Tata Harrier EV : बहुप्रतिक्षित टाटा हॅरियर EV ची किंमत जाहीर, ६२७ किमी असेल मायलेज!

टाटा मोटर्सची हॅरियर EV बाजारात धुम करणार असल्याचे दिसून येत आहे. तिची किंमतही जाहीर झाली आहे. परवडणाऱ्या दरात मिळणारी ही गाडी एकदा चार्ज केल्यावर तब्बल ६२७ किलोमीटर मायलेज देणार आहे. जाणून घ्या या गाडीचे फिचर्स, किंमत आणि इतर महत्त्वाची माहिती.

टाटा मोटर्सने नुकतीच त्यांची नवीन इलेक्ट्रिक SUV, टाटा हॅरियर EV लाँच केली आहे. अजून तिचे बुकिंग सुरु व्हायचे आहे. आता हॅरियर EV च्या RWD व्हेरियंटच्या किमती जाहीर झाल्या आहेत. एकदा चार्ज केल्यावर तब्बल ६२७ किलोमीटर मायलेज देणारी ही गाडी २१.४९ लाख रुपयांपासून उपलब्ध असेल. २ जुलै २०२५ पासून अधिकृत बुकिंग सुरू होईल. क्वाड व्हील ड्राइव्ह (QWD) व्हेरियंटच्या किमती २७ जून रोजी जाहीर होतील.

टाटा हॅरियर EV RWD व्हेरियंटची किंमत

टाटा हॅरियर EV अ‍ॅडव्हेंचर ६५ : २१.४९ लाख रुपये

टाटा हॅरियर EV अ‍ॅडव्हेंचर S ६५: २१.९९ लाख रुपये

टाटा हॅरियर EV फिअरलेस + ६५: २३.९९ लाख रुपये

टाटा हॅरियर EV फिअरलेस + ७५: २४.९९ लाख रुपये

टाटा हॅरियर EV एम्पॉवर्ड ७५ : २७.४९ लाख रुपये

हॅरियर EV मध्ये डिझेल व्हेरियंटप्रमाणेच DRL आणि हेडलॅम्प आहेत. पण नवीन ग्रिल आणि बंपर वेगळा लूक देतो. शार्प क्रीज आणि क्लीन लाइन्स आहेत. LED DRL स्ट्रीप आकर्षक दिसते. या सेगमेंटमध्ये पहिल्यांदाच १४.५३ इंचाचा QLED टचस्क्रीन इन्फोटेनमेंट सिस्टम, डॉल्बी अ‍ॅटमॉससह १०-स्पीकर JBL ब्लॅक साउंड सिस्टम आहे. फ्रिक्वेन्सी डिपेंडंट डॅम्पिंग तंत्रज्ञानासह सस्पेंशन सेटअपही आहे. ई-वॅलेट ऑटो पार्क असिस्ट, डिजिटल की (डिजि अ‍ॅक्सेस), टाटा ड्राइव्हपे इंटरफेस अशी फीचर्स आहेत.

इलेक्ट्रिक हॅरियरच्या बॅटरीचे स्पेसिफिकेशन्स व्हेरियंटनुसार बदलतात. ६५kWh आणि ७५kWh बॅटरी पॅक उपलब्ध आहेत. बेस व्हेरियंटमध्ये ६५ kWh बॅटरी पॅक आणि २३८ PS इलेक्ट्रिक मोटर आहे. टॉप व्हेरियंटमध्ये ड्युअल-मोटर सेटअप आहे, ज्यात फ्रंट व्हील मोटर १५८ PS पॉवर देते. एकूण ५०४ Nm टॉर्क मिळतो. ६.३ सेकंदात ०-१०० kmph वेग गाठू शकते.

७५kWh बॅटरी पॅक एका चार्जवर ६२७ किमी रेंज देतो असा कंपनीचा दावा आहे. प्रत्यक्षात ४८०-५०५ किमी रेंज मिळण्याची अपेक्षा आहे. १२० kW DC फास्ट चार्जिंग सपोर्ट आहे, ज्यामुळे २५ मिनिटांत २०-८०% चार्ज होते. १५ मिनिटांत २५० किमी रेंज मिळू शकते. हॅरियर EV च्या बॅटरीवर लाइफटाइम वॉरंटी आहे. हुंडाई क्रेटा इलेक्ट्रिक, महिंद्रा XUV9e, आणि BE.06 सारख्या गाड्यांशी स्पर्धा आहे.