रचंड चर्चेचा विषय ठरला असून अनेक फॅन्सनी नाराजी व्यक्त केली आहे.

कायदेशीर करार असूनही निर्णय मागे घेतल्याने वाद

अक्षय कुमारच्या प्रॉडक्शन हाऊस Cape of Good Films मार्फत पाठवण्यात आलेल्या नोटीसमध्ये नमूद आहे की परेश रावल यांनी आधी कायदेशीर करारावर सही केली, साईनिंग अमाऊंट घेतला आणि शूटिंगसुद्धा सुरू केलं होतं. अशा स्थितीत अचानक चित्रपटातून बाहेर पडणं हे व्यावसायिक प्रामाणिकपणाला आणि नैतिकतेला हरताळ फासणं आहे.

अक्षयचा पहिलाच कायदेशीर पाऊल

अक्षय कुमारसारख्या ३५ वर्षांच्या प्रदीर्घ कारकिर्दीत हे पहिल्यांदाच आहे की त्यांनी एखाद्या सहकलाकाराविरुद्ध अशा स्वरूपाचं कायदेशीर पाऊल उचललं आहे. सूत्रांच्या मते, परेश रावल यांना त्यांच्या नेहमीच्या मानधनाच्या तिप्पट रक्कम दिली जात होती, तरीही त्यांनी कोणतेही स्पष्टीकरण न देता चित्रपटातून अंग काढून घेतलं.

हेरा फेरी चाहत्यांची नाराजी वाढली

हेरा फेरी फ्रँचायझी ही सोशल मीडियावर मिम्सपासून ते डायलॉगपर्यंत अमर झालेली आहे. अशा चित्रपटातून प्रमुख पात्राने अचानक एकतर्फी पद्धतीने बाहेर पडल्याने प्रेक्षकांच्या भावना दुखावल्या आहेत. अनेकांनी सोशल मीडियावर याविरोधात तीव्र प्रतिक्रिया नोंदवल्या आहेत.

पूर्वीही घेतलेत अचानक निर्णय

ही काही पहिली वेळ नाही की परेश रावल यांनी असा निर्णय घेतला आहे. २०२३ मध्ये त्यांनी Oh My God 2 मधून बाहेर पडताना स्क्रिप्ट पसंत नसल्याचं कारण दिलं होतं. २००९ मध्ये ‘बिल्लू बार्बर’मधूनही त्यांनी अचानक अंग काढून घेतलं होतं – तो चित्रपटही प्रियदर्शन यांनीच दिग्दर्शित केला होता.

हेरा फेरीसारख्या आयकॉनिक फ्रँचायझीमध्ये एकतर्फी निर्णय घेऊन काम सोडणं हे केवळ व्यावसायिक नुकसानीचं नाही, तर लाखो चाहत्यांच्या भावना दुखावणं देखील आहे. आता या प्रकरणाचा पुढचा टप्पा न्यायालयातच ठरणार आहे, आणि संपूर्ण इंडस्ट्रीचं लक्ष या वादाकडे लागलेलं आहे.