Nepal Floods : अमेरिकेत नेपाळ पूरग्रस्तांसाठी प्रार्थना; 'आम्ही चमत्काराची वाट पाहतोय' - खासदार

अमेरिकेतील व्हर्जिनियामध्ये नेपाळ पूरग्रस्तांसाठी एका प्रार्थना सभेचं आयोजन करण्यात आलं होतं. यात अमेरिकन खासदार सुहास सुब्रमण्यम सहभागी झाले होते. बेपत्ता लोकांबद्दल अजूनही कोणतीच माहिती नसल्याने कुटुंबिय चिंतेत असल्याचं त्यांनी सांगितलं. तसंच, बचावकार्यासाठी चांगल्या उपकरणांची मागणी केली आहे.

मुंबई : नेपाळमधील महापुरामुळे प्रभावित झालेल्या कुटुंबांना त्यांच्या बेपत्ता नातेवाईकांबाबत अजूनही कोणतीच माहिती मिळालेली नाही, असं अमेरिकन खासदार सुहास सुब्रमण्यम गुरुवारी (स्थानिक वेळेनुसार) म्हणाले. व्हर्जिनियाच्या साऊथ रायडिंगमध्ये पूरग्रस्तांच्या नातेवाईक आणि स्थानिक नागरिकांसोबत आयोजित केलेल्या एका कॅण्डल लाईट व्हिजिलमध्ये (प्रार्थना सभा) ते सहभागी झाले होते. यावेळी माध्यमांशी बोलताना सुब्रमण्यम यांनी सांगितलं की, नेमके किती लोक बेपत्ता आहेत आणि ते कुठे आहेत, याबाबत अजूनही अनिश्चितता आहे.

सुब्रमण्यम म्हणाले, “आम्हाला नक्की काय झालंय, किती लोक बेपत्ता आहेत आणि या क्षणी कोण सापडू शकतं, याची अजूनही स्पष्ट कल्पना नाही. आतापर्यंत बराच वेळ निघून गेला आहे, त्यामुळे आम्ही आता चमत्काराची किंवा किमान या कुटुंबांना काहीतरी निश्चित माहिती मिळण्याची प्रार्थना करत आहोत. पण मला माहित आहे की इथला समाज एकत्र येऊन पीडित कुटुंबियांच्या आणि बेपत्ता लोकांच्या पाठीशी उभा राहू इच्छितो.”

बचावकार्यातील आव्हानं आणि चांगल्या उपकरणांची मागणी

बेपत्ता लोकांचा शोध घेण्याच्या प्रयत्नांबद्दल बोलताना सुब्रमण्यम म्हणाले की, नेपाळमध्ये नोंदी ठेवण्यात येणाऱ्या अडचणी आणि बचावकार्याचं मोठं स्वरूप यामुळे परिस्थिती आव्हानात्मक बनली आहे. “आपण नेपाळबद्दल बोलत आहोत, जिथे रेकॉर्ड-कीपिंग नेहमीच व्यवस्थित असेल असं नाही. त्यातच इतक्या मोठ्या बचावकार्यामुळे तिथल्या यंत्रणेवर प्रचंड ताण आहे,” असं ते म्हणाले.

त्यांनी असंही सांगितलं की, बचावकार्यात गुंतलेल्या टीमला अद्ययावत उपकरणं मिळावीत, यासाठी स्थानिक नेते त्यांच्यासोबत मिळून अमेरिकेच्या परराष्ट्र विभाग (US State Department) आणि संरक्षण विभागाकडे (Department of Defense) मागणी करत आहेत. “आता त्यांना उपकरणं मिळाली आहेत, त्यामुळे ही शोधमोहीम अधिक प्रभावीपणे व्हावी अशी आमची इच्छा आहे. जेणेकरून पीडित कुटुंबांना त्यांच्या प्रियजनांबद्दल निश्चित माहिती तरी मिळू शकेल,” असं सुब्रमण्यम यांनी नमूद केलं.

सुब्रमण्यम यांनी आपत्तीचा अंदाज आणि प्रतिबंध कार्यक्रमांमध्ये अधिक गुंतवणुकीची गरज असल्याचंही सांगितलं. त्यांच्या मते, पूर्वसूचना प्रणालीमुळे भविष्यातील नैसर्गिक आपत्तींचा प्रभाव कमी करण्यास मदत होऊ शकते. “या प्रदेशात नैसर्गिक आपत्तींचा अंदाज घेण्यासाठी आणि प्रतिबंध करण्यासाठी असलेल्या USAID निधीत आपण कपात केली होती. मला वाटतं, त्याचे परिणाम आता आपल्याला भोगावे लागत आहेत,” असं ते म्हणाले.

