व्हॉट्सॲप वेबवर ग्रुप चॅटमध्ये व्हॉइस आणि व्हिडिओ कॉलिंग येणार;काय असतील फीचर्स?

व्हॉट्सॲप एका नवीन फीचरवर काम करत आहे, जे युजर्सना थेट वेबवरून ग्रुप चॅटमध्ये व्हॉइस आणि व्हिडिओ कॉल करण्याची सुविधा देईल. या कॉल्समध्ये जास्तीत जास्त 32 लोक सहभागी होऊ शकतील. 

कॅलिफोर्निया: सततच्या अपडेट्सने आश्चर्यचकित करणारे व्हॉट्सॲप आता आणखी एक नवीन फीचर आणण्याच्या तयारीत आहे. व्हॉट्सॲप वेबवर 32 लोकांना जोडून ग्रुप कॉल करण्याची सुविधा व्हॉट्सॲप देत आहे. व्हॉट्सॲपच्या अपडेट्सवर लक्ष ठेवणाऱ्या WABetaInfo ने दिलेल्या रिपोर्टनुसार, लवकरच व्हॉट्सॲपवर 32 लोकांना जोडून व्हॉइस आणि व्हिडिओ कॉल करण्याची सुविधा येणार आहे. हे फीचर व्हॉट्सॲप वेबवर टप्प्याटप्प्याने सादर केले जाईल. यासोबतच ग्रुप कॉल्ससाठी लिंक तयार करण्याची आणि कॉल शेड्यूल करण्याची सुविधाही व्हॉट्सॲप वेबवर येईल.

व्हॉट्सॲप वेबसाठी नवीन फीचर

व्हॉट्सॲप एका नवीन फीचरवर काम करत आहे, जे युजर्सना थेट वेबवरून ग्रुप चॅटमध्ये व्हॉइस आणि व्हिडिओ कॉल करण्याची सुविधा देईल. रिपोर्टनुसार, या कॉल्समध्ये जास्तीत जास्त 32 लोक सहभागी होऊ शकतील. हे फीचर सादर करताना सुरुवातीच्या टप्प्यात व्हॉट्सॲप ही संख्या मर्यादित ठेवू शकते. सुरुवातीला ग्रुप व्हिडिओ आणि व्हॉइस कॉलमध्ये सहभागी होणाऱ्यांची संख्या आठ किंवा सोळा असू शकते. टप्प्याटप्प्याने ही संख्या 32 पर्यंत वाढवली जाईल. WABetaInfo च्या रिपोर्टनुसार, आवाजात कोणताही तांत्रिक अडथळा न येता सतत कॉलिंग शक्य होईल, अशा प्रकारे व्हॉट्सॲप हे फीचर डिझाइन करत आहे. 2020 पासून व्हॉट्सॲप फोनवर 32 लोकांना ग्रुप कॉलमध्ये सहभागी होण्याची परवानगी देत आहे.

व्हॉट्सॲप वेबवर कॉल्स शेड्यूलही करता येणार

याशिवाय, व्हॉट्सॲप वेबवरील ग्रुप चॅटमधून थेट कॉल लिंक तयार करण्याची सुविधा देणारे फीचर आणण्याचीही व्हॉट्सॲपची योजना आहे. ही लिंक इतरांसोबत शेअर करून ते त्वरित कॉलमध्ये सामील होऊ शकतील. यासोबतच, युजर्सना व्हॉइस कॉल की व्हिडिओ कॉल हवा, हे निवडण्याचा पर्यायही मिळेल. हे फीचर व्हॉट्सॲपने ऑगस्ट 2025 मध्ये अँड्रॉइड आणि iOS स्मार्टफोन युजर्ससाठी सादर केले होते. यासोबतच व्हॉट्सॲप वेबवर कॉल्स शेड्यूल करण्याचे फीचरही येणार असल्याचे संकेत आहेत. यामध्ये शीर्षक, वर्णन, कॉल सुरू होण्याची आणि संपण्याची वेळ सेट करून कॉल्सचे शेड्यूल तयार करता येईल.