Delivery Box Secret: ॲमेझॉन, फ्लिपकार्टचे डिलिव्हरी बॉक्स नेहमी तपकिरी रंगाचेच का असतात? कारण वाचून थक्क व्हाल!

ॲमेझॉन, फ्लिपकार्ट किंवा मीशोवरून आपण काहीही मागवलं, तरी ते पार्सल नेहमी तपकिरी रंगाच्या बॉक्समध्येच येतं. हे बॉक्स पांढरे किंवा रंगीत का नसतात, याचा कधी विचार केलाय? यामागे खर्च, पर्यावरण आणि विज्ञानाचं एक मोठं कारण दडलंय.

ॲमेझॉन, फ्लिपकार्ट किंवा मीशोचे डिलिव्हरी बॉक्स आजकाल आपल्या घरी रोजच येतात. यातले ९०% बॉक्स तपकिरी रंगाचेच असतात, हे तुम्ही कधी नोटीस केलंय का? कंपन्यांना वाटलं तर ते छान पांढरे किंवा रंगीत बॉक्स वापरू शकतात, पण ते तसं करत नाहीत. यामागे कोणताही योगायोग नसून ३ मोठी कारणं दडली आहेत.

१. पैशांची बचत: हे यामागचं सर्वात मुख्य कारण आहे. आपण जे तपकिरी बॉक्स बघतो, त्यांना 'करोगेटेड बॉक्स' असं म्हणतात. रिसायकल केलेला कागद आणि लाकडाच्या लगद्यापासून हे बॉक्स बनवले जातात. या लगद्याचा नैसर्गिक रंगच मुळात तपकिरी असतो.

याला पांढरं करण्यासाठी ब्लीचिंग किंवा रासायनिक प्रक्रिया करावी लागते. यामुळे कंपनीचा खर्च खूप वाढतो. पांढरा बॉक्स बनवण्यासाठी तपकिरी बॉक्सच्या तुलनेत ५ ते १०% जास्त खर्च येतो. रोज लाखो बॉक्स वापरणाऱ्या कंपन्यांसाठी या ५ टक्क्यांचा अर्थ कोट्यवधी रुपयांची बचत असा होतो. म्हणूनच कंपन्या मुद्दाम बॉक्सचा रंग तपकिरीच ठेवतात.

२. पर्यावरणपूरक आणि मजबूत: तपकिरी बॉक्स हे अनब्लीच्ड आणि रिसायकल केलेले असतात. पांढरे बॉक्स बनवताना वापरलं जाणारं क्लोरीन ब्लीचिंग पर्यावरणासाठी हानिकारक असतं. त्यामुळे ॲमेझॉनसारख्या मोठ्या कंपन्या स्वतःला 'इको-फ्रेंडली' दाखवण्यासाठी तपकिरी बॉक्सचा वापर करतात.

विज्ञानाच्या दृष्टिकोनातूनही तपकिरी बॉक्स जास्त मजबूत असतात. ब्लीचिंगमुळे कागदाचे फायबर कमकुवत होतात. तपकिरी बॉक्समध्ये हे फायबर सुरक्षित राहतात. त्यामुळे हे बॉक्स जास्त दाब सहन करू शकतात आणि आतलं सामान सुरक्षित राहतं.

३. ब्रँडिंगची सायकॉलॉजी: हेसुद्धा यामागचं एक महत्त्वाचं कारण आहे. तपकिरी रंग ग्राहकांच्या मनात पर्यावरणपूरक, साधेपणा आणि विश्वासाची भावना निर्माण करतो. शिवाय, तपकिरी बॉक्सवर काळ्या रंगाचा लोगो एकदम उठून दिसतो. यामुळे प्रिंटिंगवर वेगळा खर्च करावा लागत नाही.

तपकिरी रंग ही कोणती स्टाईल नसून, कोट्यवधी रुपये आणि पर्यावरण वाचवण्याची कंपन्यांची एक स्मार्ट आयडिया आहे, हे आता तुमच्या लक्षात आलंच असेल. पुढच्या वेळी जेव्हा तुमच्या हातात असा तपकिरी बॉक्स येईल, तेव्हा तुम्हाला ही गोष्ट नक्की आठवेल!