व्हर्जिनियातील बाधित नागरिकांबद्दल माहिती देताना ते म्हणाले की, त्यांचं कार्यालय पाच कुटुंबांसोबत काम करत आहे आणि अंदाजे ११ व्हर्जिनियन नागरिक बाधित झाले आहेत. तर सुमारे ७० अमेरिकन नागरिक अजूनही बेपत्ता आहेत. “आमच्या कार्यालयात पाच कुटुंबं मदतीसाठी आली आहेत. आम्ही सध्या त्यांच्यासोबत काम करत आहोत. अंदाजे ११ व्हर्जिनियन आणि एकूण ७० अमेरिकन नागरिक अजूनही बेपत्ता आहेत,” असं त्यांनी सांगितलं.

व्हर्जिनियामधील समाज एकजुटीने उभा

यावेळी लाउडन काउंटीचे शेरीफ (वरिष्ठ पोलीस अधिकारी) माईक चॅपमन यांनीही उपस्थितांना संबोधित केलं. ते म्हणाले की, या दुर्घटनेचा परिणाम नॉर्दर्न व्हर्जिनियामधील संपूर्ण समाजावर झाला आहे. “यावरून दिसतं की आपला समाज किती एकसंध आहे. या गोष्टी आपल्यासाठी किती महत्त्वाच्या आहेत आणि या दुर्घटनेची दखल घेणं आपल्यासाठी किती गरजेचं आहे,” असं चॅपमन म्हणाले. “याचा आपल्या सर्वांवर परिणाम झाला आहे. आपण सर्वांनी मिळून प्रार्थना केली पाहिजे, विश्वास ठेवला पाहिजे आणि जे लोक संघर्ष करत आहेत, त्यांना शक्य ती सर्व मदत केली पाहिजे.”

चॅपमन यांनी आश्वासन दिलं की, लाउडन काउंटी शेरीफ कार्यालय या आपत्तीमुळे प्रभावित झालेल्या समाजातील सदस्यांना सर्वतोपरी मदत करत राहील. “तुमचं लाउडन काउंटी शेरीफ कार्यालय तुम्हाला कोणत्याही प्रकारे मदत करण्यासाठी इथेच आहे. आमच्याकडे एक चांगली टीम आहे, ज्यांना समाजाची खरोखरच काळजी आहे,” असं ते म्हणाले.

शेरीफ यांनी उपस्थितांना आवाहन केलं की, त्यांनी पीडित आणि बेपत्ता नातेवाईकांच्या माहितीची वाट पाहणाऱ्या कुटुंबांसाठी प्रार्थना करत राहावी. “आपण आशा करूया की जसजसा वेळ जाईल, तसतशी आपल्याला अधिक माहिती मिळेल आणि या भयंकर दुर्घटनेतून सावरण्याची ताकद सर्वांना मिळेल,” असं चॅपमन म्हणाले.

१,३०० हून अधिक मृत्यू, ५,००० अजूनही बेपत्ता

नेपाळमधील रसुवा भागात गेल्या महिन्यात आलेल्या विनाशकारी पुरामुळे मृतांचा आकडा १,३७७ वर पोहोचला आहे. नेपाळच्या राष्ट्रीय आपत्ती जोखीम निवारण आणि व्यवस्थापन प्राधिकरणाने (NDRRMA) गुरुवारी सकाळी ही ताजी आकडेवारी जाहीर केली. या पुराचा सर्वाधिक फटका चितवन जिल्ह्याला बसला असून तिथे ३६४ मृत्यूंची नोंद झाली आहे. त्याखालोखाल नवलपरासी पूर्व (२२८), नवलपरासी पश्चिम (२२२), नुवाकोट (१९८), रसुवा (१७८), गोरखा (७०), धाडिंग (७०) आणि तनहुन (३८) या जिल्ह्यांचा समावेश आहे. तर दोन जखमींचा काठमांडूमध्ये उपचारादरम्यान मृत्यू झाला.

NDRRMA नुसार, आपत्कालीन शोध आणि बचाव पथकांनी आतापर्यंत १३,६५६ लोकांना सुरक्षित बाहेर काढलं आहे. मात्र, अजूनही ५,१३० लोक बेपत्ता असल्याने चिंता कायम आहे. यामध्ये स्थानिक रहिवासी, सरकारी कर्मचारी, वित्तीय संस्थांचे कर्मचारी, परदेशी नागरिक आणि सुरक्षा कर्मचाऱ्यांचा समावेश आहे. १०४ मृतदेहांची ओळख पटल्यानंतर बेपत्ता लोकांची यादी कमी करण्यात आल्याचंही अधिकाऱ्यांनी स्पष्ट केलं.