Robot Trainer Jobs : कपड्यांच्या घड्या घाला आणि महिना ८५ हजार कमवा! चीनमधली ही भन्नाट नोकरी पाहिलीत का?

चीनमध्ये सध्या एक भन्नाट नोकरी ट्रेंड होतेय. इथे रोबोट्सना घरकाम शिकवण्यासाठी माणसांना चक्क ५७ हजार ते ८५ हजार रुपये (४,००० ते ६,००० युआन) महिना पगार दिला जातोय. भविष्यात रोबोट्सकडून घरकाम करून घेण्यासाठी ही तयारी सुरू आहे.

कपड्यांच्या घड्या घालून महिना ८५ हजार कमवणारे कामगार

कपड्यांच्या घड्या घालण्यापासून ते भांडी घासण्यापर्यंतची रोजची घरची कामं रोबोट्सना शिकवण्यासाठी चीनमध्ये एक भन्नाट नोकरी तयार झाली आहे. यासाठी माणसांना महिन्याला तब्बल ८५,००० रुपयांपर्यंत पगार दिला जातोय. भविष्यात माणसांऐवजी रोबोट्सनी स्वतःहून घरकाम करावं, हा यामागचा उद्देश आहे. यासाठी लागणारा सुरुवातीचा ट्रेनिंग डेटा तयार करण्याचं काम सध्या चीनमधले कामगार करत आहेत.

कामाचं स्वरूप आणि 'एम्बॉडेड एआय' (Embodied AI)

रोबोट्ससाठी डेटा गोळा करण्याच्या या तंत्रज्ञानाला 'एम्बॉडेड एआय' (Embodied AI) असं म्हणतात. आर्टिफिशियल इंटेलिजन्स (AI) टूल्सनी खऱ्या जगात माणसांसारखं वस्तू हाताळायला शिकावं, हा यामागचा मुख्य हेतू आहे. ट्रेनिंग सेंटरमध्ये काम करणारे कामगार त्यांच्या हातांवर आणि शरीरावर हालचाली टिपणारे मोशन-कॅप्चर (Motion-capture) सेन्सर्स लावतात, तसंच बोटांमध्ये चिप्स घालतात.

कॉम्प्युटर स्क्रीनवर मिळणाऱ्या सूचनांनुसार ते कपमध्ये पाणी घेणं, बाटलीचं झाकण उघडणं, फरशी झाडणं, टेबल पुसणं आणि कपड्यांच्या घड्या घालणं अशी कामं करून दाखवतात. कामगारांच्या या बारीक शारीरिक हालचाली सेन्सर्सद्वारे डिजिटल डेटा म्हणून रेकॉर्ड केल्या जातात आणि रोबोट बनवणाऱ्या कंपन्यांना ट्रेनिंग माहिती म्हणून दिल्या जातात.

तगडा पगार, पण काम प्रचंड थकवणारं!

'साऊथ चायना मॉर्निंग पोस्ट'च्या (SCMP) रिपोर्टनुसार, या रोबोट ट्रेनर्सना महिन्याला ४,००० ते ६,००० युआन (सुमारे ५७,००० ते ८५,००० रुपये) पगार मिळतो. पगार तगडा असला तरी, दिवसभर एकच काम शेकडो वेळा करावं लागत असल्याने कामगार प्रचंड थकून जातात.

बीजिंगमध्ये राहणाऱ्या ४० वर्षीय लिऊ युन यांची ऑटोमोबाईल क्षेत्रातली नोकरी गेली. वयामुळे दुसरी नोकरी मिळेना, म्हणून त्यांनी एका ट्रेनिंग सेंटरमध्ये ही नोकरी धरली. "रोबोटला ट्रेनिंग देणं म्हणजे एखाद्या २ वर्षांच्या मुलाला काम शिकवण्यासारखं आहे," असं ते सांगतात. ते रोज १६० ते २६० वेळा एकच काम करतात. दिवसातून २०० वेळा भांडी घासणं किंवा टेबल पुसणं, ही त्यांच्या शरीराची सहन करण्याची शेवटची मर्यादा असते.

सुट्टीत पार्ट-टाइम काम करून पैसे कमवू पाहणाऱ्या कॉलेजच्या मुलांनाही या नोकरीने भुरळ घातली आहे. उत्तर चीनमधला २२ वर्षांचा विद्यार्थी सन सांगतो की, डे शिफ्टसाठी सुमारे १,७०० रुपये आणि नाईट शिफ्टसाठी १,९०० रुपये मिळतात. पण शारीरिक आणि मानसिक त्रासापुढे हा पैसा काहीच नाही, असं सांगत अनेक तरुण काही आठवड्यांतच ही नोकरी सोडून देतात.

घरबसल्या काम करण्याची संधी

प्रत्येकाने ट्रेनिंग सेंटरमध्ये जाऊनच काम केलं पाहिजे, अशी सक्ती नाही. पूर्व चीनमध्ये राहणाऱ्या गुओ होंगजुआन यांच्यासारखे काही लोक घरबसल्या रोज सुमारे ६ तास काम करतात. पुस्तके रचून ठेवणं, टेबल पुसणं यांसारख्या घरकामांचे व्हिडिओ रेकॉर्ड करून त्या महिन्याला सुमारे ५७,००० रुपये कमवतात. कुटुंब आणि मुलांची काळजी घेत काम करण्यासाठी ही एक उत्तम संधी असल्याचं त्या सांगतात.