चहा की कॉफी, हाडांच्या आरोग्यासाठी काय जास्त फायदेशीर?

या अभ्यासाचे निष्कर्ष 'न्यूट्रिएंट्स' जर्नलमध्ये प्रसिद्ध झाले आहेत. संशोधकांना असे आढळून आले की, कॉफी पिणाऱ्यांच्या तुलनेत चहा पिणाऱ्यांच्या नितंबाच्या हाडांमधील खनिज घनता किंचित जास्त होती. 

गेल्या काही दिवसात वातावरणातील बदलामुळे आरोग्याच्या विविध समस्यांचा सामना करावा लागत आहेत. त्यामुळे हाडांच्याही आरोग्याच्या समस्या अनेकांना जाणवू लागल्या आहेत. त्यामुळे हाडाच्या आरोग्याबाबत आज आपण महत्त्वाची माहिती जाणून घेणार आहोत. 

हाडांच्या आरोग्यासाठी आहार महत्त्वाची भूमिका बजावतो. कॅल्शियमयुक्त पदार्थ हाडे अधिक मजबूत करतात. आपल्यापैकी बहुतेक जण दररोज चहा आणि कॉफी पितात. चहा आणि कॉफी खरोखरच हाडांच्या आरोग्यासाठी फायदेशीर आहेत का? जास्त प्रमाणात कॉफी पिणे, विशेषतः पाच किंवा त्याहून अधिक कप, हाडांवर प्रतिकूल परिणाम करू शकते.

ऑस्ट्रेलियातील फ्लिंडर्स युनिव्हर्सिटीच्या संशोधकांनी हा अभ्यास केला. त्यांनी 65 वर्षे आणि त्याहून अधिक वयाच्या सुमारे 10,000 महिलांच्या अभ्यासातील डेटाचे निरीक्षण केले. त्यांनी चहा आणि कॉफीचे सेवन आणि नितंब व मांडीच्या हाडांमधील खनिज घनता यांची नोंद केली. हे असे भाग आहेत जिथे हिप फ्रॅक्चर झाल्यास तुटण्याची शक्यता जास्त असते.

या अभ्यासाचे निष्कर्ष 'न्यूट्रिएंट्स' जर्नलमध्ये प्रसिद्ध झाले आहेत. संशोधकांना असे आढळून आले की, कॉफी पिणाऱ्यांच्या तुलनेत चहा पिणाऱ्यांच्या नितंबाच्या हाडांमधील खनिज घनता किंचित जास्त होती. मात्र, दिवसातून दोन ते तीन कप कॉफीचे माफक सेवन केल्यास हाडांच्या खनिज घनतेवर कोणताही प्रतिकूल परिणाम झाला नाही. पण अभ्यासात असे म्हटले आहे की, पाच किंवा त्याहून अधिक कप कॉफी प्यायल्याने हाडांची खनिज घनता कमी होऊ शकते.

हाडांची खनिज घनता कमी झाल्यामुळे ऑस्टिओपोरोसिसचा धोका वाढतो. तसेच, जसजसे वय वाढते, तसतशी हाडे पातळ होतात, ज्यामुळे फ्रॅक्चर होण्याची शक्यता वाढते. संशोधकांच्या मते, सुमारे 19 दशलक्ष अमेरिकन लोकांना ऑस्टिओपोरोसिस आहे. 2016 मध्ये PLOS ONE मध्ये प्रकाशित झालेल्या एका अभ्यासानुसार, कॉफी पिण्याचा संबंध ऑस्टिओपोरोसिसच्या कमी जोखमीशी आहे. संशोधकांचे म्हणणे आहे की चहा आणि कॉफी दोन्ही हाडांच्या आरोग्यासाठी फायदेशीर ठरू शकतात.