धमेंद्र यांच्या निधनानंतर बॉबी देओलचं बदललं आयुष्य; ईशा-अहानाबद्दल काय म्हणाला?

वडील धर्मेंद्र यांच्या निधनानंतर बॉबी देओल पहिल्यांदाच मनापासून बोलला आहे. त्यांच्यासोबत आणखी वेळ घालवता आला असता तर बरं झालं असतं, याची खंत त्याला रोज वाटते. या मोठ्या नुकसानीमुळे कुटुंब आणखी जवळ आल्याचंही तो म्हणाला.

बॉबी देओलने वडिलांना गमावल्याचं दुःख व्यक्त केलं

बॉबी देओलने 'Esquire India' ला दिलेल्या मुलाखतीत सांगितलं, "असे अनेक दिवस येतात जेव्हा वाटतं की, काश! मी त्यांच्यासोबत अजून बसलो असतो, त्यांच्याशी आणखी गप्पा मारल्या असत्या. आता मी माझ्या कुटुंबासोबत वेळ घालवण्याला जास्त महत्त्व देतो. बॉक्स ऑफिस, रिव्ह्यू, भूमिका या गोष्टी शेवटी महत्त्वाच्या नसतात. खरं यश तर आपल्या माणसांसोबत वेळ घालवण्यात आहे."

‘त्यांचे रिल्स बघून वाटतं ते माझ्याशी बोलत आहेत’

धर्मेंद्र यांच्यासोबतच्या नात्याबद्दल बॉबी म्हणाला, "मी अनेकदा त्यांचे इन्स्टाग्राम रिल्स बघत असतो. ते इतके खरे आणि प्रेमळ होते की, कधीकधी असं वाटतं जणू ते थेट माझ्याशीच बोलत आहेत."

कुटुंबाबद्दल बदलला बॉबी देओलचा दृष्टिकोन

वडील धर्मेंद्र यांच्या निधनानंतर आपल्या आयुष्यातील प्राधान्यक्रम बदलल्याचं बॉबी देओलने मान्य केलं. तो म्हणाला की, आता तो आपली मुलं, पत्नी आणि कुटुंबासोबत जास्त वेळ घालवण्यावर लक्ष देत आहे. त्याच्या मुलांनाही आता आयुष्याच्या क्षणभंगुरतेची जाणीव झाली आहे.

सावत्र बहिणी ईशा-अहानासोबत बॉबी देओलचं नातं झालं घट्ट

बॉबी देओलच्या मते, वडिलांच्या निधनानंतर त्याचं आणि हेमा मालिनी यांच्या मुली ईशा देओल व अहाना देओल यांचं नातं अधिक घट्ट झालं आहे. आपल्या सावत्र बहिणींसोबतच्या नात्यावर तो म्हणाला, "आम्ही सर्वजण आपापल्या परीने या दुःखाचा सामना करत आहोत. कधीकधी दुःखात गैरसमज होतात. पण वेळेसोबत सगळं ठीक होतं. मोठं नुकसान कुटुंबाला एकत्र आणण्याचं काम करतं."

धर्मेंद्र यांचं निधन आणि त्यांचा शेवटचा चित्रपट

सनी देओल आणि बॉबी देओल यांचे वडील, सुपरस्टार धर्मेंद्र यांचं २४ नोव्हेंबर २०२५ रोजी मुंबईत वयाच्या ८९ व्या वर्षी निधन झालं. त्यांचा शेवटचा चित्रपट 'Ikkis' १ जानेवारी २०२६ रोजी प्रदर्शित झाला, ज्याला प्रेक्षक आणि समीक्षकांनी खूप पसंत केलं. धर्मेंद्र यांना यावर्षी मरणोत्तर पद्मविभूषण पुरस्काराने सन्मानित करण्यात आलं. BAFTA ने त्यांना 'इन मेमोरियम' मध्ये आदरांजली वाहिली. पण Academy Awards (ऑस्कर) मध्ये त्यांच्या नावाचा उल्लेख नसल्याने सोशल मीडियावर वाद निर्माण झाला होता. अर्थात, नंतर अवॉर्ड्सच्या अधिकृत वेबसाइटवर त्यांना स्थान देण्यात आलं.