Mosquito Facts: रात्री झोपल्यावर कानाजवळ डासांची गुणगुण ऐकून अनेकजण वैतागतात. पण दिवसा हा आवाज फारसा येत नाही. मग डास फक्त रात्रीच येतात का? आणि दिवसा ते जातात तरी कुठे? चला जाणून घेऊया.
डास मुद्दामहून गुणगुणण्याचा आवाज काढत नाहीत. खरं तर, त्यांचे पंख खूप वेगाने फडफडतात, त्यामुळे हा आवाज येतो. एक डास एका सेकंदात सुमारे 300 ते 600 वेळा पंख फडफडवतो. या वेगामुळे हवेत कंपने तयार होतात आणि आपल्याला ती गुणगुण ऐकू येते.
25
डास कानाजवळच का घोंघावतात?
डास प्रामुख्याने कार्बन डायऑक्साइड (CO₂) आणि आपल्या शरीराच्या उष्णतेकडे आकर्षित होतात. आपण श्वास बाहेर सोडतो तेव्हा कार्बन डायऑक्साइड बाहेर पडतो. डास त्याचा वास ओळखतात आणि आपल्या चेहऱ्याजवळ येतात. आपले कान चेहऱ्याच्या जवळ असल्यामुळे, त्यांच्या पंखांचा आवाज कानांना स्पष्टपणे ऐकू येतो आणि जास्त त्रासदायक वाटतो.
35
रात्री आवाज मोठा का वाटतो?
रात्रीच्या वेळी आजूबाजूला शांतता असते. वाहनांचे आवाज आणि इतर गोंगाट कमी असतो. या शांततेत, अगदी लहान आवाजही मोठा आणि स्पष्ट ऐकू येतो. म्हणूनच डासांची गुणगुण रात्रीच्या वेळी जास्त त्रासदायक वाटते.
दिवसा डास दिसेनासे होतात म्हणजे ते गायब होत नाहीत. थेट सूर्यप्रकाश आणि उष्णतेमुळे त्यांचे लहान शरीर लवकर कोरडे पडू शकते. म्हणून, ते थंड, अंधाऱ्या आणि दमट जागांमध्ये लपतात. सहसा डास पडद्यांमागे, फर्निचरखाली, कपाटांमध्ये आणि भिंतींच्या कोपऱ्यात दडून बसतात. अशाप्रकारे ते ऊन आणि शत्रूंपासून स्वतःचा बचाव करतात.
55
रात्रीच का जास्त चावतात?
माणसांप्रमाणेच डासांनाही आपली ऊर्जा वाचवावी लागते. त्यामुळे दिवसा ते जास्त वेळ विश्रांती घेतात. रात्री हवामान थंड झाल्यावर ते अन्नाच्या शोधात बाहेर पडतात. म्हणूनच रात्रीच्या वेळी डास जास्त सक्रिय असतात आणि चावतात.
