WhatsApp Update : आता मित्रांचा वाढदिवस विसरणार नाही, व्हॉट्सॲप करुन देणार आठवण!

व्हॉट्सॲप एका नवीन फीचरवर काम करत आहे, जे तुम्हाला तुमच्या कॉन्टॅक्ट्सच्या वाढदिवसाची आठवण करून देईल. अँड्रॉइडच्या बीटा व्हर्जनमध्ये हे फीचर दिसलं आहे. हे फीचर तुमच्या मित्रांच्या वाढदिवसाला ॲपमध्येच नोटिफिकेशन पाठवेल. सध्या हे फीचर डेव्हलपमेंटमध्ये असून, त्याचे प्रायव्हसी कंट्रोल कसे असतील हे अजून स्पष्ट नाही.

मुंबई : व्हॉट्सअ‍ॅप पुन्हा एकदा एक नवीन फीचर आणण्याच्या तयारीत आहे, ज्यामुळे आपलं रोजचं बोलणं आणखी सोपं होईल. गेल्या काही महिन्यांत अनेक नवीन फीचर्स आणल्यानंतर, आता मेटाच्या मालकीचं हे मेसेजिंग प्लॅटफॉर्म एका बिल्ट-इन 'बर्थडे रिमाइंडर' टूलवर काम करत आहे. यामुळे तुम्हाला तुमच्या मित्रांच्या वाढदिवसाची आठवण ठेवण्यासाठी वेगळ्या कॅलेंडर ॲपची गरज भासणार नाही. हे टूल अजून डेव्हलपमेंटमध्ये असलं तरी, सुरुवातीच्या माहितीनुसार ते तुमच्या कॉन्टॅक्टमधील कुणाचा वाढदिवस जवळ आल्यावर तुम्हाला आठवण करून देईल. चला, या फीचरबद्दल आणि ते कसं काम करेल याबद्दल सविस्तर जाणून घेऊया.

WABetaInfo च्या रिपोर्टनुसार, हे फीचर व्हॉट्सॲपच्या अँड्रॉइड बीटा व्हर्जनमध्ये दिसलं आहे. रिपोर्टमध्ये म्हटलं आहे की, टेलिग्रामला टक्कर देणारं व्हॉट्सॲप एक खास सेक्शन तयार करत आहे, जिथे तुम्हाला तुमच्या मित्रांचे येणारे वाढदिवस दिसतील. ज्या दिवशी वाढदिवस असेल, त्या दिवशी ॲपमध्येच एक नोटिफिकेशन येईल.

मिळालेल्या माहितीनुसार, हे फीचर व्हॉट्सॲपच्या एका जुन्या निर्णयावर आधारित आहे. काही देशांमध्ये व्हॉट्सॲप तिथल्या कायद्यांचं पालन करण्यासाठी आणि युझर्सच्या वयाची पडताळणी करण्यासाठी त्यांची जन्मतारीख घेते. पण आतापर्यंत या माहितीचा सामान्य युझर्ससाठी थेट काही उपयोग नव्हता.

जर हे बर्थडे रिमाइंडर फीचर सर्वांसाठी आलं, तर व्हॉट्सॲप याच सेव्ह केलेल्या जन्मतारखेच्या माहितीचा वापर करून तुम्हाला नोटिफिकेशन पाठवेल. पण एक गोष्ट लक्षात ठेवायला हवी की, हे रिमाइंडर फक्त त्याच कॉन्टॅक्ट्ससाठी काम करेल ज्यांनी आपली जन्मतारीख व्हॉट्सॲपला दिली आहे. ज्यांनी आपली जन्मतारीख ॲपमध्ये टाकली नाही, त्यांचं नाव रिमाइंडर लिस्टमध्ये दिसण्याची शक्यता कमी आहे.

सध्या हे फीचर डेव्हलपमेंटच्या सुरुवातीच्या टप्प्यात असल्यामुळे बीटा टेस्टर्सनाही ते वापरता येत नाहीये. तसंच, युझर्सना आपली जन्मतारीख आपल्या कॉन्टॅक्ट्सना दाखवायची आहे की नाही, हे ठरवण्यासाठी कोणते प्रायव्हसी पर्याय मिळतील, याबद्दलही कंपनीने काही सांगितलेलं नाही. पण हे फीचर सर्वांसाठी रिलीज होण्यापूर्वी मेटा यात नक्कीच प्रायव्हसी कंट्रोल्स देईल, अशी अपेक्षा आहे.