Maruti Hybrid: मारुतीची 35kmpl मायलेज देणारी हायब्रीड गाडी आणणार?
सार
मारुती सुझुकी पुढच्या तीन वर्षांत नऊ नव्या गाड्या लाँच करण्याच्या तयारीत आहे. यामध्ये पाच हायब्रीड एसयूव्ही असतील, ज्यात कंपनीने स्वतः विकसित केलेलं नवीन स्ट्रॉंग हायब्रीड तंत्रज्ञान वापरलं जाईल.
भारताच्या ऑटोमोबाईल मार्केटमध्ये हायब्रीड गाड्यांची मागणी वाढत आहे. हीच संधी साधत मारुती सुझुकी पुढच्या तीन वर्षांत तब्बल नऊ नवीन मॉडेल्स लाँच करणार आहे. कंपनी एसयूव्ही, इलेक्ट्रिक आणि हायब्रीड गाड्यांवर जास्त लक्ष केंद्रित करत आहे. या नव्या गाड्यांमध्ये ५ हायब्रीड एसयूव्ही असतील, ज्या जबरदस्त मायलेज देतील असा दावा केला जात आहे.
पुढच्या वर्षी येणाऱ्या फ्रॉन्क्स फेसलिफ्ट (Fronx Facelift) गाडीतून मारुती सुझुकी स्वतः तयार केलेलं स्ट्रॉंग हायब्रीड तंत्रज्ञान पहिल्यांदा सादर करणार आहे. 'HEV' या कोड नावाने विकसित केलेली ही सिस्टीम, सध्या वापरल्या जाणाऱ्या टोयोटाच्या 'अॅटकिन्सन सायकल' स्ट्रॉंग हायब्रीड टेक्नॉलॉजीपेक्षा स्वस्त आणि जास्त कार्यक्षम असेल, असं म्हटलं जातंय.
कंपनीची योजना हे हायब्रीड तंत्रज्ञान भविष्यातील लोकप्रिय मॉडेल्समध्ये १.२-लिटर के-सीरिज पेट्रोल इंजिनसोबत जोडण्याची आहे. यामुळे गाडीला प्रति लिटर ३५ किलोमीटरपेक्षा जास्त मायलेज मिळेल, असे रिपोर्ट्समध्ये म्हटले आहे. मात्र, कंपनीने याबाबत अजून कोणतीही अधिकृत माहिती दिलेली नाही.
मारुती ग्रँड विटारा फेसलिफ्ट
२०२६ च्या दुसऱ्या सहामाहीत ग्रँड विटारा फेसलिफ्ट लाँच होण्याची शक्यता आहे. यात थोडे डिझाइन बदल आणि अधिक आधुनिक फीचर्स मिळतील. डिझाइनमध्ये 'व्हिक्ट्रॉइस' (Victrois) कॉन्सेप्टमधील काही गोष्टी घेतल्या जाऊ शकतात. सध्याच्या इंजिन पर्यायांमध्ये फारसा बदल होणार नाही, असं बोललं जातंय.
सात सीटर ग्रँड विटारा
मारुती सुझुकीने तीन रांगांच्या सीट असलेली एक नवीन प्रीमियम एसयूव्ही भारतीय बाजारात आणणार असल्याची पुष्टी केली आहे. पाच-सीटर ग्रँड विटारापेक्षा ही गाडी जास्त लांब आणि अधिक प्रशस्त असेल. सध्याच्या ग्रँड विटारामध्ये असलेले १.५-लिटर अॅटकिन्सन सायकल स्ट्रॉंग हायब्रीड आणि माईल्ड हायब्रीड पॉवरट्रेन यातही कायम राहण्याची शक्यता आहे.
मारुती फ्रॉन्क्स हायब्रीड
कंपनी बऱ्याच काळापासून फ्रॉन्क्स फेसलिफ्टची टेस्टिंग करत आहे. गाडीच्या बाहेरील लूकमध्ये आणि आतील डिझाइनमध्ये किरकोळ बदल अपेक्षित आहेत. पण या गाडीचं सर्वात मोठं वैशिष्ट्य म्हणजे, कंपनीचं स्वतःचं स्ट्रॉंग हायब्रीड तंत्रज्ञान असलेलं हे पहिलं मॉडेल असेल.
मारुती Y43
रिपोर्ट्सनुसार, बंद झालेल्या इग्निस हॅचबॅकच्या जागी 'Y43' या कोड नावाने एक नवीन मायक्रो-एसयूव्ही विकसित केली जात आहे. ही गाडी पेट्रोल, सीएनजी आणि हायब्रीड अशा विविध पॉवरट्रेन पर्यायांसह येईल, अशी चर्चा आहे. मात्र, कंपनीने अद्याप यावर काहीही सांगितलेलं नाही.
नवीन जनरेशन मारुती ब्रेझा
मारुती सुझुकी ब्रेझाचं फेसलिफ्ट व्हर्जन २३ जुलै २०२६ रोजी लाँच करण्याची योजना आखत आहे. तर, पूर्णपणे नवीन जनरेशनची ब्रेझा २०२९ मध्ये बाजारात येण्याची शक्यता आहे. या नवीन जनरेशन मॉडेलमध्ये मारुतीची नवीन सिरीज हायब्रीड पॉवरट्रेन दिली जाईल, असं रिपोर्ट्समध्ये म्हटलं आहे.