UPI Transaction: चुकून दुसऱ्याच्या अकाऊंटवर पैसे गेले? घाबरू नका, असं केल्यास पैसे परत मिळतील

डिजिटल पेमेंट करताना चुकून दुसऱ्याला पैसे पाठवले तर घाबरून जाऊ नका. आधी स्टेटस तपासा, UPI ॲपवर तक्रार करा आणि लगेच तुमच्या बँकेला कळवा. असं केल्यास तुमचे पैसे परत मिळण्याची शक्यता वाढते.

आजकाल डिजिटल पेमेंट खूप वाढलंय. पण कधीकधी गडबडीत एकाला पाठवायचे पैसे दुसऱ्यालाच जातात. नशीब चांगलं असेल तर समोरची व्यक्ती पैसे परत करते, पण अनेकदा असं होत नाही. पण म्हणून सगळे रस्ते बंद झाले असं नाही. पॅनिक न होता, चूक कळताच लगेच खाली दिलेल्या स्टेप्स फॉलो करा. तुमचे पैसे परत मिळण्याची शक्यता नक्कीच वाढेल.

पैसे परत मिळवण्यासाठी काय करायचं? या स्टेप्स फॉलो करा.

जर तुम्ही चुकून दुसऱ्या व्यक्तीला पैसे पाठवले असतील, तर वेळ न घालवता लगेच या गोष्टी करा. तुमचे पैसे परत मिळतील.

1. ट्रान्झॅक्शनचं स्टेटस तपासा

तुमच्या UPI ॲपमध्ये जाऊन पेमेंट यशस्वी झालंय, पेंडिंग आहे की फेल झालंय, हे तपासा. लगेच त्या ट्रान्झॅक्शनचा स्क्रीनशॉट काढून ठेवा.

2. तुमच्या UPI ॲपवर तक्रार करा

ज्या UPI ॲपमधून (BHIM, Google Pay, PhonePe किंवा Paytm) पैसे पाठवले, तिथेच आधी तक्रार करा. प्रत्येक मोठ्या ॲपमध्ये झालेल्या ट्रान्झॅक्शनबद्दल तक्रार करण्याचा पर्याय असतो. तक्रार करण्याआधी UPI ट्रान्झॅक्शन आयडी, रेफरन्स नंबर, तारीख आणि स्क्रीनशॉट तयार ठेवा.

यासाठी, तुमच्या ॲपच्या 'History' मध्ये जाऊन चुकीच्या पेमेंटवर क्लिक करा आणि तिथे दिसणारा 'Help', 'Raise a complaint' किंवा 'Report an issue' सारखा पर्याय निवडा.

3. लगेच तुमच्या बँकेशी संपर्क साधा

फक्त UPI ॲपवर अवलंबून राहू नका. ज्या बँक खात्यातून पैसे कापले गेले आहेत, त्या बँकेशी लगेच संपर्क साधा आणि चुकीच्या व्यक्तीला UPI पेमेंट गेल्याचं सविस्तर सांगा.

4. पैसे मिळालेल्या व्यक्तीशी संपर्क साधा - पण काळजीपूर्वक

जर तुम्हाला पैसे मिळालेल्या व्यक्तीचे डिटेल्स दिसत असतील, तर त्यांना नम्रपणे संपर्क साधा आणि चुकून पेमेंट झाल्याचं सांगा. त्यांना योग्य मार्गाने पैसे परत करण्यास सांगा.

पैसे परत मिळवण्याच्या नादात तुमचा UPI पिन, OTP, कार्ड डिटेल्स किंवा बँकिंग पासवर्ड कधीही शेअर करू नका. लक्षात ठेवा, पैसे परत मिळवण्यासाठी तुम्हाला तुमचा UPI पिन टाकून 'रिफंड' अप्रूव्ह करण्याची गरज नसते.

काय करू नये?

• चूक कळल्यावर तक्रार करायला अजिबात उशीर करू नका.
• कोणासोबतही OTP, UPI पिन किंवा कार्ड डिटेल्स शेअर करू नका.
• कोणी रिफंड देतोय असं सांगून रिमोट-ॲक्सेस ॲप इन्स्टॉल करायला लावत असेल, तर ते करू नका.
• तुमचा रिफंड 'अनलॉक' करण्यासाठी किंवा 'मिळवण्यासाठी' पुन्हा पेमेंट करू नका.
• ट्रान्झॅक्शनचे स्क्रीनशॉट किंवा तक्रारीचा रेफरन्स नंबर डिलीट करू नका.