Galaxy A27 5G: सॅमसंगचा बाजारात मोठा धमाका! जबरदस्त AI फीचर्ससह Samsung Galaxy A27 5G भारतात लाँच; पाहा किंमत
सार
Galaxy A27 5G सॅमसंगने आपला नवीन मिड-रेंज स्मार्टफोन गॅलक्सी A27 5G भारतात आणि जागतिक बाजारात सादर केला आहे. क्वालकॉम स्नॅपड्रॅगन 6 जेन 3 प्रोसेसर, 50MP OIS कॅमेरा, दीर्घकाळ सॉफ्टवेअर सपोर्ट आणि अनेक AI फीचर्स हे या फोनचे मुख्य आकर्षण आहेत. हा फोन ३ जुलैपासून भारतात उपलब्ध होईल.
प्रसिद्ध तंत्रज्ञान कंपनी सॅमसंगने (Samsung) आपला बहुप्रतीक्षित मिड-रेंज स्मार्टफोन Galaxy A27 5G अखेर भारतात आणि जागतिक बाजारपेठेत अधिकृतपणे लाँच केला आहे. हा स्मार्टफोन कंपनीच्या गेल्या वर्षी लाँच झालेल्या अत्यंत लोकप्रिय Galaxy A26 5G चा अपग्रेडेड व्हर्जन म्हणजेच पुढचा मॉडेल आहे. आकर्षक डिझाईन आणि अत्याधुनिक तंत्रज्ञानाचा मेळ घालत सॅमसंगने हा फोन मिड-रेंज बजेटमध्ये सादर केला आहे.
अमेरिकेत गॅलक्सी A27 5G ची सुरुवातीची किंमत $349.99 आहे, म्हणजे जवळपास ३०,००० रुपये. तिथे हा फोन १४ जुलैपासून ब्लॅक रंगात विकायला सुरुवात होईल. पण चांगली बातमी ही आहे की, भारतात हा फोन ३ जुलैपासूनच उपलब्ध होणार आहे. भारतात हा फोन ब्लॅक, ब्लू, लाईट ग्रीन आणि लाईट पिंक या चार रंगांमध्ये मिळेल. मात्र, कंपनीने अजून भारतातील अधिकृत किंमत जाहीर केलेली नाही.
या फोनमध्ये ६.७ इंचाचा फुल HD+ सुपर अमोलेड इन्फिनिटी-ओ डिस्प्ले आहे. १२०Hz रिफ्रेश रेटमुळे तुम्हाला एकदम स्मूथ व्हिज्युअल अनुभव मिळेल. हा फोन अँड्रॉइड १६ वर आधारित One UI 8.5 ऑपरेटिंग सिस्टीमवर चालतो. सॅमसंगने या फोनला सहा अँड्रॉइड अपडेट्स आणि सहा वर्षांपर्यंत सिक्युरिटी अपडेट्स देण्याचं वचन दिलं आहे.
फोनला पॉवर देण्यासाठी यात ४ नॅनोमीटर टेक्नॉलॉजीवर बनलेला क्वालकॉम स्नॅपड्रॅगन ६ जेन ३ प्रोसेसर वापरला आहे. यात ८ जीबी रॅम आणि २५६ जीबीपर्यंत इंटरनल स्टोरेजचे पर्याय मिळतील. मायक्रो एसडी कार्ड वापरून तुम्ही स्टोरेज २ टीबीपर्यंत वाढवू शकता. फोटोग्राफीसाठी, मागे तीन कॅमेरे आहेत - ५० मेगापिक्सेलचा OIS प्रायमरी कॅमेरा, ५ मेगापिक्सेलचा अल्ट्रा-वाइड लेन्स आणि २ मेगापिक्सेलचा मॅक्रो सेन्सर. सेल्फी आणि व्हिडिओ कॉल्ससाठी १२ मेगापिक्सेलचा फ्रंट कॅमेरा दिला आहे.
या फोनमध्ये ५,०००mAh क्षमतेची बॅटरी आहे, जी २५W फास्ट चार्जिंगला सपोर्ट करते. धुळीपासून आणि पाण्याच्या थेंबांपासून संरक्षणासाठी IP64 रेटिंग आहे. सुरक्षेसाठी सॅमसंग नॉक्स वॉल्ट (Samsung Knox Vault) सिस्टीमही यात आहे. याशिवाय, 'सर्कल टू सर्च', 'ऑब्जेक्ट इरेझर' आणि 'व्हॉइस ट्रान्सक्रिप्शन' सारखे AI फीचर्स या फोनचं खास वैशिष्ट्य आहेत. तसेच, गुगल जेमिनी, पर्प्लेक्सिटी आणि बिक्सबी या AI असिस्टंट्सनाही हा फोन सपोर्ट करतो.
ज्या ग्राहकांना चांगला डिस्प्ले, दमदार परफॉर्मन्स, दीर्घकाळ सॉफ्टवेअर अपडेट्स आणि AI फीचर्स असलेला मिड-रेंज स्मार्टफोन हवा आहे, त्यांना डोळ्यासमोर ठेवून सॅमसंगने गॅलक्सी A27 5G बाजारात आणला आहे. आता भारतातील किंमत जाहीर झाल्यावर या मॉडेलला बाजारात कसा प्रतिसाद मिळतो हे पाहणं महत्त्वाचं ठरेल.