Bike Maintenance: बाईक-स्कूटर रस्त्यात बंद पडू नये म्हणून या गोष्टी लक्षात ठेवा

Bike Maintenance: तुमची बाईक किंवा स्कूटर वारंवार खराब होऊ नये असं वाटत असेल, तर नियमित सर्व्हिसिंग, वेळेवर इंजिन ऑईल बदलणं, एअर फिल्टर साफ करणं आणि टायरची योग्य काळजी घेणं खूप महत्त्वाचं आहे. टायरमधील हवेचा दाब वेळोवेळी तपासणे आवश्यक आहे.

Bike Maintenance: हल्ली लहान मोठ्या शहरांमध्ये घरटी एखाद दोन बाईक किंवा स्कूटी असतात. सार्वजनिक वाहतूक व्यवस्थेपेक्षा स्वत:कडे जर गाडी असेल तर वेळेची बचत तर होतेच शिवाय आपल्या सोयीने प्रवासाला निघता येते. मात्र अनेकदा घाईच्या वेळी किंवा एखाद्या महत्त्वाच्या कामाला जाताना आपली ही गाडी बंद पडल्याचा अनुभव अनेकांनी घेतला असेल. त्यावेळी होणारी चिडचिड, हतबलता आणि कामाला होणारा उशीर टाळणे खरंतर आपल्याच हातात असते. कसे ते जाणून घेऊया…

तुमच्याकडे बाईक किंवा स्कूटर असेल आणि ती ऐनवेळी, विशेषतः निर्मनुष्य ठिकाणी बंद पडत असेल, तर खूप चिडचिड होते. पण काही सोप्या सवयी लावून घेतल्यास, तुमची गाडी जास्त काळ चांगली आणि विश्वासार्ह राहू शकते. चला, याबद्दल सविस्तर जाणून घेऊया.

सर्व्हिसिंगला उशीर करू नका

तुमच्या बाईक किंवा स्कूटरची नियमित सर्व्हिसिंग करणं खूप गरजेचं आहे. वेळेवर सर्व्हिसिंग केल्यामुळे लहान-सहान समस्या लवकर लक्षात येतात आणि मोठे बिघाड टाळता येतात. सर्व्हिसिंग नेहमी अधिकृत सर्व्हिस सेंटरमध्येच करा. सर्व्हिसिंगच्या वेळी इंजिन ऑईल बदलणं महत्त्वाचं आहे, कारण यामुळे इंजिन स्मूथ चालतं. दर 1500-2000 किलोमीटरवर किंवा जेव्हा ऑईल काळं पडेल किंवा कमी होईल, तेव्हा ते तपासून बदला. तसेच, गाडीच्या चेनची सेटिंग आणि ल्युब्रिकेशनही नियमितपणे तपासा.

एअर फिल्टरची स्वच्छता

एअर फिल्टर साफ करण्याकडे कधीही दुर्लक्ष करू नका. खराब एअर फिल्टरमुळे इंजिनच्या परफॉर्मन्सवर परिणाम होतो आणि गाडी जास्त पेट्रोल पिते. गाडी उत्तम चालावी यासाठी तो नियमितपणे स्वच्छ करणं आवश्यक आहे.

स्पार्क प्लग तपासा

इंजिन सुरू होण्यात समस्या येत असेल, तर अनेकदा खराब स्पार्क प्लग हे कारण असतं. त्यामुळे, दर 1500-2000 किलोमीटरवर स्पार्क प्लगची स्थिती तपासा आणि गरज वाटल्यास ते बदला.

बॅटरीवर लक्ष ठेवा

तुमच्या बाईक किंवा स्कूटरची बॅटरी वेळोवेळी तपासणंही महत्त्वाचं आहे. बॅटरीमध्ये काही गळती (leakage) किंवा इतर समस्या आहेत का ते पाहा. काही अडचण दिसल्यास, लगेच दुरुस्त करून घ्या.

टायर आणि व्हीलची काळजी

आठवड्यातून किमान एकदा तरी तुमच्या टायरमधील हवेचा दाब (pressure) तपासा. कमी दाबामुळे गाडीच्या कामगिरीवर परिणाम होतो. याशिवाय, तुमच्या चाकांचं बॅलन्सिंगही वेळोवेळी करून घ्या. टायर झिजले असतील किंवा त्यांना तडे गेले असतील, तर ते लगेच बदला.