पुण्यात गॅस कटरने एटीएम फोडण्याचा प्रयत्न, दोघांना अटक
सार
Pune Crime : पुण्यातील देहूरोड येथे एक एटीएम मशीन फोडण्याचा प्रयत्न पाच जणांकडून करण्यात आला. या चोरट्यांनी गॅस कटरच्या माध्यमातून चोरी करण्याचा प्रयत्न केला. सदर घटनेत दोघांना अटक करण्यात आले असून अन्य तीन जणांनी पळ काढला आहे.
Pune Crime : पुण्यातील देहूरोड परिसरात मंगळवारी पहाटे साडेचारच्या सुमारास घडलेल्या एटीएम फोडीच्या प्रयत्नाने परिसरात एकच खळबळ उडाली. पाच अज्ञात चोरट्यांनी गॅस कटरच्या सहाय्याने एटीएम मशीन फोडण्याचा प्रयत्न केला. मात्र स्थानिक नागरिकांच्या सतर्कतेमुळे हा प्रयत्न अयशस्वी ठरला. दोन चोरट्यांना पकडण्यात यश आले असून इतर तिघे कारमधून पसार झाले.
चोरीचा प्रयत्न स्थानिकांच्या सतर्कतेमुळे फसला
मिळालेल्या माहितीनुसार, मंगळवारी पहाटे साडेचारच्या सुमारास पाच संशयित चोरट्यांनी देहूरोडमधील एका एटीएम सेंटरमध्ये घुसून गॅस कटरच्या सहाय्याने मशीन फोडण्याचा प्रयत्न सुरू केला. मात्र ते करत असतानाच काही नागरिकांना संशयास्पद हालचाली जाणवून त्यांनी तत्काळ पोलिसांना कळवले.
स्थानिकांनी दाखवले धाडस, दोन चोरट्यांना पकडले
पोलिसांना माहिती देत असतानाच चोरांनी पळ काढण्याचा प्रयत्न केला. तेव्हा नागरिकांनी धाडस दाखवून दोन चोरांना पकडले आणि पोलिसांच्या ताब्यात दिले. उर्वरित तिघे चोरटे जवळच थांबलेल्या चारचाकी वाहनातून पळून गेले. पकडलेल्या दोघांकडून गॅस कटरसह काही साधने जप्त करण्यात आली असून त्यांची ओळख अद्याप जाहीर करण्यात आलेली नाही.
पोलिसांचा तपास सुरू, नागरिकांत भीतीचे वातावरण
पोलिसांनी घटनास्थळी पोहोचून तपास सुरू केला असून पसार झालेल्या तिघा चोरट्यांचा शोध घेण्यासाठी परिसरातील सीसीटीव्ही फुटेज तपासले जात आहे. देहूरोड परिसरात गेल्या काही महिन्यांपासून चोरीच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले आहे. पोलिसांनी गस्त वाढवण्याचे आश्वासन दिले असून लवकरात लवकर उर्वरित आरोपींना पकडण्याचे प्रयत्न सुरू आहेत.
नागपुरात व्हीसीएच्या चिफ क्युरेटरकडे नऊ लाखांची चोरी
दरम्यान, नागपूरमध्येही मोठी चोरीची घटना समोर आली आहे. विदर्भ क्रिकेट असोसिएशनचे चिफ क्युरेटर प्रवीण भास्करराव हिंगणीकर (वय ५८) यांच्या घरी अज्ञात चोरट्यांनी घरफोडी करून नऊ लाख रुपयांचा ऐवज लंपास केला आहे. ही घटना नागपूरमधील विवेकानंदनगर भागात घडली असून धंतोली पोलिस ठाण्याच्या हद्दीत ही तक्रार दाखल करण्यात आली आहे. या घटनेमुळे पोलिस दलात खळबळ उडाली असून तपास सुरू आहे. या दोन्ही घटना पाहता, नागरिकांनी अधिक सतर्क राहण्याची गरज असून पोलिस यंत्रणेसमोरही सुरक्षेचा मोठा प्रश्न उभा राहिला आहे.