Bali Deportation: बालीमध्ये रस्त्यावरच अश्लील कृत्य, ऑस्ट्रेलियन पर्यटकाला १० वर्षांसाठी बॅन
सार
बालीमध्ये एका घराबाहेर अश्लील कृत्य करणाऱ्या ऑस्ट्रेलियन पर्यटकाला पोलिसांनी अटक करून मायदेशी पाठवलं आहे. तसेच त्याच्यावर इंडोनेशियात येण्यास १० वर्षांची बंदी घातली आहे.
बाली: एका ऑस्ट्रेलियन पर्यटकाला बालीमधून हद्दपार करण्यात आलं आहे. सीसीटीव्ही कॅमेऱ्यात तो एका घराबाहेर अश्लील कृत्य करताना दिसला होता. यानंतर त्याच्यावर इंडोनेशियात प्रवेश करण्यासाठी १० वर्षांची बंदी घालण्यात आली आहे.
अधिकाऱ्यांनी दिलेल्या माहितीनुसार, या २८ वर्षीय तरुणाची ओळख 'बीए' (BA) या आद्याक्षरांनी सांगण्यात आली आहे. नॉर्थ कुटा (North Kuta) भागातील एका घराबाहेर तो एका महिलेसोबत असल्याचं सीसीटीव्ही फुटेजमध्ये उघड झालं.
या व्हिडिओमध्ये एक शर्टलेस तरुण आणि बिकिनी घातलेली महिला घराच्या ड्राइव्हवेवर सुमारे १५ मिनिटे अश्लील कृत्य करताना दिसले. यावेळी पूजेचं साहित्य घेऊन जाणारा एक वाटसरू त्यांना पाहून तिथून निघून गेल्याचंही व्हिडिओत दिसलं.
पोलिसांनी नंतर 'बीए'ची ओळख पटवली आणि इमिग्रेशन अधिकाऱ्यांच्या मदतीने त्याला २५ ऑगस्ट रोजी आय गुस्ती न्गुराह राय आंतरराष्ट्रीय विमानतळावर (I Gusti Ngurah Rai International Airport) पकडलं. तो ब्रिस्बेनला (Brisbane) जाणाऱ्या फ्लाइटमध्ये बसण्याच्या तयारीत होता.
हद्दपारी आणि बंदी
'बीए'ला ८ सप्टेंबर रोजी बाटिक एअरच्या (Batik Air) विमानाने ब्रिस्बेनला हद्दपार करण्यात आलं. बालीमध्ये परदेशी नागरिकांकडून होणारे गैरप्रकार रोखण्यासाठी आणि सुरक्षा राखण्यासाठी इमिग्रेशन अधिकाऱ्यांनी त्याच्यावर १० वर्षांची बंदी घातली आहे. इमिग्रेशन पाळत ठेवणे आणि नियमांचे उल्लंघन करणाऱ्यांवर कठोर कारवाई करण्याच्या मोहिमेचा हा एक भाग असल्याचं अधिकाऱ्यांनी सांगितलं.
चौकशीदरम्यान 'बीए'ने आपली चूक मान्य केली. दारूच्या नशेत असताना एका बीच क्लबवर आपली या महिलेशी ओळख झाल्याचं त्याने सांगितलं. नंतर घरमालकाने त्याला माफ केलं आणि पोलिसांना कायदेशीर कारवाई थांबवण्याची विनंती केली. त्यामुळे पोलिसांनी त्याला कोठडीत न ठेवता हद्दपार करण्यासाठी इमिग्रेशन अधिकाऱ्यांच्या ताब्यात दिलं. मात्र, या प्रकरणातील महिलेची अद्याप चौकशी सुरू आहे.