Nepal Bus Accident: नेपाळमध्ये भारतीय भाविकांच्या बसला भीषण अपघात; दीडशे फूट खोल दरीत बस कोसळून ७ जणांचा मृत्यू

Nepal Bus Accident: नेपाळच्या गोरखा जिल्ह्यात मनकामना देवीचे दर्शन घेऊन परतणाऱ्या भारतीय भाविकांच्या बसला भीषण अपघात झाला. ही बस १५० मीटर खोल दरीत कोसळल्याने सात भारतीयांचा मृत्यू झाला असून अनेक जण जखमी झाले आहेत.

काठमांडू: नेपाळच्या दुर्गम डोंगराळ भागात भारतीय भाविकांवर काळाने झडप घातली आहे. मनकामना देवीचे दर्शन घेऊन परतणाऱ्या भाविकांची बस गोरखा जिल्ह्यात भीषण अपघातग्रस्त झाली. या दुर्घटनेत सात भारतीयांचा जागीच मृत्यू झाला असून अनेक जण गंभीर जखमी झाले आहेत. या घटनेमुळे भारत आणि नेपाळमध्ये हळहळ व्यक्त होत आहे.

नेमकी घटना काय?

शनिवारी सायंकाळी (१४ मार्च २०२६) गोरखा जिल्ह्यातील शहीद लखन ग्रामपंचायतीच्या हद्दीत हा अपघात घडला. भाविकांना घेऊन जाणारी ही बस वळणदार रस्त्यावरून जात असताना चालकाचे नियंत्रण सुटले आणि बस तब्बल १५० मीटर (सुमारे ५०० फूट) खोल दरीत कोसळली. काठमांडूपासून साधारण १२० किलोमीटर पश्चिमेला असलेला हा भाग अत्यंत अरुंद आणि धोकादायक रस्त्यांसाठी ओळखला जातो.

बचावकार्य आणि जखमींची स्थिती

मृत्यू: अपघातात ७ भारतीय भाविकांनी आपला जीव गमावला आहे.

जखमी: जखमी भाविकांना तातडीने चितवन मेडिकल कॉलेज (भरतपूर) येथे दाखल करण्यात आले आहे. बसचा चालक आणि क्लिनर हे देखील जखमी असून त्यांच्यावर उपचार सुरू आहेत.

बचावकार्य: स्थानिक नागरिक आणि पोलिसांनी दरीतून जखमींना बाहेर काढण्यासाठी युद्धपातळीवर प्रयत्न केले.

अपघाताचे कारण काय?

गोरखा जिल्ह्याचे डीएसपी राज कुमार श्रेष्ठ यांनी दिलेल्या माहितीनुसार, तीव्र उतारावर वळण घेत असताना बस घसरल्याचा प्राथमिक अंदाज आहे. मात्र, तांत्रिक बिघाड की चालकाचा अंदाज चुकला, याचा सखोल तपास सुरू आहे. ऑगस्ट २०२४ मध्येही अशाच एका अपघातात २७ भारतीयांचा मृत्यू झाला होता, त्या जखमा ताज्या असतानाच ही पुन्हा मोठी दुर्घटना घडली आहे.

नेपाळमधील रस्ते आता 'मृत्यूचे सापळे'?

नेपाळमधील पर्वतीय रस्त्यांवरील सुरक्षा आता ऐरणीवर आली आहे. गेल्या १० वर्षांत येथील अपघातांचे प्रमाण झपाट्याने वाढले असून २०२४-२५ या काळात ७,६६९ अपघात नोंदवले गेले आहेत. खराब रस्ते, अरुंद वळणे आणि पावसाळी वातावरण यामुळे पर्यटकांच्या व भाविकांच्या बसला सातत्याने लक्ष्य व्हावे लागत आहे.