Maruti Suzuki ची जानेवारीची ऑफर सोडू नका, 1.70 लाखांपर्यंतची बंपर सूट, पण ही कॅच ओळखा

Maruti Suzuki offers bumper discount till 31st Jan : जानेवारी २०२६ मध्ये, मारुती सुझुकी आपल्या 'अरिना' नेटवर्कमधील गाड्यांवर १.७० लाख रुपयांपर्यंतची मोठी सूट देत आहे. 

Maruti Suzuki offers bumper discount till 31st Jan : जर तुम्ही नवीन वर्षात मारुती सुझुकीची कार खरेदी करण्याचा विचार करत असाल, तर जानेवारी २०२६ ही तुमच्यासाठी अत्यंत फायदेशीर वेळ ठरू शकते. भारतातील सर्वात मोठी कार उत्पादक कंपनी आपल्या 'अरिना' (Arena) नेटवर्कद्वारे विक्री होणाऱ्या प्रवासी गाड्यांवर तब्बल १.७० लाख रुपयांपर्यंतचे मोठे फायदे देत आहे. मात्र, ही ऑफर केवळ ३१ जानेवारी २०२६ पर्यंत किंवा स्टॉक असेपर्यंतच मर्यादित आहे.

बचतीचे मोठे गणित

यावेळी मिळणारी सवलत ही 'जीएसटी २.०' मुळे झालेली मोठी किंमत कपात आणि जानेवारी महिन्यासाठी विशेष रोख सवलत अशा दोन भागांत विभागलेली आहे. यामध्ये Maruti Suzuki S-Presso या मॉडेलवर सर्वाधिक फायदा मिळत आहे. या गाडीवर जीएसटी कपातीचे १,२९,६०० रुपये आणि रोख सवलतीचे ४०,५०० रुपये असे मिळून एकूण १,७०,१०० रुपयांचा फायदा मिळत आहे. या सवलतीनंतर S-Presso ची नवीन एक्स-शोरूम किंमत आता ३,४९,९०० रुपये झाली आहे.

लोकप्रिय मॉडेल्सवरील सवलतीचा तपशील

मारुती सुझुकीच्या इतर गाड्यांवरही मोठी बचत करण्याची संधी आहे. Alto K10 वर एकूण १,४८,१०० रुपयांची सवलत मिळत असून यात १,०७,६०० रुपये जीएसटी कपात आणि ४०,५०० रुपये रोख सवलत समाविष्ट आहे, ज्यामुळे तिची नवीन किंमत ३,६९,९०० रुपये झाली आहे. लोकप्रिय SUV Brezza वर एकूण १,४२,७०० रुपयांचा फायदा मिळत असून तिची सुधारित किंमत ८,२५,९०० रुपये आहे.

तरुणांच्या पसंतीची Swift आता १,२९,६०० रुपयांच्या एकूण सवलतीसह उपलब्ध आहे (८४,६०० रुपये जीएसटी कपात + ४५,००० रुपये कॅश डिस्काउंट), तिची नवीन किंमत ५,७८,९०० रुपये इतकी आहे. फॅमिली कार म्हणून ओळखल्या जाणाऱ्या WagonR वर १,२०,१०० रुपये, Celerio वर १,३४,६०० रुपये आणि Eeco व्हॅनवर १,०८,१०० रुपयांचा एकूण फायदा मिळत आहे.

इतर मॉडेल्स आणि अटी

सेडान सेगमेंटचा विचार केल्यास, Dzire वर एकूण ९०,२०० रुपयांची बचत होत आहे. विशेष म्हणजे डिझायरवर जानेवारीची रोख सवलत केवळ २,५०० रुपये असली, तरी जीएसटी कपातीचे ८७,७०० रुपये मिळाल्यामुळे ही गाडी आता ६,२५,६०० रुपयांना उपलब्ध आहे. टॅक्सी सेगमेंटसाठी असलेल्या Dzire Tour S वर ८२,२०० रुपयांची एकूण सवलत आहे.

या यादीत सर्वात कमी फायदा Ertiga वर मिळत आहे. या एमपीव्हीवर ४६,४०० रुपये जीएसटी कपात आणि ३०,००० रुपये रोख सवलत असे मिळून एकूण ७६,४०० रुपयांचे फायदे आहेत, ज्यामुळे तिची नवीन किंमत ८,८०,००० रुपये झाली आहे.

हा लाभ घेण्यासाठी ग्राहकांनी ३१ जानेवारी २०२६ पर्यंत आपली कार बुक करणे आवश्यक आहे. या अधिकृत कंपनी ऑफर्स व्यतिरिक्त, ग्राहक आपल्या स्थानिक डीलरकडून अतिरिक्त 'डीलर डिस्काउंट' बाबतही चौकशी करू शकतात.