Best 7 Seater Cars : 15 लाखांच्या आत मिळणाऱ्या बेस्ट 7 सीटर कार्स

भारतात १५ लाखांपेक्षा कमी बजेटमध्ये मिळणाऱ्या बेस्ट ७ सीटर कार्सबद्दल आपण इथे जाणून घेणार आहोत. निस्सान ग्रॅव्हिटास, रेनॉल्ट ट्रायबर, महिंद्रा बोलेरो आणि मारुती सुझुकी अर्टिगा या मॉडेल्सचे फीचर्स आणि किमती यात सांगितल्या आहेत. मोठ्या कुटुंबांसाठी या कार्स एकदम परफेक्ट आणि आरामदायी आहेत.

मुंबई : भारतात मोठ्या कुटुंबांसाठी ७ सीटर कार्सना सध्या जबरदस्त डिमांड आहे. जास्त लोक बसण्याची सोय आणि प्रवासातील आराम यामुळे फॅमिली ट्रिपसाठी या कार्स एकदम परफेक्ट मानल्या जातात. तुमचं बजेट जर १५ लाखांच्या आत असेल आणि नवीन ७ सीटर कार घेण्याचा विचार करत असाल, तर मारुती सुझुकी, रेनॉल्ट, निस्सान आणि महिंद्रा या कंपन्यांचे मॉडेल्स तुम्ही नक्कीच पाहू शकता.

निस्सान ग्रॅव्हिटास आणि रेनॉल्ट ट्रायबर

निस्सान ग्रॅव्हिटास आणि रेनॉल्ट ट्रायबर या दोन्ही कार्स एकाच प्लॅटफॉर्मवर बनवल्या आहेत. या दोन्ही मॉडेल्समध्ये १.० लिटरचं ३-सिलिंडर पेट्रोल इंजिन दिलंय, जे ७१ bhp पॉवर आणि ९६ Nm टॉर्क जनरेट करतं. यात ५-स्पीड मॅन्युअल आणि ५-स्पीड AMT गिअरबॉक्सचे पर्याय मिळतात. ग्रॅव्हिटासमध्ये कंपनीकडूनच CNG किट बसवून मिळतं, तर ट्रायबरमध्ये तुम्हाला डीलरकडून किंवा बाहेरून CNG किट बसवून घ्यावं लागतं. या दोन्ही कार्सचं सर्वात मोठं वैशिष्ट्य म्हणजे यातली तिसऱ्या रांगेतील सीट तुम्ही पूर्णपणे काढू शकता. दुसरी रांग दुमडली तर बूट स्पेस थेट १००० लिटरच्या वर जातो. याशिवाय ८ इंचाचा टचस्क्रीन, वायरलेस ॲपल कारप्ले, अँड्रॉइड ऑटो, क्रूझ कंट्रोल, ऑटोमॅटिक हेडलॅम्प्स आणि रेन-सेन्सिंग वायपर्स असे भन्नाट फीचर्स यात दिले आहेत. मुंबईत ग्रॅव्हिटासची ऑन-रोड किंमत ₹६.८७ लाख ते ₹१०.८० लाखांपर्यंत आहे, तर ट्रायबरची किंमत ₹६.८१ लाख ते ₹१०.१५ लाखांच्या घरात आहे.

महिंद्रा बोलेरो

MPV ऐवजी एखादी दमदार ७ सीटर SUV तुम्हाला हवी असेल, तर महिंद्रा बोलेरो हा एक उत्तम पर्याय आहे. या गाडीत १.५ लिटरचं ३-सिलिंडर टर्बो डिझेल इंजिन दिलंय, जे ७५ bhp पॉवर आणि २१० Nm टॉर्क देतं. यात ५-स्पीड मॅन्युअल गिअरबॉक्स आणि रिअर-व्हील ड्राईव्ह सिस्टीम मिळते. यातील लॅडर-फ्रेम चेसिसमुळे खराब रस्त्यांवरही ही गाडी जबरदस्त परफॉर्मन्स देते. ७ इंचाचा टचस्क्रीन, डिजिटल इन्स्ट्रुमेंट क्लस्टर, पॉवर स्टिअरिंग, पॉवर विंडोज, सेंट्रल लॉकिंग, स्टिअरिंग माऊंटेड कंट्रोल्स, दुमडता येणारी तिसरी रांग आणि लेदरेट सीट्स हे याचे मुख्य फीचर्स आहेत. मुंबईत या गाडीची ऑन-रोड किंमत ₹१०.१६ लाख ते ₹११.९१ लाखांच्या दरम्यान आहे.

मारुती सुझुकी अर्टिगा

१५ लाखांच्या बजेटमध्ये मारुती सुझुकी अर्टिगा ही आणखी एक लोकप्रिय ७ सीटर कार आहे. या गाडीत १.५ लिटरचं ४-सिलिंडर K15C स्मार्ट हायब्रिड पेट्रोल इंजिन मिळतं. हे इंजिन १०१ bhp पॉवर आणि १३९ Nm टॉर्क जनरेट करतं. यात ५-स्पीड मॅन्युअल आणि ६-स्पीड ऑटोमॅटिक गिअरबॉक्सचे पर्याय उपलब्ध आहेत. कंपनीच्या S-CNG व्हेरियंटमध्ये फक्त मॅन्युअल गिअरबॉक्स मिळतो. ऑटोमॅटिक क्लायमेट कंट्रोल, पुश-बटण स्टार्ट, क्रूझ कंट्रोल, रिअर पार्किंग कॅमेरा आणि ७ इंचाचा स्मार्टप्ले प्रो टचस्क्रीन असे आधुनिक फीचर्स यात दिले आहेत. दुसऱ्या रांगेत वन-टच टंबल आणि स्लाईड सीट्स, छतावर दिलेले AC व्हेंट्स आणि मागे USB-C चार्जिंग पोर्ट यांसारख्या सुविधाही मिळतात. मुंबईत अर्टिगाची ऑन-रोड किंमत ₹१०.४५ लाख ते ₹१५.४७ लाखांपर्यंत जाते.