Holi Hacks: रंगपंचमीचा पक्का रंग काढताना नाकी नऊ येतात? फक्त २ मिनिटांत 'इनो'ने करा कमाल!

होळी खेळल्यानंतर पक्के रंग काढणं म्हणजे एक मोठं टेंशन असतं. पण आता काळजी सोडा. सोशल मीडियावर एक भन्नाट हॅक व्हायरल झाली आहे, ज्यात फक्त एका इनोच्या पॅकेटने २ मिनिटांत रंग काढता येतो. जाणून घ्या ही सोपी ट्रिक.

Instant Color Removal Trick: होळीचा सण आहे आणि रंगांची उधळण नाही, असं तर होऊच शकत नाही. लहान्यांपासून मोठ्यांपर्यंत सगळेच जण रंगात न्हाऊन निघतात. पण काही पक्के रंग चेहऱ्यावर किंवा अंगावर असे काही बसतात की ते काढताना अक्षरशः नाकीनऊ येतात. पण आता चिंता सोडा, कारण आम्ही तुम्हाला एक असा सोपा उपाय सांगणार आहोत, ज्यामुळे तुम्ही इनोच्या एका पॅकेटने होळीचा कसलाही पक्का रंग सहज काढू शकाल.

होळीचे रंग काढण्याची इन्स्टा व्हायरल हॅक

इन्स्टाग्रामवर kalasekitchentak नावाच्या पेजवर एक व्हिडिओ सध्या खूप व्हायरल होत आहे. या व्हिडिओमध्ये दाखवलं आहे की, इनोच्या एका पॅकेटच्या मदतीने तुम्ही तुमच्या हातावरचा, चेहऱ्यावरचा किंवा शरीरावर कुठेही लागलेला होळीचा रंग अगदी सहज काढू शकता. यासाठी एका पॅकेट इनोमध्ये थोडासा लिक्विड सोप, बॉडी वॉश किंवा फेस वॉश मिसळा. हे मिश्रण चांगलं एकत्र करून रंग लागलेल्या भागावर लावा आणि २ ते ३ मिनिटं तसंच राहू द्या. त्यानंतर तुम्ही पाहाल की तुमचा रंग अगदी सहज निघून जाईल. हे कोमट पाण्याने धुवा आणि नंतर मॉइश्चरायझर लावायला विसरू नका.

इनोने रंग काढण्याचे इतर मार्ग

जर रंग खूपच जास्त पक्का असेल, तर एका चमचा इनोमध्ये दोन चमचे दही घालून एक पेस्ट तयार करा. ही पेस्ट रंग लागलेल्या भागावर ५ मिनिटं लावून ठेवा. त्यानंतर हलक्या हातांनी चोळा आणि कोमट पाण्याने धुऊन टाका.

इनो वापरण्यापूर्वी या गोष्टी लक्षात ठेवा

इनो वापरण्यापूर्वी काही गोष्टी लक्षात ठेवा. इनो वापरण्याआधी एक पॅच टेस्ट नक्की करून घ्या. जर तुमची त्वचा संवेदनशील (sensitive skin) असेल, तर इनो वापरू नका. इनो लावल्यानंतर त्वचा जास्त चोळू नका, नाहीतर जळजळ होऊ शकते किंवा त्वचा लाल होऊ शकते. इनो वापरल्यानंतर लगेच क्रीम किंवा कोरफड जेल (aloe vera gel) लावा. यामुळे त्वचेला थंडावा मिळतो.