Prostate Cancer: पुरुषांनो 'ही' लक्षणं आहेत मोठ्या आजाराची! दुर्लक्ष करू नका...

Prostate Cancer: पुरुषांमध्ये मूत्राशयाच्या खाली आणि मूत्रनलिकेभोवती अक्रोडाच्या आकाराची एक ग्रंथी असते, तिला प्रोस्टेट ग्रंथी म्हणतात. याच प्रोस्टेट ग्रंथीमध्ये होणाऱ्या कॅन्सरला प्रोस्टेट कॅन्सर म्हणतात. काय आहेत याची लक्षणे चला जाणून घेऊयात….

रात्री वारंवार लघवीला लागणं, वीर्यातून रक्त येणं; पुरुषांनो, या लक्षणांकडे दुर्लक्ष करू नका

प्रोस्टेट कॅन्सरची मुख्य लक्षणं कोणती आहेत, चला जाणून घेऊया.

लघवीला जास्त होणे

वारंवार लघवीला जाण्याची इच्छा होणं, विशेषतः रात्री अनेक वेळा लघवीला लागणं, हे प्रोस्टेट कॅन्सरचं एक मुख्य लक्षण आहे. मात्र मधुमेहाच्या रुग्णांमध्येही हे लक्षण दिसून येतं.

लघवी करताना वेदना

लघवी करताना थोड्या वेदना, जळजळ किंवा अस्वस्थता जाणवत असेल तर त्याकडे दुर्लक्ष करू नका. हे एक धोकादायक लक्षण असू शकतं.

लघवी किंवा वीर्यातून रक्त येणे

लघवी किंवा वीर्यातून रक्त येणं, लघवीला अडथळा, जळजळ, वारंवार लघवी होणं आणि संसर्ग होणं ही देखील प्रोस्टेट कॅन्सरची लक्षणं असू शकतात.

कंबरदुखी आणि नितंबात वेदना

नितंब, पाठीचा कणा आणि इतर हाडांमध्ये वेदना होणं, कंबरदुखी ही सुद्धा प्रोस्टेट कॅन्सरची लक्षणं असू शकतात.

लैंगिक क्षमता कमी होणे

लैंगिक इच्छा किंवा क्षमतेमध्ये अचानक घट होणं हे प्रोस्टेट कॅन्सरचं लक्षण असू शकतं. अर्थात, तणावामुळेही असं होऊ शकतं.

जास्त थकवा, कारण नसताना वजन कमी होणे

किडनीच्या कार्यात अडथळा, प्रचंड थकवा, कोणत्याही कारणाशिवाय वजन कमी होणं आणि पायांवर सूज येणं, ही देखील प्रोस्टेट कॅन्सरची लक्षणं असू शकतात.

लक्षात ठेवा:

वर सांगितलेली लक्षणं दिसल्यास स्वतःच कोणताही निष्कर्ष काढू नका. तातडीने तुमच्या डॉक्टरांचा सल्ला घ्या आणि त्यांच्याकडूनच रोगाचं निदान निश्चित करा.