मोठी बातमी! टोलनाक्यांवर रोख व्यवहार कायमचे बंद; १ एप्रिलपासून 'हा' नियम अनिवार्य, खिशाला बसणार कात्री?

FASTag New Rule: केंद्र सरकारने राष्ट्रीय महामार्गावरील टोलनाक्यांवर १ एप्रिलपासून रोख व्यवहार पूर्णपणे बंद करण्याचा निर्णय घेतला. आता टोल भरण्यासाठी फक्त फास्टॅग, यूपीआय या डिजिटल पर्यायांचाच वापर करता येणार आहे. 

मोठी बातमी! टोलनाक्यांवर रोख व्यवहार कायमचे बंद

पुणे : राष्ट्रीय महामार्गावरून प्रवास करणाऱ्या वाहनधारकांसाठी केंद्र सरकारने एक अत्यंत महत्त्वाचा निर्णय घेतला आहे. टोलनाक्यांवरील गर्दी कमी करण्यासाठी आणि पारदर्शकता आणण्यासाठी १ एप्रिलपासून रोख रक्कम (Cash) स्वीकारणे पूर्णपणे बंद करण्यात येणार आहे. आता टोल भरण्यासाठी केवळ डिजिटल पर्यायांचाच वापर करावा लागणार आहे. 

टोल संकलनात आता 'डिजिटल' क्रांती

भारतीय राष्ट्रीय महामार्ग प्राधिकरणाने (NHAI) घेतलेल्या या निर्णयामुळे देशातील ११५० हून अधिक टोलनाक्यांवरील वसुली प्रक्रिया आता १००% डिजिटल होणार आहे. प्रवाशांचा वेळ वाचवणे, वाहतूक कोंडी फोडणे आणि इंधनाची बचत करणे हा यामागील मुख्य उद्देश आहे. 

नव्या नियमात काय बदलले?

१ एप्रिलपासून वाहनधारकांकडे टोल भरण्यासाठी खालील दोनच पर्याय उपलब्ध असतील.

१. फास्टॅग (FASTag): जो सध्या ९८% वाहनांवर आधीच कार्यान्वित आहे.

२. यूपीआय (UPI): क्यूआर कोड स्कॅन करून पेमेंट करण्याची सुविधा. 

महत्त्वाची टीप

जर तुमच्या वाहनावर वैध फास्टॅग नसेल, तर तुम्हाला दुप्पट टोल भरावा लागेल. तसेच, यूपीआय (UPI) वापरणाऱ्यांना मूळ दराच्या १.२५ पट रक्कम मोजावी लागू शकते. त्यामुळे फास्टॅग रिचार्ज असणे हाच सर्वात स्वस्त पर्याय ठरेल. 

या निर्णयाचे फायदे काय?

वाद मिटणार: सुट्ट्या पैशांवरून टोल कर्मचाऱ्यांशी होणारे खटके आता कायमचे बंद होतील.

वेगवान प्रवास: रांगा कमी झाल्यामुळे वाहनांचा वेग कायम राहील, परिणामी प्रदूषण आणि इंधनाचा खर्च कमी होईल.

पारदर्शकता: सर्व व्यवहार डिजिटल असल्याने टोल वसुलीत पूर्ण पारदर्शकता येईल.

प्रशासनाने सर्व वाहनधारकांना आवाहन केले आहे की, १ एप्रिलपूर्वी आपल्या वाहनाचा फास्टॅग तपासून घ्यावा किंवा तो वेळेत रिचार्ज करून ठेवावा, जेणेकरून प्रवासात कोणतीही अडचण येणार नाही.