Xiaomi Foldable: शाओमीचा नवा धमाका, 18 फोल्ड फोनसोबत स्मार्ट कार आणि रोबोटही सादर!

जर्मनीतील IFA 2026 टेक शोमध्ये शाओमीने आपल्या नव्या जनरेशनचा फोल्डेबल स्मार्टफोन 'शाओमी 18 फोल्ड' सादर केला आहे. स्वतःच्या एक्सरिंग ओ३ चिपसह येणाऱ्या या फोनसोबतच कंपनीने आपली स्मार्ट कार, रोबोट आणि स्मार्ट होम प्रोडक्ट्सची मोठी रेंजही दाखवली.

शाओमीने आपल्या नव्या जनरेशनचा फोल्डेबल स्मार्टफोन सादर केला आहे. जर्मनीतील IFA 2026 टेक शोमध्ये कंपनीने आपला नवीन फोल्डेबल फोन 'शाओमी 18 फोल्ड' पहिल्यांदाच जगासमोर आणला. शाओमीने सांगितलंय की, हा त्यांच्या स्वतःच्या चिपवर चालणारा पहिला स्मार्टफोन असेल. हा फोन याच महिन्यात बाजारात येणार असून, चीनमध्ये ७ सप्टेंबरला 'शाओमी 18 फोल्ड' लाँच केला जाईल. यासोबतच शाओमी पॅड ९ प्रो मॅक्सदेखील लाँच होणार असल्याचं कंपनीने स्पष्ट केलं आहे.

लाल रंगात नवीन फोल्डेबल फोन

IFA च्या स्टेजवर शाओमीने आपला लाल रंगाचा 18 फोल्ड फोन दाखवला. एक्सरिंग ओ३ (Xring O3) चिप वापरणारा हा पहिला शाओमी स्मार्टफोन असेल. फोनच्या मागे ट्रिपल कॅमेरा सेटअप देण्यात आला आहे. फोनच्या इतर स्पेसिफिकेशन्सबद्दल कंपनी नंतर माहिती देईल असं दिसतंय. या नव्या चिपमुळे फोनचा परफॉर्मन्स आणि आर्टिफिशियल इंटेलिजन्स (AI) आधारित कामं अधिक चांगली होतील, अशी कंपनीला आशा आहे.

३८० प्रोडक्ट्स आणि टेक्नॉलॉजी

IFA 2026 मध्ये शाओमीने ३,३०० चौरस मीटरच्या भव्य जागेत ३८० पेक्षा जास्त प्रोडक्ट्स आणि टेक्नॉलॉजी सादर केली. 'AI Tomorrow', 'AI Today' आणि 'Human × Car × Home' या तीन विभागांमध्ये हे प्रदर्शन मांडण्यात आलं होतं. 'AI Tomorrow' विभागाचं मुख्य आकर्षण होतं इंटेलिजेंट ट्रान्सपोर्ट सिस्टीम आणि शाओमी व्हिजन ग्रॅन टुरिस्मो इलेक्ट्रिक हायपरकार कॉन्सेप्ट. तर 'AI Today' विभागात शाओमी एसयू७ मॅक्स आणि स्मार्ट होम सिस्टीम दाखवण्यात आली. इथे पर्सनल डिव्हाइस, कार आणि स्मार्ट होम प्रोडक्ट्सना AI च्या मदतीने कसं एकत्र आणता येईल, हे तंत्रज्ञान कंपनीने सादर केलं.

स्मार्ट होम विश्वातही विस्तार

शाओमीने स्वयंपाक, अन्न साठवणूक, घराची स्वच्छता, एअर कंट्रोल, मनोरंजन, सुरक्षा, पर्सनल डिव्हाइस आणि स्मार्ट वाहतूक व्यवस्था यांसारख्या क्षेत्रांतील प्रोडक्ट्सही सादर केले. IFA मध्ये मिजिया (Mijia) स्मार्ट होम सिस्टीमवर कंपनीने विशेष भर दिला. शाओमीने सांगितलं की, युरोपमध्ये मिजिया प्रोडक्ट्सचा व्यवसाय मोठ्या प्रमाणावर वाढवला जाईल.

मंचावर माणसासारखा दिसणारा रोबोटही

शाओमीचा माणसासारखा दिसणारा रोबोट 'सायबरवन' (CyberOne) हे IFA प्रदर्शनातील आणखी एक मोठं आकर्षण होतं. यासोबतच मिमो-व्ही२.५-प्रो, शाओमी मिलोको आणि शाओमी मिक्लो यांसारखे नवीन AI टेक्नॉलॉजीही कंपनीने समोर आणले. हायपरओएस प्लॅटफॉर्मसोबत AI, ऑपरेटिंग सिस्टीम, चिप निर्मिती आणि स्मार्ट मॅन्युफॅक्चरिंग यांसारख्या क्षेत्रातील आपल्या गुंतवणुकीबद्दलही शाओमीने सविस्तर माहिती दिली.

युरोपच्या बाजारातही गाडी येणार

शाओमीच्या ऑटोमोबाईल विभागातही मोठ्या घोषणा झाल्या. व्हिजन ग्रॅन टुरिस्मो कॉन्सेप्ट कारसोबतच नव्या जनरेशनच्या एसयू७ (SU7) आणि एसयू७ अल्ट्रा (SU7 Ultra) गाड्याही दाखवण्यात आल्या.

शाओमीचा दावा आहे की, मार्च २०२४ मध्ये डिलिव्हरी सुरू केल्यापासून त्यांनी चीनमध्ये ७ लाखांपेक्षा जास्त गाड्या विकल्या आहेत. २०२७ पर्यंत जर्मनीसह युरोपच्या बाजारातही शाओमी ऑटोला आणण्याची कंपनीची योजना आहे. शाओमीला आशा आहे की, २०२६ ते २०३० या काळात संशोधन आणि विकासावर (R&D) त्यांची गुंतवणूक २४ अब्ज युरोच्या पुढे जाईल. ही गुंतवणूक प्रामुख्याने AI, ऑपरेटिंग सिस्टीम, चिप, स्मार्ट कार आणि रोबोटिक्स क्षेत्रात केली जाईल.