Toyota Recall: कंपनीने भारतातील 969 लँड क्रूझर 300 SUV परत मागवल्या! कारण काय?

Toyota Recall: प्रसिद्ध कार कंपनी टोयोटाने भारतातील आपल्या 969 लँड क्रूझर 300 SUV गाड्या परत मागवल्या आहेत. गाडीच्या ट्रान्समिशन कंट्रोल कॉम्प्युटर सॉफ्टवेअरमध्ये तांत्रिक अडचण आल्याने हा निर्णय घेतला. कंपनी हे सॉफ्टवेअर मोफत अपडेट करून देणार आहे.

Toyota Recall: टोयोटा ही जपानची प्रमुख वाहन उत्पादक कंपनी असून भारतात ती 'टोयोटा किर्लोस्कर मोटर' (TKM) या नावाने कार्य करते. विश्वासार्हता, मजबुती आणि सुरक्षिततेसाठी प्रसिद्ध असलेल्या टोयोटाच्या इनोव्हा, फॉर्च्युनर आणि ग्लान्झा या गाड्या भारतात अत्यंत लोकप्रिय आहेत. 2023 -2025 या दरम्यान कंपनीने नवीन हायब्रीड मॉडेल्स आणि SUV वर लक्ष केंद्रित केले होते. टोयोटाने मारुती सुझुकीशी भागीदारी (Cross-badging) करून भारतीय बाजारपेठेवरील आपली पकड मजबूत केली आहे.

प्रसिद्ध जपानी कार कंपनी टोयोटाने (Toyota) भारतात एक मोठी घोषणा केली आहे. कंपनी आपली प्रीमियम SUV, लँड क्रूझर 300 (Land Cruiser 300) च्या 969 गाड्या परत मागवत आहे. कंपनीने दिलेल्या माहितीनुसार, 4 सप्टेंबर 2024 ते 30 सप्टेंबर 2025 दरम्यान तयार झालेल्या गाड्यांमध्ये ही समस्या असू शकते. गाडीच्या ट्रान्समिशन कंट्रोल कॉम्प्युटर सॉफ्टवेअरमधील तांत्रिक बिघाड हे या रिकॉलमागचं मुख्य कारण आहे. हे सॉफ्टवेअर गाडीचे गिअर शिफ्टिंग आणि ट्रान्समिशनचं काम कसं चालेल हे ठरवतं. त्यामुळे यात काही गडबड झाली, तर त्याचा थेट परिणाम गाडीच्या ड्रायव्हिंगवर होतो.

नेमकं काय झालंय?

सोप्या भाषेत सांगायचं तर, या गाडीत 10-स्पीड ऑटोमॅटिक ट्रान्समिशन आहे. काही विशिष्ट ड्रायव्हिंग परिस्थितीत, एका सॉफ्टवेअर प्रॉब्लेममुळे ट्रान्समिशन कंट्रोल युनिट आणि इंजिन ECU मध्ये ताळमेळ बिघडतो. जर ही समस्या वेळीच दुरुस्त केली नाही, तर गाडीचे गिअर्स खराब होण्याची शक्यता आहे. म्हणूनच, एक खबरदारीचा उपाय म्हणून टोयोटाने या गाड्या तपासून सॉफ्टवेअर अपडेट करण्याचा निर्णय घेतला आहे.

ऑईल गळतीचाही धोका

या समस्येकडे दुर्लक्ष करणं महागात पडू शकतं. सॉफ्टवेअर ठीक केलं नाही, तर हाय-स्पीडवर गाडी चालवताना अचानक पॉवर कमी होऊ शकते किंवा ट्रान्समिशनला मोठं नुकसान होऊ शकतं. गंभीर परिस्थितीत, ट्रान्समिशनच्या बाहेरील भागाला (housing) तडे जाऊन ऑईल गळती सुरू होऊ शकते, ज्यामुळे संपूर्ण सिस्टीम फेल होऊ शकते. पण एक दिलासादायक गोष्ट म्हणजे, भारतात या बिघाडामुळे कोणताही अपघात किंवा नुकसान झाल्याची नोंद नाही. लेक्सस एलएक्स (Lexus LX) गाडीतही हेच ट्रान्समिशन वापरलं जातं, त्यामुळे त्यातही हीच समस्या आढळून आली आहे.

कंपनी मोफत दुरुस्ती करून देणार

टोयोटा लँड क्रूझर 300 ची भारतातील एक्स-शोरूम किंमत जवळपास 2.15 कोटी रुपयांपासून सुरू होते. यात 3.3-लिटर V6 टर्बो डिझेल इंजिन आहे, जे 304 bhp पॉवर निर्माण करतं. कंपनीने स्पष्ट केलं आहे की, ज्या ग्राहकांच्या गाड्यांमध्ये ही समस्या आहे, त्यांच्याशी संपर्क साधला जाईल. तुमच्याकडेही या काळात बनवलेली लँड क्रूझर असेल, तर तुम्ही तुमच्या जवळच्या टोयोटा डीलरशी संपर्क साधू शकता. किंवा अधिक माहितीसाठी तुम्ही कस्टमर केअरला फोन करू शकता. कंपनी हे सॉफ्टवेअर अपडेट पूर्णपणे मोफत करून देणार आहे.