'पैशाने आनंद विकत घेता येत नाही', सर्वात श्रीमंत अब्जाधीश एलॉन मस्कची पोस्ट व्हायरल

Elon Musk Says Money Cant Buy Happiness : जगातील नंबर वन श्रीमंत व्यक्ती एलॉन मस्क यांनी 'पैशाने आनंद विकत घेता येत नाही' अशी पोस्ट त्यांच्या 'X' अकाउंटवर शेअर करून खळबळ उडवून दिली आहे.

Elon Musk Says Money Cant Buy Happiness : जगातील नंबर वन श्रीमंत आणि अशक्य गोष्टी शक्य करून दाखवणारे धाडसी उद्योजक एलॉन मस्क पुन्हा एकदा चर्चेत आले आहेत. पण यावेळी ते त्यांच्या संपत्तीमुळे नाही, तर त्यांनी शेअर केलेल्या एका भावनिक पोस्टमुळे चर्चेत आहेत. नुकतेच जगाच्या इतिहासात पहिल्यांदा 800 अब्ज डॉलर्सची निव्वळ संपत्ती गाठणारे पहिले व्यक्ती ठरल्यानंतर, मस्क यांनी त्यांच्या 'X' (पूर्वीचे ट्विटर) अकाउंटवर लिहिले की, 'पैशाने आनंद विकत घेता येत नाही'. त्यांच्या या शब्दांनी संपूर्ण इंटरनेट विश्वात खळबळ उडवून दिली आहे.

'आनंदाला किंमत नसते': मस्क यांच्या पोस्टमध्ये काय आहे?

अफाट संपत्ती जमा केल्यानंतरही मस्क यांची ही पोस्ट एक प्रकारची विरक्ती दर्शवते. 'जे म्हणतात की पैशाने आनंद मिळत नाही, त्यांना ते काय बोलत आहेत हे नक्कीच माहीत असते,' असे मस्क यांनी मार्मिकपणे म्हटले आहे. पोस्टच्या शेवटी त्यांनी वापरलेला 'दुःखी चेहऱ्याचा इमोजी' पाहून, एवढे मोठे साम्राज्य उभारलेल्या व्यक्तीच्या मनातही कुठेतरी असमाधान आहे का, अशी शंका निर्माण झाली आहे.

श्रीमंती आणि गरिबीवर नेटकऱ्यांमध्ये चर्चा

मस्क यांच्या या पोस्टवर सोशल मीडियावर मोठी चर्चा सुरू झाली आहे. एका युझरने म्हटले आहे की, 'पैसा हे सर्वस्व नसेल, पण पैशांची कमतरता माणसाला त्रास देते. बिलांचे ओझे आणि जगण्याची चिंता नसताना मिळणारी शांतता वेगळीच असते,' असे कठोर वास्तव मांडले आहे. तर दुसऱ्या एका युझरने, 'पैशाने अंथरुण विकत घेता येते, पण झोप नाही; अन्न विकत घेता येते, पण भूक नाही,' असे म्हणत मस्क यांच्या मताशी सहमती दर्शवली आहे.

पृथ्वी सोडून अवकाशात झेप घेण्याची मस्क यांची महत्त्वाकांक्षा

एकीकडे आध्यात्मिक आणि मानसिक विचारांमध्ये गुंतलेले दिसत असले तरी, मस्क यांनी आपली व्यावसायिक भूक कमी केलेली नाही. त्यांचे पुढचे मोठे पाऊल आता अवकाशाकडे आहे. त्यांची एअरोस्पेस कंपनी SpaceX आणि आर्टिफिशियल इंटेलिजन्स कंपनी xAI यांचे विलीनीकरण करून 1.25 ट्रिलियन डॉलर्स मूल्याची एक मोठी कंपनी तयार करण्याच्या तयारीत ते आहेत. पृथ्वीवरील ऊर्जा संसाधनांना धक्का न लावता, सौरऊर्जेवर चालणाऱ्या एक दशलक्ष उपग्रहांच्या माध्यमातून अवकाशातच 'डेटा सेंटर' उभारण्याचे मस्क यांचे पुढील अब्जावधी डॉलर्सचे स्वप्न आहे.