Australia Viral Video: लग्नात पावसाचा कहर, पाहुण्यांनी खुर्च्यांनी पेललं छत!

सिडनीमध्ये एका लग्नात अचानक आलेल्या वादळ आणि गारांच्या पावसामुळे मंडपाचं छत कोसळण्याची वेळ आली. यावेळी सूट-बूट घातलेल्या पाहुण्यांनी जेवणाच्या टेबलांवर उभं राहून लाकडी खुर्च्यांच्या मदतीने हे छत सावरून धरलं.

ऑस्ट्रेलियात एका लग्नात पाहुण्यांना अचानक निसर्गाच्या लहरीपणाचा सामना करावा लागला. जोरदार वादळ आणि गारांच्या पावसामुळे मंडपात पाणी साचू लागलं. छत कोसळू नये म्हणून या पाहुण्यांना चक्क खुर्च्यांचा आधार घेत ते वर उचलून धरावं लागलं.

'द स्ट्रेट्स टाइम्स'ने दिलेल्या माहितीनुसार, ३ ऑक्टोबरला सिडनीमध्ये हा लग्नसोहळा सुरू होता. त्या दिवशी या भागात भयंकर वादळ आलं होतं. मंडपाच्या छतावर पावसाचं पाणी आणि गारा साचायला लागल्या. वजनामुळे छत खाली येऊ लागल्याने, मोठा अनर्थ टाळण्यासाठी पाहुण्यांनीच पुढाकार घेतला.

सोशल मीडियावर या घटनेचा एक व्हिडिओ व्हायरल झालाय. यात काही लोक लाकडी खुर्च्या डोक्यावर उचलून छताला आधार देताना दिसत आहेत. पाण्याच्या आणि गारांच्या वजनामुळे छताचा काही भाग स्पष्टपणे खाली वाकलेला या व्हिडिओत दिसतोय.

हे सगळे पाहुणे सूट आणि फॉर्मल कपड्यांमध्ये होते. ते सगळे खांद्याला खांदा लावून त्या वाकलेल्या छताखाली उभे राहिले आणि पाऊस सुरू असतानाही खुर्च्यांच्या मदतीने त्यांनी छत वर ढकलून धरलं.

हे सगळं जेवणाच्या टेबलांवर घडत होतं. या टेबलांवर प्लेट्स, ग्लास आणि नॅपकिन्स अगदी व्यवस्थित मांडून ठेवले होते. पण वर साचलेल्या पाण्यामुळे या लग्नसोहळ्याचं रूपांतर अचानक एका बचावकार्यात झालं. तिथल्या इतर व्हिडिओंमध्येही हवामानाचा रौद्र अवतार पाहायला मिळतोय. जोरदार पावसात लॉनवर गारांचे मोठे तुकडे पडलेले दिसत आहेत.

पाहा हा व्हायरल व्हिडिओ

ROOF CAVES in at wedding during torrential downpours in SYDNEY https://t.co/BYI0gpZ92U

— RTVisual (@RT_Visual_on_X) October 6, 2026

या अचानक आलेल्या संकटामुळे लोकांमध्ये भीती आणि हसू असं दोन्ही पाहायला मिळालं. तिथे अडकलेल्या एका पाहुण्याने या घटनेचं वर्णन करताना म्हटलंय की, "हे सगळं थोडं भीतीदायक आणि तितकंच मजेशीर होतं."

या खराब हवामानामुळे आपत्कालीन यंत्रणांचीही चांगलीच धांदल उडाली. न्यू साऊथ वेल्सच्या आपत्कालीन सेवांना मदतीसाठी १८० हून अधिक कॉल्स आले. वादळामुळे या भागातल्या यंत्रणांवर मोठा ताण आला होता.