सात वर्षांचे प्रेमसंबंध संपले थरारात, कोल्हापुरातील लॉजमध्ये प्रेयसीचा हातोडीने खून; आरोपी प्रियकर अटकेत

Crime News : कोल्हापूरमध्ये एका प्रियकराने प्रेयसीची हत्या केल्याची धक्कादायक घटना घडली आहे. या प्रकरणातील आरोपीला पोलिसांनी बेड्या ठोकल्या आहेत.

Crime News : कोल्हापूर जिल्ह्यातील हातकणंगले तालुक्यातील अतिग्रे गावात गुरुवारी रात्री एक धक्कादायक हत्याकांड उघडकीस आले. एका लॉजमध्ये सुमन सुरेश सरगर (वय 35, रा. उचगाव) यांचा त्यांच्याच प्रियकराने हातोडीने वार करून खून केला.आरोपी आदम गौस पठाण (वय 45, रा. घुणकी) याला पोलिसांनी ताब्यात घेतले असून तो यापूर्वीही पत्नीच्या खूनप्रकरणात आरोपी आहे.

प्रेम, आर्थिक व्यवहार आणि वारंवार पैशांची मागणी

पोलिसांच्या प्राथमिक तपासानुसार, सुमन आणि आदम यांचे सात वर्षांपासून प्रेमसंबंध होते.त्यांच्यात आर्थिक व्यवहारही होते. सुमनने वारंवार आदमकडे सात लाख रुपयांची मागणी केली होती.ही मागणी न भागवता आल्यामुळे आदम वैतागला होता. त्यामुळेच कटकटीला कंटाळून त्याने सुमनला संपवण्याचा निर्णय घेतला.

लॉजमध्ये नेऊन केला खून, दिवसभर मृतदेहासोबत बसून राहिला

गुरुवारी दुपारी १२ च्या सुमारास आदमने सुमनला अतिग्रे येथील लॉजवर नेले. तिथेच त्याने हातोडीने डोक्यात वार करून तिचा खून केला.सायंकाळपर्यंत दोघेही बाहेर न आल्याने लॉजच्या मालकाला संशय आला. दरवाजा तोडला असता, **सुमन रक्ताच्या थारोळ्यात पडलेली होती आणि आदम दिवसभर तिथेच बसलेला होता.

पळण्याचा प्रयत्न फसला

दरवाजा उघडताच आदमने पळण्याचा प्रयत्न केला. मात्र, लॉज मालक आणि कर्मचाऱ्यांनी त्याला पकडून एका खोलीत बंद केलं.त्यांनी तात्काळ पोलिसांना माहिती दिली. पोलिसांनी घटनास्थळी येऊन आदमला अटक केली.आरोपी आदम पठाण गुन्हेगारी प्रवृत्तीचा असून त्याच्यावर यापूर्वीही स्वतःच्या पत्नीच्या खूनाचा आरोप आहे.या संदर्भात त्याच्यावर सध्या न्यायालयीन खटला सुरू आहे, अशी माहिती पोलिसांनी दिली.

 घटनेमुळे परिसरात खळबळ

या संतापजनक घटनेमुळे अतिग्रे आणि आसपासच्या परिसरात खळबळ उडाली आहे. पोलिसांकडून या प्रकरणाचा सखोल तपास सुरू आहे.ही घटना फक्त प्रेमभंग नाही, तर गुन्हेगारी वृत्तीच्या माणसाकडून घडलेली अतिशय गंभीर आणि नियोजित हिंसा आहे, असे स्पष्ट होत आहे.