Kuwait Attack: कुवेतच्या बंदरांवर ड्रोन हल्ले, हाय अलर्ट जारी!

Kuwait Intercepts Drone Attacks Targeting Major Ports: कुवेतच्या दोन मोठ्या बंदरांवर ड्रोनने हल्ला करण्यात आला आहे. या दोन्ही हल्ल्यांमध्ये कोणतीही जीवितहानी झालेली नाही. हल्ल्यानंतर आपत्कालीन यंत्रणा तात्काळ सक्रिय करण्यात आली असून, संबंधित सरकारी यंत्रणा परिस्थितीवर लक्ष ठेवून आहेत.

Kuwait Intercepts Drone Attacks Targeting Major Ports कुवेत सिटी: कुवेतच्या शुवैख बंदराला (Shuwaikh Port) लक्ष्य करून शुक्रवारी पहाटे ड्रोन हल्ला झाल्याची माहिती कुवेत पोर्ट्स अथॉरिटीने दिली आहे. सरकारी कम्युनिकेशन सेंटरने जारी केलेल्या पत्रकानुसार, या हल्ल्यात कोणतीही जीवितहानी झालेली नाही, मात्र मालमत्तेचं नुकसान झालं आहे.

अधिकाऱ्यांनी सांगितलं की, घटनेनंतर तात्काळ आपत्कालीन यंत्रणा कार्यान्वित करण्यात आली आणि संबंधित सरकारी एजन्सींच्या मदतीने परिस्थितीचा आढावा घेतला जात आहे. नुकसानीचा नेमका आकडा अजून तपासला जात आहे. याचदरम्यान, सार्वजनिक बांधकाम मंत्रालयाने (Ministry of Public Works) माहिती दिली की, मुबारक अल-कबीर (Mubarak Al-Kabeer) बंदराच्या पायाभूत सुविधांवरही ड्रोन आणि लॉइटरिंग म्युनिशन्सने (loitering munitions) हल्ला झाला. या घटनेनंतर बचाव पथकं घटनास्थळी दाखल झाली असून नुकसानीचा अंदाज घेत आहेत. दोन्ही घटनांमध्ये कोणीही जखमी किंवा मृत झालेलं नाही.

चेकपोस्ट्सची पाहणी

सोमवारी, गृह मंत्रालयाचे अंडरसेक्रेटरी मेजर जनरल अब्दुल वहाब अल-वहीब यांनी कुवेतच्या विविध भागांतील सुरक्षा चेकपोस्ट्सना भेट दिली. यावेळी सुरक्षा संचालनालय क्षेत्राचे प्रमुख मेजर जनरल हमाद अल-मुनिफी आणि वाहतूक व ऑपरेशन्स क्षेत्राचे प्रमुख ब्रिगेडियर अब्दुल्ला अल-अतीकी हे देखील उपस्थित होते. त्यांनी देशभरात तैनात असलेल्या चेकपोस्ट्सवरील सुरक्षा दलांच्या कार्यपद्धतीचा आणि तैनातीचा आढावा घेतला. सध्याची परिस्थिती लक्षात घेता, सुरक्षा आणि स्थिरता सुनिश्चित करण्यासाठी आखलेल्या योजना आणि उपाययोजनांची त्यांनी माहिती घेतली. देशाची सुरक्षा टिकवून ठेवण्यात चेकपोस्ट्सची भूमिका अत्यंत महत्त्वाची असल्याचं त्यांनी स्पष्ट केलं.