SpaceX Record: फक्त ३८.५ मिनिटांत दोन रॉकेट लाँच करून स्पेसएक्सने रचला इतिहास!

स्पेसएक्सने एक नवा विक्रम केला आहे. त्यांनी फ्लोरिडा आणि कॅलिफोर्नियामधून फक्त ३८.५ मिनिटांच्या अंतराने दोन फाल्कन ९ रॉकेट लाँच केले. या मोहिमांमध्ये ग्लोबलस्टारचे सॅटेलाइट्स आणि यूएस स्पेस फोर्ससाठी एक गुप्त पेलोड पाठवण्यात आला. दोन्ही बूस्टर यशस्वीरित्या लँड झाले.

अमेरिकेची स्पेस कंपनी स्पेसएक्सने (SpaceX) एक जबरदस्त कामगिरी केली आहे. त्यांनी अमेरिकेच्या दोन वेगवेगळ्या किनाऱ्यांवरून फक्त ३८.५ मिनिटांच्या अंतराने दोन फाल्कन ९ (Falcon 9) रॉकेट यशस्वीरित्या लाँच केले. यासोबतच कंपनीने सर्वात कमी वेळेत दोन ऑर्बिटल मिशन लाँच करण्याचा स्वतःचाच विक्रम मोडला आहे. शनिवारी रात्री (स्थानिक वेळेनुसार) झालेल्या या दुहेरी लाँचमुळे स्पेसएक्सने ऑगस्ट २०२४ मध्ये केलेला ६५ मिनिटांचा विक्रम मागे टाकला आहे.

दोन मोहिमा, दोन किनारे

यातील पहिली मोहीम फ्लोरिडाच्या केप कॅनव्हरल स्पेस फोर्स स्टेशनवरून रात्री ९ वाजून १२ मिनिटांनी पार पडली. या रॉकेटने सॅटेलाइट कम्युनिकेशन कंपनी ग्लोबलस्टारचे (Globalstar) आठ लो अर्थ ऑर्बिट (LEO) सॅटेलाइट्स अवकाशात नेले. लाँच झाल्यानंतर सुमारे ५६ मिनिटांनी हे सॅटेलाइट्स यशस्वीरित्या तैनात करण्यात आले. यानंतर अवघ्या ३८.५ मिनिटांनी, म्हणजेच रात्री ९ वाजून ५० मिनिटांनी, कॅलिफोर्नियातील व्हँडेनबर्ग स्पेस फोर्स बेसवरून दुसरं फाल्कन ९ रॉकेट लाँच झालं. यामधून यूएस स्पेस फोर्ससाठी (US Space Force) USSF-366 नावाचा एक गुप्त पेलोड पाठवण्यात आला.

बूस्टरची यशस्वी घरवापसी

या दोन्ही मोहिमांचं वैशिष्ट्य म्हणजे फाल्कन ९ रॉकेटच्या फर्स्ट-स्टेज बूस्टरचं यशस्वी लँडिंग. ग्लोबलस्टार मोहिमेतील बूस्टर (B1090) ने आपलं १४ वं मिशन पूर्ण केलं आणि लाँचच्या आठ मिनिटांनंतर केप कॅनव्हरलच्या लँडिंग झोन ४० वर यशस्वीरित्या उतरलं. तर, USSF-366 मोहिमेतील बूस्टर (B1088) ने आपलं १८ वं उड्डाण पूर्ण केलं आणि पॅसिफिक महासागरातील 'ऑफ कोर्स आय स्टिल लव्ह यू' नावाच्या ड्रोनशिपवर लँड झालं. हे स्पेसएक्सच्या इतिहासातील ६५० वं यशस्वी बूस्टर लँडिंग ठरलं.

ग्लोबलस्टार मोहिमेचं महत्त्व

ग्लोबलस्टारची ही मोहीम आधी मे महिन्यात होणार होती, पण सॅटेलाइटच्या तयारीसाठी ती पुढे ढकलण्यात आली होती. डायरेक्ट-टू-डिव्हाइस कम्युनिकेशन सेवांसाठी नेटवर्क अखंडित ठेवण्यासाठी हे लाँच अत्यंत महत्त्वाचं आहे. ग्लोबलस्टारचे सीईओ पॉल ई. जेकब्स (Paul E Jacobs) यांनी या यशस्वी मोहिमेचं कौतुक केलं. विशेष म्हणजे, ग्लोबलस्टार लवकरच ॲमेझॉनसोबत (Amazon) सॅटेलाइट ब्रॉडबँड उपक्रमांसाठी एक करार करण्याच्या तयारीत आहे.

विक्रमी लाँचचा धडाका

शनिवारच्या या दुहेरी लाँचमुळे स्पेसएक्सने २०२६ या वर्षातील एकूण ९६ ऑर्बिटल फ्लाइट्सचा टप्पा गाठला आहे. या कामगिरीमुळे जागतिक व्यावसायिक लाँच मार्केटमध्ये कंपनीचं वर्चस्व आणखी मजबूत झालं आहे.