१० तासांचा प्रवास अवघ्या ३ तासांत! मुंबई–पुणे–हैदराबाद हायस्पीड बुलेट ट्रेन, ११ स्थानकांची भव्य योजना; तुमचं शहर आहे का यादीत?

Mumbai Pune Hyderabad Bullet Train Project: केंद्रीय अर्थसंकल्पात मुंबई–पुणे–हैदराबाद हायस्पीड रेल्वे कॉरिडॉरला अधिकृत मंजुरी देण्यात आली आहे. हा ७६७ किमीचा प्रकल्प १० तासांचा प्रवास अवघ्या ३ तासांवर आणणार असून, यात ११ स्थानकांचा समावेश आहे. 

१० तासांचा प्रवास अवघ्या ३ तासांत! मुंबई–पुणे–हैदराबाद हायस्पीड बुलेट ट्रेन

मुंबई–अहमदाबाद बुलेट ट्रेन प्रकल्पाचे काम जोरात सुरू असतानाच आता पुणेकरांसह महाराष्ट्रासाठी आणखी एक मोठी आनंदाची बातमी समोर आली आहे. केंद्रीय अर्थमंत्री निर्मला सीतारामन यांनी सादर केलेल्या केंद्रीय अर्थसंकल्पात मुंबई–पुणे–हैदराबाद हायस्पीड रेल्वे कॉरिडॉरला अधिकृत मंजुरी देण्यात आली आहे. या महत्वाकांक्षी प्रकल्पामुळे केवळ प्रवासाचा वेळ लक्षणीयरीत्या कमी होणार नाही, तर महाराष्ट्र, कर्नाटक आणि तेलंगणा या तीन राज्यांमधील औद्योगिक, व्यापारी आणि आर्थिक संबंधांना नवे बळ मिळणार आहे. 

७६७ किमीचा हायस्पीड मार्ग; ११ महत्त्वाची स्थानके

या प्रस्तावित हायस्पीड रेल्वे मार्गाची एकूण लांबी ७६७ किलोमीटर असून, या संपूर्ण मार्गावर ११ स्थानके उभारण्याचा प्रस्ताव आहे. ही स्थानके मोठ्या शहरांसह महत्त्वाच्या औद्योगिक आणि धार्मिक केंद्रांना जोडणार आहेत. 

प्रस्तावित स्थानकांची यादी

मुंबई

नवी मुंबई

लोणावळा

पुणे

दौंड

अकलूज

पंढरपूर

सोलापूर

कलबुर्गी

जहिराबाद

हैदराबाद

या मार्गामुळे तीनही राज्यांतील अंतर्गत आणि आंतरराज्यीय कनेक्टिव्हिटी मोठ्या प्रमाणात सुधारेल. 

प्रवासाच्या वेळेत क्रांतिकारी बदल

सध्या मुंबई–पुणे प्रवासासाठी रस्ते किंवा रेल्वेमार्गे ३ ते ४ तास लागतात. मात्र हायस्पीड बुलेट ट्रेन सुरू झाल्यानंतर हा प्रवास अवघ्या ६० मिनिटांत पूर्ण होणार आहे. त्याचप्रमाणे, पुणे ते हैदराबाद हे सध्या ८ ते १० तासांचे अंतर फक्त ३ तासांत पार करता येणार आहे. यामुळे व्यवसाय, पर्यटन आणि दैनंदिन प्रवास अधिक सुलभ होणार आहे. 

तांत्रिक रचना आणि आर्थिक नियोजन

या हायस्पीड प्रकल्पासाठी सध्याच्या रेल्वे रुळांचा वापर न करता पूर्णपणे स्वतंत्र आणि नवीन लोहमार्ग उभारण्यात येणार आहे. प्रकल्पाचा सविस्तर प्रकल्प अहवाल (DPR) आधीच सादर करण्यात आला असून, २०२६ ते २०३० या कालावधीत प्रत्यक्ष काम सुरू होण्याची शक्यता वर्तवली जात आहे. 

तिसरी-चौथी मार्गिका की हायस्पीड रेल्वे?

मुंबई–पुणे दरम्यान तिसऱ्या आणि चौथ्या रेल्वे मार्गिकेचा प्रश्न अनेक वर्षांपासून चर्चेत आहे. आता हायस्पीड रेल्वे प्रकल्पाला हिरवा कंदील मिळाल्यामुळे, हे नवीन ट्रॅक जुन्या प्रस्तावाचा भाग असतील की पूर्णपणे स्वतंत्र प्रकल्प म्हणून उभारले जातील, याबाबत लवकरच स्पष्टता अपेक्षित आहे.