चीनमध्ये एकाच कुटुंबातील तब्बल 11 जणांना फाशी, या प्रकरणी न्यायालयाने ठरवले होते दोषी!

China Executes 11 Members of Myanmar Crime Family : म्यानमारमध्ये मोठ्या प्रमाणात भ्रष्टाचार आणि जुगार अड्डे चालवणाऱ्या मिंग कुटुंबातील ११ सदस्यांना चीनने फाशीची शिक्षा दिली आहे. 

China Executes 11 Members of Myanmar Crime Family : चीनमध्ये एकाच कुटुंबातील ११ जणांना फाशीची शिक्षा देण्यात आली आहे. म्यानमारमध्ये मोठ्या प्रमाणात भ्रष्टाचार आणि जुगाराचे अड्डे चालवणाऱ्या मिंग कुटुंबातील ११ सदस्यांना चीनने फाशी दिली. हत्या, बेकायदेशीर तुरुंगवास, फसवणूक आणि जुगार अड्डे चालवणे अशा अनेक गुन्ह्यांसाठी झेजियांग प्रांतातील न्यायालयाने सप्टेंबरमध्ये या कुटुंबातील सदस्यांना दोषी ठरवले होते, असे बीबीसीने म्हटले आहे.

चीनच्या सीमेजवळील म्यानमारमधील लौक्काइंग शहरात मिंग कुटुंबाचा मोठा दबदबा होता. त्यांच्या नेतृत्वाखाली कॅसिनो, फसवणूक केंद्रे आणि रेड-लाइट एरिया चालवले जात होते. २०१५ ते २०२३ दरम्यान, या कुटुंबाने गुन्हेगारी कारवायांतून १० अब्ज युआनपेक्षा जास्त (१.४ अब्ज डॉलर्स) कमाई केली. त्यांच्यामुळे १४ चिनी नागरिकांचा मृत्यू झाला आणि इतर अनेक जण जखमी झाले.

२०२३ मध्ये म्यानमारच्या अधिकाऱ्यांनी मिंग कुटुंबातील सदस्यांना अटक करून चीनच्या ताब्यात दिल्यानंतर या गटाचा अंत सुरू झाला. टेलिकॉम घोटाळा आणि चिनी नागरिकांना लक्ष्य करणाऱ्या बेकायदेशीर जुगाराच्या कारवाया रोखण्यासाठी चीनने दबाव आणल्यानंतर त्यांना सोपवण्यात आले.