MHADA Pune Lottery: पुणेकरांनो, गुलाल उधळायला तयार राहा! म्हाडाच्या घरांची लॉटरी 'या' तारखेला; २ लाख १५ हजार अर्जदारांची प्रतीक्षा संपली!

MHADA Pune Lottery: तांत्रिक अडथळे, आचारसंहितेमुळे रखडलेली पुणे म्हाडाच्या ४,१८६ घरांची सोडत १० फेब्रुवारी रोजी होणार आहे. म्हाडा प्रशासनाने या तारखेला दुजोरा दिला असून, एका घरासाठी जवळपास ५१ अर्जदारांमध्ये चुरस असल्याने नागरिकांमध्ये उत्सुकता आहे.

म्हाडाच्या ४,१८६ घरांची मेगा सोडत 'या' दिवशी

पुणे : आपल्या हक्काच्या घरासाठी डोळे लावून बसलेल्या पुणेकरांसाठी अखेर आनंदाची बातमी आहे! तांत्रिक अडथळे आणि निवडणुकांच्या आचारसंहितेमुळे रखडलेली म्हाडाच्या ४,१८६ घरांची सोडत (Lottery) आता अखेर मार्गी लागणार आहे. येत्या १० फेब्रुवारीला या घरांच्या नशिबाचा फैसला होणार असून, म्हाडा प्रशासनाने याला अधिकृत दुजोरा दिला आहे. 

आचारसंहितेचा अडथळा दूर, मुहूर्ताची तारीख ठरली!

गेल्या चार महिन्यांपासून या सोडतीला आचारसंहितेचा ग्रहण लागले होते. ऑक्टोबर आणि डिसेंबरमध्ये ही प्रक्रिया होणार होती, मात्र महापालिका आणि जिल्हा परिषद निवडणुकांमुळे ही तारीख सतत पुढे जात होती. आता ९ फेब्रुवारीला जिल्हा परिषद निवडणुकीची आचारसंहिता संपत असून, त्याच्या दुसऱ्याच दिवशी म्हणजेच १० फेब्रुवारीला ही सोडत काढली जाणार आहे. 

एका घरासाठी ५० स्पर्धक!

पुणे मंडळाच्या या सोडतीसाठी पुणेकरांनी अक्षरश: उड्या घेतल्या आहेत.

एकूण घरे: ४,१८६ (सर्वसमावेशक आणि एकात्मिक योजना)

एकूण अर्ज: २ लाख १५ हजार

परिस्थिती: एका घरासाठी जवळपास ५१ अर्जदारांमध्ये चुरस आहे.

गेल्या पाच महिन्यांपासून अनामत रक्कम जमा असूनही निकाल लागत नसल्याने अर्जदारांमध्ये संतापाचे वातावरण होते. मात्र, आता म्हाडा पुणे मंडळाचे सभापती शिवाजीराव आढळराव पाटील यांनी प्रत्यक्ष तारीख जाहीर केल्याने नागरिकांना मोठा दिलासा मिळाला आहे. 

उपमुख्यमंत्र्यांच्या उपस्थितीत सोडत?

या सोडतीसाठी उपमुख्यमंत्री आणि गृहनिर्माण मंत्र्यांची वेळ मागण्यात आली आहे. १० फेब्रुवारीचा मुहूर्त कोणत्याही परिस्थितीत हुकणार नाही, अशी तयारी म्हाडाच्या पुणे विभागाने युद्धपातळीवर सुरू केली आहे.