RBI New Rules : बँक खातं नसलं तरी पाठवता येणार 50 हजार रुपये, RBI चे नवे नियम

RBI New Money Transfer Guidelines: आरबीआयने डोमेस्टिक मनी ट्रान्सफर (DMT) संदर्भात नवे नियम जारी केले आहेत. आता बँक खातं नसतानाही NEFT द्वारे थेट ५० हजार रुपयांपर्यंत रक्कम पाठवणं शक्य होणार आहे. या नव्या नियमांची सविस्तर माहिती जाणून घ्या.

RBI चे नवे नियम.. बँक खातं नसतानाही करता येणार मनी ट्रान्सफर

भारतीय रिझर्व्ह बँकेने (RBI) डोमेस्टिक मनी ट्रान्सफर (DMT) नियमांसंदर्भात नवीन मार्गदर्शक तत्त्वे जारी केली आहेत. या ताज्या नियमांनुसार, आता ज्यांच्याकडे बँक खातं नाही, ते सर्वसामान्य नागरिकही थेट बँकेच्या शाखेत जाऊन NEFT द्वारे दुसऱ्याच्या खात्यात ५०,००० रुपयांपर्यंतची रक्कम सहज ट्रान्सफर करू शकतात.

आर्थिक सेवा जास्तीत जास्त लोकांपर्यंत पोहोचवण्याच्या उद्देशाने मध्यवर्ती बँकेने हा निर्णय घेतला आहे. देशातील ज्या भागात बँकिंग सुविधा पोहोचलेल्या नाहीत, तिथेही सहजपणे पैसे पाठवण्यासाठी ही सुविधा अत्यंत उपयुक्त ठरणार आहे.

कॅश पे ट्रान्सफर लिमिट्स नियम

या नवीन सिस्टीमचा भाग म्हणून मध्यवर्ती बँकेने काही कडक मर्यादाही लागू केल्या आहेत. तसेच, कॅश पे ट्रान्सफर सेवेचा वापर करणाऱ्यांसाठी विशिष्ट मर्यादा निश्चित केल्या आहेत. त्यानुसार, एका ट्रान्झॅक्शनमध्ये जास्तीत जास्त १०,००० रुपयांपर्यंतच रक्कम पाठवण्याची परवानगी आहे. त्याचप्रमाणे, प्रत्येक लाभार्थ्यासाठी महिन्याला ट्रान्झॅक्शनची मर्यादा २५,००० रुपये निश्चित करण्यात आली आहे. या नियमांमुळे अनधिकृत व्यवहारांना आळा बसेल, असा आरबीआयला विश्वास आहे.

एटीएम आणि बिझनेस करस्पॉन्डंटद्वारे पैसे काढण्याची सुविधा

बँकांना त्यांच्या ग्राहकांच्या खात्यातून अशा व्यक्तींनाही पैसे पाठवण्याची पूर्ण मुभा आहे, ज्यांच्याकडे बँक खातं नाही. अशा प्रकारे पाठवलेले पैसे, ज्यांना गरज आहे ते एटीएमद्वारे किंवा बिझनेस करस्पॉन्डंट म्हणून नियुक्त केलेल्या अधिकृत एजंट्समार्फत सहजपणे काढू शकतात. तसेच इतर मान्यताप्राप्त पेमेंट चॅनेल्सद्वारेही ही रक्कम काढण्याची सुविधा उपलब्ध करून देण्यात आली आहे. यामुळे सर्वसामान्यांची मोठी सोय होणार आहे.

KYC नियम आणि सुरक्षिततेचे उपाय अनिवार्य

या सर्व सेवा पुरवणाऱ्या बँका आणि बिझनेस करस्पॉन्डंट्सनी आरबीआयचे 'नो युवर कस्टमर' (KYC) नियम २०२५ पाळणे बंधनकारक आहे. कॅश डिपॉझिट सेवा घेणाऱ्या ग्राहकांनी आपला व्हेरिफाय केलेला मोबाईल नंबर आणि सेल्फ अटेस्टेड अधिकृत वैध कागदपत्रे (OVD) सादर करणे आवश्यक आहे. प्रत्येक व्यवहार अतिरिक्त ऑथेंटिकेशन प्रक्रियेद्वारे (AFA) व्हेरिफाय केला पाहिजे. शिवाय, बँकांनी सुरक्षेच्या दृष्टिकोनातून योग्य त्या उपाययोजना राबवाव्यात आणि संशयास्पद व्यवहारांवर सतत लक्ष ठेवावे, असे आरबीआयने स्पष्ट केले आहे.