''यावेळी गोळी लक्ष्यावर लागेल'', इराणची डोनाल्ड ट्रम्प यांना थेट जीवे मारण्याची धमकी

Iran stern waring to American President Donald Trump : इराणच्या सरकारी टीव्हीवर डोनाल्ड ट्रम्प यांना जीवे मारण्याची धमकी देणारा व्हिडिओ प्रसारित झाला आहे, ज्यात 'यावेळी निशाणा चुकणार नाही' असे म्हटले आहे. 

Iran stern waring to American President Donald Trump : इराणमधील ताज्या घडामोडींनी अमेरिका आणि इराणमधील तणाव एका धोकादायक वळणावर आणून ठेवला आहे. इराणच्या सरकारी टेलिव्हिजनने रविवारी एक व्हिडिओ प्रसारित केला असून, त्यामध्ये अमेरिकेचे राष्ट्राध्यक्ष डोनाल्ड ट्रम्प यांना थेट जीवे मारण्याची धमकी देण्यात आली आहे. ट्रम्प यांनी अलीकडेच इराणच्या नेतृत्वाविरुद्ध लष्करी कारवाई करण्याचा इशारा दिला होता, त्याला प्रत्युत्तर म्हणून इराणने हे पाऊल उचलल्याचे दिसते.

हे धक्कादायक फुटेज 'इस्लामिक रिपब्लिक ऑफ इराण न्यूज नेटवर्क' (IRINN) या सरकारी वाहिनीवर प्रसारित करण्यात आले. तेहरानमध्ये नुकत्याच झालेल्या सरकारविरोधी आंदोलनांत मारल्या गेलेल्या सुरक्षा रक्षकांच्या अंत्यविधीचा हा कार्यक्रम होता. या कार्यक्रमात एका व्यक्तीने ट्रम्प यांच्या फोटोचे पोस्टर हातात धरले होते, ज्यामध्ये २०२४ मध्ये पेनसिल्व्हेनियातील बटलर येथे त्यांच्यावर झालेल्या प्राणघातक हल्ल्याचा संदर्भ देण्यात आला होता. या पोस्टरवर पर्शियन भाषेत स्पष्टपणे लिहिले होते की, "यावेळी निशाणा चुकणार नाही." इराणकडून ट्रम्प यांना देण्यात आलेली ही आतापर्यंतची सर्वात थेट धमकी मानली जात आहे.

इराणमधील हिंसाचारात वाढच

या संपूर्ण प्रकरणाची पार्श्वभूमी इराणमध्ये सुरू असलेल्या व्यापक जनक्षोभात दडलेली आहे. इराणचे चलन 'रियाल' कोसळल्यामुळे आणि अणू कार्यक्रमावरून लादलेल्या आंतरराष्ट्रीय निर्बंधांमुळे उद्भवलेल्या आर्थिक संकटामुळे २८ डिसेंबरपासून तिथे मोठी आंदोलने सुरू आहेत. या आंदोलकांना इराण सरकारने बळाचा वापर करून रोखल्यास अमेरिका लष्करी हल्ला करेल, असा इशारा डोनाल्ड ट्रम्प यांनी दिला होता. इराण सरकारने या निदर्शनांना 'दंगल' संबोधले असून आंदोलकांवर दहशतवादी कृत्यांचे आरोप केले आहेत. मानवाधिकार संघटनांच्या मते, गेल्या दोन आठवड्यांत १५० हून अधिक सुरक्षा कर्मचाऱ्यांचा मृत्यू झाला आहे, ज्यांना इराण सरकार 'हुतात्मा' मानून गौरव करत आहे.

सुलेमानी यांची हत्या

इराण आणि डोनाल्ड ट्रम्प यांच्यातील हा संघर्ष जुना आहे. जानेवारी २०२० मध्ये ट्रम्प यांच्या आदेशानुसार इराणचे प्रभावशाली जनरल कासिम सुलेमानी यांची हत्या करण्यात आली होती, तेव्हापासून इराणने अनेकदा ट्रम्प यांच्या हत्येची प्रतिज्ञा केली आहे. यापूर्वी २०२२ मध्ये देखील इराणने ट्रम्प यांच्यावर गोल्फ कोर्सवर हल्ला करण्याचा एक बनावट व्हिडिओ प्रसिद्ध केला होता. तसेच, अमेरिकेच्या न्याय विभागाने अलीकडेच फरहाद शाकेरी नावाच्या व्यक्तीला अटक करून इराणचा ट्रम्प यांच्या हत्येचा एक मोठा कट उधळून लावल्याचा दावा केला होता.

बाहेरुन आंदोलनांना मदत

दुसरीकडे, इराणचे परराष्ट्र मंत्री अब्बास अरागची यांनी मात्र या परिस्थितीला वेगळे वळण दिले आहे. त्यांच्या मते, ही आंदोलने सुरुवातीला शांततापूर्ण होती, परंतु बाहेरून नियंत्रित केल्या जाणाऱ्या दहशतवादी घटकांमुळे त्याला हिंसक स्वरूप प्राप्त झाले. एकूणच, इराणमधील अंतर्गत अशांतता आणि अमेरिकेसोबतचे हे वाकयुद्ध जागतिक सुरक्षेच्या दृष्टीने चिंतेचा विषय बनले आहे.