SBI Rules : महिन्यातून फक्त ४ वेळा मोफत पैसे काढता येणार, नंतर प्रत्येकवेळी चार्ज लागणार; नवा नियम काय?

SBI New Rule : स्टेट बँक ऑफ इंडियाने (SBI) बेसिक सेव्हिंग्ज बँक डिपॉझिट (BSBD) खातेधारकांसाठी सेवा शुल्कात मोठे बदल केले आहेत. १ ऑक्टोबरपासून लागू होणाऱ्या या नव्या नियमांनुसार, महिन्यातून फक्त चार वेळाच मोफत पैसे काढता येणार आहेत.

मुंबई : स्टेट बँक ऑफ इंडियाने (SBI) आपल्या बेसिक सेव्हिंग्ज बँक डिपॉझिट (BSBD) खातेधारकांसाठी सेवा शुल्काशी संबंधित काही नवीन नियम जाहीर केले आहेत. हे नवीन नियम १ ऑक्टोबरपासून लागू होणार आहेत.

पैसे काढण्यावर आता नवीन मर्यादा

नवीन नियमांनुसार, BSBD (बेसिक सेव्हिंग्ज बँक डिपॉझिट) खातेधारकांना आता महिन्यातून फक्त चार वेळाच मोफत पैसे काढता येतील. या चार मोफत व्यवहारांनंतर, प्रत्येक वेळी पैसे काढल्यावर १५ रुपये आणि त्यावर जीएसटी सेवा शुल्क म्हणून आकारला जाईल. बँकेची शाखा, एटीएम (ATM), मायक्रो-एटीएम (Micro-ATM), एईपीएस (AEPS) आणि कॅश ॲट पीओएस (Cash at POS) या सर्व ठिकाणांहून पैसे काढण्यासाठी हा नियम लागू असेल.

डिजिटल व्यवहार पूर्वीप्रमाणेच मोफत

पैसे काढण्यावर शुल्क आकारलं जात असलं तरी, डिजिटल व्यवहारांवर कोणताही परिणाम होणार नाही. SBI ने स्पष्ट केलं आहे की यूपीआय (UPI), आयएमपीएस (IMPS), एनईएफटी (NEFT) आणि आरटीजीएस (RTGS) द्वारे होणारे डिजिटल व्यवहार पूर्वीप्रमाणेच पूर्णपणे मोफत असतील. यासाठी ग्राहकांकडून कोणतेही शुल्क घेतलं जाणार नाही.

BSBD खाते म्हणजे काय?

ज्या व्यक्तीचे दुसऱ्या कोणत्याही बँकेत BSBD खातं नाही, अशी कोणतीही व्यक्ती आवश्यक केवायसी (KYC) कागदपत्रं देऊन SBI मध्ये हे खातं उघडू शकतं. हे खातं वैयक्तिक किंवा संयुक्त (Joint) स्वरूपातही उघडता येतं. या खात्यात किमान शिल्लक (Minimum Balance) ठेवण्याची कोणतीही अट नाही. तसंच, खात्यात कमाल किती रक्कम ठेवावी किंवा महिन्यातून किती रक्कम जमा करावी यावरही कोणतीही मर्यादा नाही. तुमचं सध्याचं बचत खातं (Savings Account) असंल, तर तुम्ही ते BSBD खात्यात बदलू शकता, पण त्यासाठी तुमचं दुसऱ्या कोणत्याही बँकेत असं खातं नसावं.