Safest Hatchback Cars : कमी किंमत म्हणून दुर्लक्ष करू नका; फॅमिलीसाठी ५-स्टार सेफ्टी असलेल्या या कार्स आहेत बेस्ट!

नवीन कार घेताना फक्त मायलेज आणि किंमत न पाहता सेफ्टीलाही महत्त्व देणं गरजेचं आहे. टाटा अल्ट्रोज आणि पंचला ५-स्टार सेफ्टी रेटिंग मिळालंय, तर स्विफ्ट, बलेनो, टियागो आणि i20 चे स्वतःचे असे खास फीचर्स आहेत. तुमचं बजेट आणि सुरक्षितता तपासूनच योग्य कारची निवड करा.

मुंबई : कार घेताना आपण किंमत, मायलेज आणि फीचर्ससोबतच सेफ्टीलाही प्राधान्य दिलं पाहिजे. विशेषतः फॅमिलीसाठी कार घेताना बिल्ड क्वालिटी आणि क्रॅश टेस्ट रेटिंग चांगलं असलेल्या मॉडेल्सची निवड करणं खूप महत्त्वाचं असतं. भारतीय बाजारात सध्या अनेक हॅचबॅक कार्स उपलब्ध आहेत, पण सेफ्टीच्या बाबतीत काही मॉडेल्स एकदम आघाडीवर आहेत.

टाटा अल्ट्रोज; ५-स्टार सेफ्टी

भारतातील लोकप्रिय प्रीमियम हॅचबॅक कार्समध्ये टाटा अल्ट्रोजचं नाव आवर्जून घेतलं जातं. ग्लोबल NCAP आणि भारत NCAP या दोन्ही क्रॅश टेस्टमध्ये या कारने ५-स्टार सेफ्टी रेटिंग मिळवलं आहे. सेफ्टीला महत्त्व देणाऱ्या ग्राहकांच्या फेव्हरेट लिस्टमध्ये अल्ट्रोज नेहमीच पहिल्या नंबरवर असते. ही कार पेट्रोल, डिझेल आणि सीएनजी अशा तिन्ही पर्यायांमध्ये उपलब्ध आहे. आकर्षक डिझाईन, मजबूत बिल्ड क्वालिटी आणि इंजिनचे विविध पर्याय हे या कारचे प्लस पॉईंट्स आहेत. सिटी ड्राईव्ह आणि लॉंग ड्राईव्ह या दोन्हीसाठी ही हॅचबॅक एकदम परफेक्ट आहे.

५-स्टार सेफ्टीसह टाटा पंच

सामान्य हॅचबॅक कार्सपेक्षा थोडी वेगळी असलेली मायक्रो एसयूव्ही डिझाईन हे टाटा पंचचं मुख्य आकर्षण आहे. कॉम्पॅक्ट साईझसोबतच रफ अँड टफ लूक आणि उंच सीटिंग पोझिशन या कारमध्ये मिळते. ग्लोबल NCAP आणि भारत NCAP मध्ये पंचनेही ५-स्टार सेफ्टी रेटिंग मिळवलं आहे. बेंगळुरूसारख्या ट्रॅफिक असलेल्या रस्त्यांवर आणि अरुंद गल्ल्यांमध्ये ही कार सहज हँडल करता येते. सीटिंग पोझिशन उंच असल्यामुळे ड्रायव्हरला पुढचा रस्ता आणि ट्रॅफिक एकदम क्लिअर दिसतं.

स्विफ्ट, बलेनो, टियागो आणि i20 ची काय स्थिती आहे?

मारुती सुझुकी स्विफ्ट, बलेनो, टाटा टियागो आणि ह्युंदाई i20 या हॅचबॅक कार्सनाही भारतीय बाजारात जबरदस्त डिमांड आहे. स्विफ्ट कार तिच्या मायलेज, स्मूथ ड्रायव्हिंग आणि कमी मेंटेनन्स खर्चासाठी ओळखली जाते. बलेनो ही प्रशस्त केबिन आणि मॉडर्न फीचर्स असलेली प्रीमियम हॅचबॅक आहे. बजेटमध्ये मिळणारी टाटा टियागो हा देखील एक उत्तम पर्याय आहे. ग्लोबल NCAP क्रॅश टेस्टमध्ये या कारला ४-स्टार सेफ्टी रेटिंग मिळालं आहे. तर प्रीमियम इंटिरियर, मॉडर्न डिझाईन आणि भन्नाट फीचर्स हे ह्युंदाई i20 कारचे हायलाईट्स आहेत.

कार घेताना सेफ्टी नक्की चेक करा

मायलेज आणि किंमत महत्त्वाची आहेच, पण सेफ्टीकडे अजिबात दुर्लक्ष करू नका. फॅमिलीसाठी कार घेताना क्रॅश टेस्ट रेटिंग, सेफ्टी फीचर्स आणि कोणती टेस्ट प्रोटोकॉल वापरली आहे, हे नक्की तपासून पाहा. टाटा अल्ट्रोज आणि टाटा पंचला ५-स्टार सेफ्टी रेटिंग मिळालं आहे. पण इतर कार्सच्या रेटिंगची तुलना करताना, त्यांनी कोणत्या क्रॅश टेस्टमध्ये ते रेटिंग मिळवलंय याकडे लक्ष दिलं पाहिजे. तुमचं बजेट, वापर, मायलेज, फीचर्स, सेफ्टी आणि मेंटेनन्सचा खर्च - या सगळ्या गोष्टींचा विचार करूनच योग्य कारची निवड करा.