TV AC Fridge Price Hike : सणासुदीच्या आधीच ग्राहकांना शॉक; टीव्ही, एसी, फ्रिज महागणार

TV, AC Price Hike : आयुध पूजा आणि दिवाळीसारखे सण जवळ आले असतानाच ग्राहकांना मोठा धक्का बसला आहे. एसी, टीव्ही आणि फ्रिजसारख्या इलेक्ट्रॉनिक वस्तूंच्या किमती वाढणार असल्याची माहिती समोर आली आहे.

टीव्ही, एसी, फ्रिजच्या किमतीत मोठी वाढ

ऑक्टोबर महिन्यात आयुध पूजा आणि त्यानंतर दिवाळी येणार आहे. या सणासुदीच्या सीझनआधीच ग्राहकांना मोठा धक्का बसणार आहे. एसी, एलईडी टीव्ही, वॉशिंग मशीन आणि फ्रिजसारख्या घरगुती वस्तूंच्या किमतीत मोठी वाढ होणार आहे. तांबे आणि लोखंडासारख्या कच्च्या मालाच्या किमती वाढल्याने आघाडीच्या इलेक्ट्रॉनिक्स कंपन्यांनी आपल्या वस्तूंचे दर ५ ते ८ टक्क्यांनी वाढवण्याची तयारी केली आहे.

किमती का वाढल्या?

तांबे, ॲल्युमिनियम, लोखंड, प्लास्टिक आणि कच्च्या तेलावर आधारित वस्तूंच्या किमती वाढल्या आहेत. याशिवाय वाहतूक खर्च आणि डॉलरच्या तुलनेत रुपयाची घसरण यामुळे किमती वाढल्याचं कंपन्यांचं म्हणणं आहे. या वर्षात इलेक्ट्रॉनिक्स कंपन्यांनी किमती वाढवण्याची ही तिसरी वेळ आहे.

एसी, फ्रिज किती महागणार?

एसीच्या किमती ५ ते ८ टक्क्यांनी वाढण्याची शक्यता आहे. तर काही कंपन्या वॉशिंग मशीन, फ्रिज आणि एलईडी टीव्हीच्या किमती ३ ते ४ टक्क्यांनी वाढवण्याचा विचार करत आहेत. काही कंपन्या अजूनही बाजारातील परिस्थितीवर लक्ष ठेवून आहेत.

किमती वाढल्या तर त्याचा थेट परिणाम विक्रीवर होईल, अशी भीती अनेक कंपन्यांना वाटते. पण डीलर्स आणि वितरकांकडे जुन्या किमतीचा स्टॉक आधीपासूनच उपलब्ध असल्याने, सध्या तरी या दरवाढीचा फटका कमी बसेल, असा अंदाज आहे.

कंपन्यांचं काय म्हणणं आहे?

ब्लू स्टार, गोदरेज अप्लायन्सेस, हायर, डायकिन आणि सुपर प्लास्ट्रोनिक्ससह अनेक कंपन्यांनी विविध वस्तूंच्या किमती वाढवण्याची घोषणा केली आहे. हिताची ब्रँडचे एसी विकणाऱ्या एलजी आणि बॉश होम कम्फर्ट कंपन्यांनीही एसीच्या किमती सुमारे ५ टक्क्यांनी वाढवल्या आहेत. पॅनासोनिक कंपनी सध्याच्या दरवाढीबाबत अजूनही विचार करत आहे.

याबाबत ब्लू स्टार कंपनीचे एमडी बी. त्यागराजन म्हणाले, 'कच्च्या मालाच्या किमती वाढल्याने आम्ही एसी आणि डीप फ्रीझरच्या किमती ५ ते ८ टक्क्यांनी आधीच वाढवल्या आहेत. तांबे, लोखंड आणि प्लास्टिक महागल्याने या वर्षात आतापर्यंत ३ वेळा किमती वाढवाव्या लागल्या आहेत.'

गोदरेज एंटरप्रायजेस ग्रुपचे बिझनेस हेड कमल नंदी यांनी सांगितलं की, 'कच्च्या मालाच्या किमती ८ ते १० टक्क्यांनी वाढल्या आहेत. त्यामुळे अनेक वस्तूंच्या किमती ५ ते ७ टक्क्यांनी वाढवणं अटळ आहे. तरीही, जुन्या किमतीचा स्टॉक अजून दीड महिना बाजारात उपलब्ध राहील.' सणासुदीचा काळ जवळ आला असताना टीव्ही, एसी आणि फ्रिजच्या किमती वाढल्याने सर्वसामान्यांना मोठा धक्का बसला आहे.