Iran War: इराणची ताकद संपतेय? क्षेपणास्त्र हल्ल्यांमध्ये ८६% घट, अमेरिकेचा दावा

US Strikes Cripple Iranian Offense as Missile Launches Plummet by 86 Percent: अमेरिका आणि इस्रायलच्या हल्ल्यांमुळे इराणची आक्रमकता कमी झाली आहे. इराणच्या बॅलेस्टिक क्षेपणास्त्र हल्ल्यांत ८६% आणि ड्रोन हल्ल्यांत ७३% घट झाली आहे.

अमेरिका आणि इस्रायलसोबत सुरू असलेल्या युद्धाच्या पाचव्या दिवशी इराणच्या क्षेपणास्त्र हल्ल्यांची तीव्रता लक्षणीयरीत्या कमी झाल्याचं दिसतंय. अमेरिकेच्या वरिष्ठ लष्करी अधिकाऱ्यांच्या मते, इराणच्या मिसाइल सिस्टीम आणि लाँच इन्फ्रास्ट्रक्चरवर सातत्याने होत असलेल्या हल्ल्यांमुळे ही घट झाली आहे.

बुधवारी पेंटागॉनमध्ये बोलताना, अमेरिकेच्या एका वरिष्ठ लष्करी अधिकाऱ्याने सांगितलं की, संघर्ष सुरू झाल्यापासून इराणची बॅलेस्टिक क्षेपणास्त्रं आणि ड्रोन डागण्याची क्षमता खूपच कमकुवत झाली आहे.

बॅलेस्टिक क्षेपणास्त्र हल्ल्यांमध्ये मोठी घट

डॅन केन यांच्या माहितीनुसार, युद्धाच्या सुरुवातीच्या तुलनेत इराणकडून डागण्यात येणाऱ्या क्षेपणास्त्रांची संख्या खूपच कमी झाली आहे.

"युद्धाच्या पहिल्या दिवसाच्या तुलनेत इराणच्या बॅलेस्टिक क्षेपणास्त्र हल्ल्यांमध्ये ८६ टक्क्यांची घट झाली आहे, तर फक्त गेल्या २४ तासांत यात २३ टक्के घट नोंदवण्यात आली आहे," असं केन यांनी पेंटागॉनमधील पत्रकार परिषदेत सांगितलं.

अमेरिकेने इस्रायलसोबत मिळून शनिवारी इराणविरोधात मोठी लष्करी कारवाई सुरू केली होती. यात इराणच्या महत्त्वाच्या लष्करी ठिकाणांना लक्ष्य करण्यात आलं. याला प्रत्युत्तर म्हणून, इराणने अमेरिकेचे तळ असलेल्या देशांवर क्षेपणास्त्रं आणि ड्रोनने जोरदार हल्ले केले होते.

ड्रोन हल्लेही कमी झाले

अमेरिकेच्या अधिकाऱ्यांच्या मते, ही घट फक्त क्षेपणास्त्रांपुरती मर्यादित नाही. गेल्या काही दिवसांत इराणच्या ड्रोन हल्ल्यांमध्येही मोठी घट झाली आहे.

"युद्धाच्या सुरुवातीच्या दिवसांच्या तुलनेत त्यांचे वन-वे अटॅक ड्रोन हल्ले ७३ टक्क्यांनी कमी झाले आहेत," असं केन म्हणाले.

लष्करी विश्लेषकांच्या मते, ड्रोन हल्ले हे इराणच्या रणनीतीचा एक महत्त्वाचा भाग आहेत. अनेकदा मोठ्या संख्येने ड्रोन हल्ले करून एअर डिफेन्स सिस्टीमला गोंधळात टाकण्याचा त्यांचा प्रयत्न असतो.

अमेरिकेचा निशाणा इराणच्या मिसाइल सिस्टीमवर

पेंटागॉनचं म्हणणं आहे की, इराणची हल्ले करण्याची क्षमताच संपवून टाकण्याच्या उद्देशाने हे हल्ले केले जात आहेत आणि त्यामुळेच इराणच्या हल्ल्यांमध्ये घट दिसत आहे.

केन यांनी स्पष्ट केलं की, "या भागातील अमेरिकन सैन्य, आमचे भागीदार आणि आमच्या हितांना धोका पोहोचू नये, यासाठी अमेरिकन सैन्य इराणच्या बॅलेस्टिक मिसाइल सिस्टीमला लक्ष्य करून नष्ट करत आहे."

अधिकाऱ्यांच्या मते, ही लाँच सिस्टीम उद्ध्वस्त केल्याने संघर्षादरम्यान इराणची प्रत्युत्तर देण्याची क्षमता मर्यादित होईल.

आतापर्यंत वापरलेल्या शस्त्रास्त्रांची मोठी संख्या

सध्या हल्ल्यांमध्ये घट झाली असली तरी, युद्ध सुरू झाल्यापासून इराणने केलेल्या हल्ल्यांची संख्या खूप मोठी आहे.

केन यांनी सांगितलं की, तेहरानने आतापर्यंत ५०० हून अधिक बॅलेस्टिक क्षेपणास्त्रं आणि २,००० हून अधिक ड्रोन डागले आहेत. या भागातील एअर डिफेन्स सिस्टीमसाठी हे एक मोठं आव्हान होतं, असंही ते म्हणाले.

या आकडेवारीवरून युद्धाच्या सुरुवातीच्या दिवसांतील तीव्रता आणि अमेरिका व मित्र देशांच्या इंटरसेप्शन सिस्टीमवर आलेला ताण दिसून येतो.

शस्त्रसाठ्याबद्दलची चिंता

इराणच्या या मोठ्या हल्ल्यांमुळे तज्ज्ञांनी चिंता व्यक्त केली होती की, अमेरिका आणि मित्र देशांकडे दीर्घकाळ चालणाऱ्या युद्धासाठी पुरेशी एअर डिफेन्स शस्त्रसामग्री आहे की नाही.

मात्र, अमेरिकेच्या अधिकाऱ्यांनी स्पष्ट केलं की त्यांच्याकडील शस्त्रसाठा पुरेसा आहे.

"आमच्याकडे हल्ला करण्यासाठी आणि बचाव करण्यासाठी, दोन्ही कामांसाठी पुरेशी शस्त्रसामग्री आहे," असं केन म्हणाले.

अमेरिकेचे संरक्षण सचिव पीट हेगसेथ यांनीही याला दुजोरा दिला. ते म्हणाले की दोन्ही बाजूंच्या क्षमतेतील फरक वाढत चालला आहे.

ते म्हणाले, “त्यांची हल्ला करण्याची क्षमता आणि आमची बचाव करण्याची क्षमता, यातील दरी दिवसेंदिवस वाढत आहे.”