Aadhaar Card KYC : आधार कार्डधारकांसाठी गुड न्यूज, आता टेन्शन घेण्याची गरज नाही! वाचा नक्की काय आहे अपडेट

Aadhaar Card: आधार कार्डद्वारे चेहरा ओळखून केवायसी (KYC) करण्याची प्रक्रिया आता आणखी सोपी होणार आहे. यासाठी UIDAI ने नवीन तंत्रज्ञान आणि टूल्स लाँच केले आहेत.

आधार कार्ड अपडेट

आधार वापरकर्त्यांसाठी चेहरा ओळखून पडताळणी (Face Authentication) करण्याची प्रक्रिया आता सोपी होणार आहे. UIDAI ने यासाठी नवीन तंत्रज्ञान आणलं आहे. १४ सप्टेंबर २०२६ रोजी झालेल्या 'ग्लोबल फिनटेक फेस्ट'मध्ये UIDAI ने आधार फेस ऑथेंटिकेशनसाठी नवीन सॉफ्टवेअर आणि टेस्टिंग प्लॅटफॉर्म लाँच केला. कंपन्यांना त्यांच्या स्वतःच्या ॲपमध्ये फेस ऑथेंटिकेशनची सुविधा जोडता यावी, हा यामागचा मुख्य उद्देश आहे.

सध्याच्या नियमांनुसार, ग्राहकांना एखाद्या कंपनीच्या ॲपसोबतच UIDAI चं 'आधार फेस ॲप' (Aadhaar Face RD) वापरावं लागतं. पण या नवीन सॉफ्टवेअरमुळे बँक आणि विमा कंपन्या ही सुविधा थेट त्यांच्या ॲपमध्ये जोडू शकतील. यामुळे ग्राहकांना पडताळणी करताना एका ॲपमधून दुसऱ्या ॲपमध्ये जाण्याचा त्रास कमी होईल.

ही आधार कार्डमध्ये जोडलेली कोणतीही नवीन सुविधा नाही, हे लक्षात घेणं गरजेचं आहे. कंपन्यांना त्यांच्या सिस्टीममध्ये आधार फेस ऑथेंटिकेशन सहज जोडता यावं, यासाठी UIDAI ने दिलेली ही एक तांत्रिक मदत आहे. आधार काढताना घेतलेला फोटो आणि तुमचा आत्ताचा चेहरा यांची तुलना करून ओळख पटवली जाते, असं UIDAI ने स्पष्ट केलं आहे. यासाठी ग्राहकाची परवानगी घेणं बंधनकारक असतं.

नव्या सुविधा

बँकेत खातं उघडणं, विमा आणि इतर आर्थिक सेवांसाठी ही नवीन सुविधा खूप फायदेशीर ठरेल. सध्या आधार पडताळणी करणाऱ्या कंपन्या वेगवेगळ्या पद्धती वापरतात. पण UIDAI च्या या नवीन सॉफ्टवेअरमुळे कंपन्यांना त्यांच्याच ॲपमध्ये चेहरा स्कॅन करण्याची आणि पडताळणी करण्याची सुविधा देता येईल.

याशिवाय, नवीन टेस्टिंग प्लॅटफॉर्ममुळे कंपन्यांना ही सुविधा ग्राहकांसाठी सुरू करण्यापूर्वी तिची चाचणी घेता येईल. UIDAI च्या डेव्हलपर प्लॅटफॉर्मनुसार, कंपन्यांना त्यांच्या ॲपमध्ये आधार पडताळणी सेवा तपासून पाहण्यासाठी हे टेस्टिंग प्लॅटफॉर्म बनवलं आहे. यामध्ये चेहरा अचूक स्कॅन करणं, ग्राहकाची परवानगी घेणं आणि पडताळणी करणं या गोष्टींची चाचणी कंपन्या करू शकतात.

या नवीन सॉफ्टवेअरमध्ये आर्टिफिशियल इंटेलिजन्स (AI) आणि मशीन लर्निंगवर (ML) आधारित 'लाइव्हनेस डिटेक्शन' तंत्रज्ञान वापरलं आहे. खोटे फोटो किंवा व्हिडिओ दाखवून फसवणूक करण्याचे प्रकार रोखणं, हा यामागचा उद्देश आहे. तसेच, चेहऱ्याचा डेटा सुरक्षित ठेवण्याची सुविधाही यात असल्याचं UIDAI ने सांगितलं आहे. त्यामुळे हे नवीन तंत्रज्ञान फक्त ग्राहकांसाठीच नाही, तर आधार पडताळणी वापरणाऱ्या कंपन्यांसाठीही खूप महत्त्वाचं आहे.

फायदा

याचा सर्वसामान्यांना सर्वात मोठा फायदा म्हणजे, आधारद्वारे चेहरा पडताळणी करण्याची प्रक्रिया हळूहळू खूप सोपी होईल. विशेषतः बँक आणि विमा सेवांमध्ये जेव्हा चेहऱ्याची पडताळणी करावी लागते, तेव्हा ही सुविधा त्यांच्या ॲपमध्ये आल्यास काम जलद आणि एकाच ठिकाणी होईल. पण "आता बँक किंवा विमा ॲप्ससाठी वेगळं आधार फेस ॲप उघडण्याची गरजच नाही", असं आत्ताच ठामपणे सांगता येणार नाही.

कोणती कंपनी हे नवीन तंत्रज्ञान त्यांच्या सेवेत कधी जोडते, यावर ग्राहकांचा अनुभव अवलंबून असेल. UIDAI च्या सध्याच्या प्रश्न-उत्तर (Q&A) विभागात अजूनही फेस ऑथेंटिकेशनसाठी 'आधार फेस ॲप'ची गरज असल्याचं म्हटलं आहे. त्यामुळे "आता कोणालाच वेगळ्या ॲपची गरज नाही" असा गैरसमज करून घेण्यापेक्षा, कंपन्यांना त्यांच्या सेवेत फेस ऑथेंटिकेशन जोडणं सोपं जावं म्हणून UIDAI ने हे तंत्रज्ञान दिलं आहे, हे समजून घेणं योग्य ठरेल.

आधार फेस ऑथेंटिकेशन वापरताना नेहमी अधिकृत कंपनीचं ॲप किंवा वेबसाईटच वापरा. अनोळखी किंवा थर्ड-पार्टी ॲप्सवर आधारची माहिती देणं टाळा, जेणेकरून तुमचा डेटा सुरक्षित राहील. हे नवीन तंत्रज्ञान सर्वत्र वापरलं जाऊ लागल्यावर, आधारद्वारे होणारी ऑनलाइन पडताळणी नक्कीच अधिक सोपी होईल.