Bigg Boss Marathi 6 : घराचा ताबा कुणाकडे? सोनालीचा अजब 'ॲटिट्यूड', तन्वी-दीपालीमध्ये जुंपली अन् लावणीवरून रंगला कलगीतुरा!

Bigg Boss Marathi 6 : बिग बॉस मराठीच्या घरात रेशन टास्कमधील पक्षपातीपणामुळे बिग बॉस संतापले, तर लावणीवरील दीपाली सय्यदच्या विधानामुळे राधा दुखावली गेली. दुसऱ्या दिवशी कामावरून सोनाली राऊतने नकार दिल्याने तन्वी आणि दीपाली यांच्यात मोठा वाद झाला. 

मुंबई : 'बिग बॉस मराठी'च्या सहाव्या सीझनमध्ये आता खऱ्या अर्थाने ठिणगी पडली आहे. रेशन टास्कपासून सुरू झालेला वाद थेट लावणी आणि कामाच्या ड्युटीपर्यंत पोहोचला असून, घरात गटबाजी स्पष्टपणे दिसू लागली आहे. आजच्या भागात सोनाली राऊतचा आडमुठेपणा आणि तन्वी-दीपालीमधील वाद चर्चेचा केंद्रबिंदू ठरले.

रेशनसाठी 'तुफान' टास्क आणि बिग बॉसची नाराजी

घरात रेशन मिळवण्यासाठी बिग बॉसने 'तुफान' टास्क दिला होता. यामध्ये 'शॉर्टकट की' मिळवलेले स्पर्धक संचालक होते, तर 'मेहनती' स्पर्धकांना उद्ध्वस्त झालेली बेडरुम आणि किचन पुन्हा नीट सेट करायचे होते.

राऊंड १: ओमकार, विशाल, अनुश्री आणि आयुष यांनी बेडरुम नीट केली. सोनालीने सुरुवातीला विरोध केला, पण स्वतःकडे लक्ष वेधून घेतल्यावर ती निर्णयाला तयार झाली.

राऊंड २: किचनच्या टास्कमध्ये घाणेरडी भांडी घासण्याचे आव्हान होते. दिव्या, रोशन, प्रभू आणि राधाने जिद्दीने प्रयत्न केले. मात्र, संचालकांनी पक्षपातीपणा करत त्यांना विनाकारण जिंकवले.

निकालाचा ट्विस्ट: संचालकांच्या या 'अनफेअर' वागण्यावर बिग बॉस चांगलेच संतापले. त्यांनी संचालकांची शाळा घेत तिसरा टास्क रद्द केला, पण सर्वांना पूर्ण रेशन देऊन आश्चर्याचा धक्का दिला.

लावणीवरून 'राधा' आक्रमक!

रात्रीच्या वेळी दीपाली सय्यद आणि प्राजक्ता गायकवाड यांनी लावणीच्या सध्याच्या स्वरूपावर भाष्य केले. "लावणीला 'चीप' करून टाकलंय, बार डान्सला लावणी म्हणू नका," असे विधान दीपालीने केले. हे ऐकून लावणी कलाकार राधा प्रचंड दुखावली गेली. तिने तन्वीजवळ आपले अश्रू अनावर करत दीपालीवर निशाणा साधला. "माझं काम घाणेरडं असतं तर मी इथं नसले असते, मी पण कोणाची तरी लायकी काढू शकते," अशा शब्दांत राधाने आपला संताप व्यक्त केला.

सोनालीचा रुद्रावतार; दीपालीला रडू कोसळले!

दुसऱ्या दिवशी घराच्या कामावरून मोठा राडा झाला. सोनाली राऊतने स्पष्टपणे 'मी काम करणार नाही' अशी भूमिका घेतली. तन्वीने तिला जाब विचारला असता दोघींमध्ये जोरदार भांडण झाले. विशेष म्हणजे, दीपाली सय्यदने सोनालीची पाठराखण केली, ज्यामुळे तन्वी आणि दीपाली यांच्यातही ठिणगी पडली. तन्वीच्या आक्रमक बोलण्यामुळे अखेर दीपालीला रडू कोसळले.

कॅप्टनपदाची ओढ

कॅप्टन नसतानाही राकेश सूचना देत असल्याने विशाल आणि त्याच्यात खटके उडाले. "तू अजून कॅप्टन झालेला नाहीस," असे म्हणत विशालने त्याला आरसा दाखवला. आता रेशन मिळाले असले तरी कामाच्या नियोजनावरून घरात दोन गट पडल्याचे स्पष्ट दिसत आहे.