रशियाच्या आकाशात एकाच वेळी दिसले 4 देखणे चंद्र, कसे काय घडले हे आश्चर्य?

Rare Phenomenon Four Moons Appear in Russian Sky : चंद्र दिसणाऱ्या आणि न दिसणाऱ्या रात्री सामान्य असतात. पण रशियामध्ये एकाच वेळी ४ चंद्र दिसल्याने स्थानिक लोक आश्चर्यचकित झाले आहेत. आकाशातील हे नवीन आश्चर्य पाहून सर्वांनाच नवल वाटले आहे. सेंट पीटर्सबर्गमध्ये दिसलेल्या या दुर्मिळ घटनेचा व्हिडिओ खूप व्हायरल होत आहे.

यामागे आहे ‘पॅरासेलीन’ नावाची नैसर्गिक प्रक्रिया

यामागील कारण शोधल्यावर ‘पॅरासेलीन’ नावाच्या नैसर्गिक प्रक्रियेमुळे हे घडल्याचे समोर आले आहे. म्हणजेच, येथे एकच चंद्र चार चंद्रांसारखा दिसतो. यासाठी वातावरण मदत करते.

एक चंद्र चार कसा दिसतो?

पॅरासेलीन ही सामान्यतः हिवाळ्यात घडणारी प्रक्रिया आहे. रशियामध्ये सध्या कडाक्याची थंडी असून वातावरणातील हवेतील पाण्याचे कण गोठून बर्फ बनतात. हे कण अतिशय पातळ थरात असल्यामुळे उघड्या डोळ्यांना बर्फाच्या रूपात सहज दिसत नाहीत. अशा वातावरणातून चंद्राची किरणे पृथ्वीच्या दिशेने येतात.

यावेळी, वातावरणातील बर्फाचे षटकोनी आकाराचे कण, त्यांच्यामधून जाणाऱ्या प्रकाश किरणांना आपल्या कोनांनुसार वाकवतात. यामुळे चंद्राजवळ, त्याच उंचीवर चंद्रासारखाच चमकणारा एक बिंदूसारखा आकार तयार होतो. परिणामी, जगातील काही भागांमध्ये मूळ चंद्रासोबत आणखी चंद्र दिसतात.

अशा दुर्मिळ प्रक्रियेदरम्यान सहसा २ चंद्र दिसतात. कधीकधी एकापेक्षा जास्त चंद्र देखील तयार होतात. रशियामध्ये आता अशीच घटना घडली आहे.

काही दिवसांपूर्वी याच कारणामुळे रशियन लोकांना सकाळी २ सूर्य दिसले होते.