Mutual Fund SIP : दरमहा फक्त 2 हजार गुंतवा आणि 2 कोटी कमवा, ही ट्रिक माहितीये का?

म्युच्युअल फंड एसआयपीमध्ये दरमहा फक्त २ हजार रुपये गुंतवून तुम्ही करोडपती होऊ शकता, असं आर्थिक तज्ज्ञ सांगतात. या गुंतवणुकीचं संपूर्ण गणित काय?

दरमहा २ हजारांच्या गुंतवणुकीतून करोडपती होण्याचा प्रवास

दरमहा फक्त दोन हजार रुपयांची बचत करून करोडपती होण्याचं स्वप्न तुम्ही नक्कीच पूर्ण करू शकता. यासाठी खूप मोठी रक्कम गुंतवण्याची गरज नाही. तुम्ही फक्त दीर्घकाळ आणि शिस्तीने गुंतवणूक केली पाहिजे, असं आर्थिक तज्ज्ञ सांगतात.

म्युच्युअल फंड एसआयपीच्या माध्यमातून तुम्ही ही किमया साधू शकता. एसआयपीमध्ये चक्रवाढ व्याजाचा (कंपाउंडिंग) जबरदस्त फायदा मिळतो. यामुळे जसजसा वेळ पुढे जातो, तसतसा तुमच्या गुंतवणुकीवर मिळणाऱ्या नफ्यावरही परतावा मिळतो. पण, दोन कोटी रुपयांचं टार्गेट गाठायला किती वेळ लागेल, हे तुमच्या गुंतवणुकीवर मिळणाऱ्या सरासरी परताव्यावर अवलंबून असतं.

२००० रुपये SIP चं संपूर्ण कॅल्क्युलेशन इथे पाहा

तुम्ही म्युच्युअल फंडात दरमहा २,००० रुपये गुंतवले, तर वेगवेगळ्या वार्षिक परताव्यांनुसार तुमचा फंड कसा वाढेल, याचं गणित खालीलप्रमाणे आहे.

• मासिक गुंतवणूक: २,००० रुपये

• वार्षिक गुंतवणूक: २४,००० रुपये

• अंदाजाची पद्धत: तुम्ही दरमहा नियमितपणे गुंतवणूक करता आणि वार्षिक परतावा मासिक आधारावर कंपाउंड होतो, असं यात गृहीत धरलं आहे.

वेगवेगळ्या परताव्यांनुसार वेळ आणि नफ्याचं गणित

गुंतवणुकीवरील परताव्याची टक्केवारी बदलते, तेव्हा एक किंवा दोन कोटी रुपयांचं टार्गेट गाठण्यासाठी लागणारा वेळही बदलतो. त्याचे सविस्तर आकडे खालीलप्रमाणे आहेत.

• वार्षिक परतावा १० टक्के असल्यास - यासाठी एकूण ४६ वर्षे लागतील. या काळात तुमची एकूण गुंतवणूक ११.०६ लाख रुपये असेल, तर कंपाउंडिंगचा फायदा १.८९ कोटी रुपये असेल.

• वार्षिक परतावा १२ टक्के असल्यास - यासाठी एकूण ४० वर्षे लागतील. तुमची एकूण गुंतवणूक ९.६८ लाख रुपये असेल आणि कंपाउंडिंगमुळे मिळणारा नफा १.९० कोटी रुपये असेल.

• वार्षिक परतावा १५ टक्के असल्यास - यासाठी ३४ वर्षे लागतील. यात तुमची गुंतवणूक ८.२० लाख रुपये असेल आणि चक्रवाढ व्याजामुळे अतिरिक्त १.९२ कोटी रुपयांचा फायदा मिळेल. पण, तुम्ही १८ वर्षांचा कालावधी निवडलात, तर तुम्हाला जवळपास एक कोटी रुपये मिळतील.

SIP मध्ये कंपाउंडिंग किंवा चक्रवाढ व्याजाची ताकद का महत्त्वाची आहे?

म्युच्युअल फंड एसआयपीच्या सुरुवातीच्या वर्षांमध्ये फंडाची वाढ खूप संथ गतीने होत असल्याचं वाटतं. कारण त्या वेळी तुमची गुंतवणुकीची रक्कम खूपच कमी असते. पण, गुंतवणुकीचा कालावधी जसजसा वाढतो, तसतसा आधी जमा झालेल्या पैशांवर मिळालेला नफाही अतिरिक्त कमाई करून देऊ लागतो. हीच कंपाउंडिंगची खरी ताकद आहे. तुम्ही छोट्या रकमेपासून सुरुवात केली तरी, दीर्घकाळात यातून मोठी संपत्ती उभी राहते.

उत्पन्न वाढल्यावर SIP ची रक्कम कशी वाढवायची?

गुंतवणूकदार आपलं उत्पन्न वाढेल तशी एसआयपीची रक्कमही टप्प्याटप्प्याने वाढवू शकतात. उदाहरणार्थ, तुम्ही दरवर्षी एसआयपीच्या रकमेत १० टक्के वाढ केली, तर दीर्घकाळात तुमचा फंड अधिक वेगाने वाढेल. अर्थात, यामुळे तुमची एकूण मूळ गुंतवणूकही वाढते. तुम्ही योग्य नियोजन आणि शिस्तीने म्युच्युअल फंडात बचत केली, तर करोडपती होणं नक्कीच सोपं होतं.