Government Job : सरकारी नोकरीच भारी, कमाई जास्त आणि...; २७ वर्षांच्या तरुणाची पोस्ट व्हायरल, वाचाच

आयटी सेक्टरमध्ये २५-३० लाख रुपये कमावणाऱ्या माझ्या मित्रांना जास्त भाडं आणि EMI मुळे माझ्याइतकी बचत करता येत नाही, असं या तरुणाने आपल्या पोस्टमध्ये म्हटलं आहे.

मुंबई : एका सार्वजनिक क्षेत्रातल्या कंपनीत (PSU) काम करणाऱ्या २७ वर्षांच्या तरुणाची एक सोशल मीडिया पोस्ट सध्या चांगलीच चर्चेत आहे. खासगी नोकरीपेक्षा सरकारी किंवा PSU मधली नोकरी आर्थिकदृष्ट्या कितीतरी पटीने चांगली आहे, असा दावा या तरुणाने केला आहे. वर्षाला २३ लाख रुपये पगार असूनही, विविध भत्ते आणि ग्रामीण भागात पोस्टिंग असल्यामुळे मोठी रक्कम वाचवता येत असल्याचं त्यानं म्हटलं आहे.

तो आपल्या पोस्टमध्ये लिहितो, 'माझा महिन्याचा पगार जवळपास १.३ लाख रुपये आहे, पण माझा खर्च १५,००० रुपयांपेक्षा जास्त होत नाही. कारण मला कंपनीकडून मोफत घर, गाडीसाठी इंधन, वीज आणि ऑफिसमध्ये जेवणही मोफत मिळतं.'

ग्रामीण किंवा टिअर-३ शहरांमध्ये पोस्टिंग असल्यामुळे पैसे खर्च करण्यासाठी फारसे पर्याय उपलब्ध नाहीत. विकेंडलाही करण्यासारखं काही नसल्यामुळे बचतीत आणखी भर पडते, असंही त्याने नमूद केलं आहे.

याशिवाय इतरही फायदे आहेत. जसं की, कामगिरीवर आधारित पगार (सरासरी २८,००० रुपये महिना), NPS खात्यात दरमहा १४,००० रुपये जमा होतात, अगदी कमी व्याजदरात १० लाखांपर्यंत वैयक्तिक कर्ज आणि ५० लाखांपर्यंत गृहकर्ज मिळण्याची सोय आहे.

आयटी सेक्टरमध्ये २५-३० लाख रुपये कमावणाऱ्या माझ्या मित्रांना जास्त भाडं आणि EMI मुळे माझ्याइतकी बचत करता येत नाही, असं या तरुणाने सांगितलं. भरपूर पैसे वाचत असले तरी, सरकारी नोकरीत फारसं आव्हान नसल्यामुळे मी आळशी होत चाललो आहे. त्यामुळे आता एखाद्या बिझनेस स्कूलमध्ये प्रवेश घेण्याचा विचार करत आहे, असंही त्याने पुढे म्हटलं.

या पोस्टवर अनेक लोकांनी कमेंट्स केल्या आहेत. सरकारी नोकरी जास्त सुरक्षित असते, असं अनेकांनी म्हटलं. तर काहींनी, फक्त पैसे वाचवून उपयोग नाही, माणसाला फिरायला, चांगली नाती जपायला आणि समाजात मिसळायलाही आवडतं, याकडे लक्ष वेधलं.