PNG Connection: घरात PNG कनेक्शन घ्यायचंय?, खर्च, कागदपत्रं आणि संपूर्ण प्रक्रिया जाणून घ्या

PNG Connection: सरकार देशभरात पाईप गॅसचं जाळं वेगाने पसरवत आहे. तुम्हालाही घरात PNG कनेक्शन घ्यायचं असेल, तर अर्ज कसा करायचा, तुमच्या भागात सुविधा आहे की नाही हे कसं तपासायचं, खर्च किती येतो आणि कोणती कागदपत्रं लागतात, याची माहिती जाणून घ्या.

जिथे तांत्रिकदृष्ट्या PNG बसवणे शक्य नाही, तिथे मात्र सूट मिळेल

सरकार ऊर्जा वापरामध्ये विविधता आणण्यासाठी पाईप गॅस नेटवर्कच्या कामाला वेग देत आहे. ज्या भागात PNG उपलब्ध आहे, तिथे LPG सिलेंडरचा पुरवठा बंद केला जाऊ शकतो. पर्शियन आखातातील युद्धामुळे निर्माण झालेल्या तुटवड्याच्या पार्श्वभूमीवर, सरकार PNG ला एक अधिक विश्वासार्ह इंधन म्हणून प्रोत्साहन देत आहे. पेट्रोलियम आणि नैसर्गिक वायू मंत्रालयाच्या २४ मार्च रोजी प्रसिद्ध झालेल्या 'नैसर्गिक वायू आणि पेट्रोलियम उत्पादने वितरण आदेश, २०२६' नुसार, PNG उपलब्ध असूनही कनेक्शन न घेतल्यास तीन महिन्यांनंतर LPG सेवा बंद केली जाईल. जिथे तांत्रिकदृष्ट्या PNG बसवणे शक्य नाही, तिथे मात्र सूट मिळेल.

PNG कनेक्शन मिळवण्याची प्रक्रिया

स्टेप १: तुमच्या भागात PNG आहे का, तपासा

सर्वात आधी तुमच्या परिसरात PNG सेवा उपलब्ध आहे की नाही, हे तपासा. वितरकाच्या वेबसाइटवर जाऊन तुम्ही पिन कोड टाकून ही माहिती मिळवू शकता.

स्टेप २: अर्ज करण्याची पद्धत

तुम्ही ऑनलाइन किंवा वितरकाच्या कार्यालयात जाऊन ऑफलाइन अर्ज करू शकता. यासाठी ओळखपत्र, पत्त्याचा पुरावा आणि घराच्या मालकीची कागदपत्रं लागतील.

स्टेप ३: खर्चाचा अंदाज

यामध्ये मोठा खर्च रिफंडेबल सिक्युरिटी डिपॉझिटचा असतो. उदाहरणार्थ, IGL कंपनी वापराच्या अंदाजानुसार साधारणपणे ५,००० ते १०,००० रुपये डिपॉझिट घेते.

स्टेप ४: इन्स्टॉलेशनसाठी लागणारा वेळ

अर्ज मंजूर झाल्यावर जागेची पाहणी केली जाते. त्यानंतर पाइपलाइन आणि मीटर बसवून सुरक्षेची चाचणी होते. ज्या भागात पाइपलाइन आधीच आहे, तिथे ७-१५ दिवसांत कनेक्शन सुरू होऊ शकतं.

PNG कनेक्शनसाठी आवश्यक कागदपत्रं

• ओळखपत्राचा पुरावा: आधार कार्ड, पॅन कार्ड, मतदार ओळखपत्र, पासपोर्ट किंवा ड्रायव्हिंग लायसन्स.
• पत्त्याचा पुरावा: वीज किंवा BSNL चं ताजं बिल, भाडेकरार, रेशन कार्ड किंवा प्रॉपर्टी टॅक्सची पावती.
• मालकी हक्काची कागदपत्रं: सेल डीड, नोंदणीकृत मालकीची कागदपत्रं, सोसायटीचं प्रमाणपत्र किंवा टॅक्सची पावती.
• भाडेकरूंसाठी: घरमालकाकडून घेतलेलं ना-हरकत प्रमाणपत्र (NOC) आणि सोबत घराच्या मालकीची कागदपत्रं.
• फोटो: पासपोर्ट आकाराचे फोटो.