Lamborghini Sales: लॅम्बोर्गिनीची रेकॉर्डब्रेक कमाई! हायब्रीड गाड्यांनी कसा बदलला खेळ?

Lamborghini Sales: इटालियन लक्झरी कार कंपनी लॅम्बोर्गिनीने २०२५ मध्ये १०,७४७ गाड्यांची डिलिव्हरी करून नवा विक्री विक्रम केला आहे. रेवेल्टो आणि उरूस एसई सारख्या हायब्रीड मॉडेल्सना मिळालेली जबरदस्त मागणी या यशामागे आहे. 

इटालियन लक्झरी कार बनवणारी कंपनी ऑटोमोबिली लॅम्बोर्गिनीने एक नवीन रेकॉर्ड केला आहे. गेल्या वर्षी, म्हणजे २०२५ मध्ये, कंपनीने जगभरात १०,७४७ गाड्यांची डिलिव्हरी केली. सलग तिसऱ्या वर्षी कंपनीने १०,००० गाड्यांचा टप्पा ओलांडला आहे. कंपनीचा महसूल ३४,००० कोटी रुपयांपेक्षा जास्त झाला, जो २०२४ च्या तुलनेत ३.३ टक्क्यांनी जास्त आहे. कंपनीचा ऑपरेटिंग नफा ८,००० कोटींहून अधिक असून प्रॉफिट मार्जिन २४ टक्के आहे.

विनिमय दरातील बदल आणि अमेरिकेतील टॅरिफसारख्या अनेक आर्थिक आव्हानांना कंपनीला सामोरं जावं लागलं. पण कंपनीने योग्य उत्पादन नियोजन आणि खर्च नियंत्रणातून या परिस्थितीवर मात केली. २०२५ मध्ये रेवेल्टो (Revuelto) आणि उरूस एसई (Urus SE) या मॉडेल्सनी लॅम्बोर्गिनीच्या विक्री वाढीत मोठी भूमिका बजावली. रेवेल्टो ही कंपनीची पहिली V12 हायब्रीड सुपर स्पोर्ट्स कार आहे. या हायब्रीड मॉडेल्समुळे लॅम्बोर्गिनीच्या इलेक्ट्रिक प्रवासाची सुरुवात झाली आणि जगभरातील ग्राहकांनी या गाड्यांना प्रचंड प्रतिसाद दिला.

२०२५ मध्ये 'उरूस' (Urus) हे लॅम्बोर्गिनीचं सर्वाधिक विकलं जाणारं मॉडेल ठरलं. कंपनीच्या एकूण विक्रीत निम्म्याहून अधिक वाटा याच गाडीचा होता. उत्पादन मिश्रणामुळे कंपनीच्या महसुलातही सुधारणा झाली. तब्बल ९४ टक्के डिलिव्हरीमध्ये 'ॲड पर्सोनम' (Ad Personam) पर्सनलायझेशन प्रोग्रामचा समावेश होता. या प्रोग्राममुळे प्रत्येक कारची व्हॅल्यू वाढली. आता कंपनी 'टेमेरारियो' (Temerario) या नव्या गाडीची डिलिव्हरी २०२६ च्या सुरुवातीला सुरू करणार आहे. यात एक नवीन V8 पॉवरट्रेन असेल, जी १०,००० rpm पर्यंत पोहोचते. या गाडीमुळे कंपनीची हायब्रीड रेंज पूर्ण होईल.

सर्वाधिक ४,६५० गाड्यांची डिलिव्हरी युरोप, मध्य पूर्व आणि आफ्रिका (EMEA) या प्रदेशात झाली. त्यानंतर ३,३४७ गाड्यांसह अमेरिका दुसऱ्या क्रमांकावर आहे. तर, आशिया पॅसिफिकमध्ये २,७५० गाड्यांची विक्री झाली. कंपनीचे चेअरमन आणि सीईओ स्टीफन विंकेलमन यांनी सांगितलं की, 'कंपनीने नफा कायम ठेवत ही वाढ मिळवली आहे. आमचं लक्ष शिस्त आणि योग्य उत्पादन धोरणावर आहे.'

लॅम्बोर्गिनी इंडियाने काय म्हटलं?

भारतातील लक्झरी आणि सुपरकार मार्केट वेगाने वाढत आहे. त्यामुळे, ग्राहक आता फक्त महागड्या गाड्याच नाही, तर आपल्या आवडीनुसार कस्टमाईज केलेल्या सुपरकार्सना पसंती देत आहेत. हा ट्रेंड लक्षात घेता, देशात पर्सनलाइज्ड सुपरकार्सची मागणी झपाट्याने वाढत असल्याचं लॅम्बोर्गिनी इंडियाने म्हटलं आहे. अनेक ग्राहकांनी त्यांच्या आवडीनुसार डिझाइन केलेल्या लॅम्बोर्गिनी रेवेल्टो सुपरकारची डिलिव्हरी घेतली आहे, असं कंपनीचं म्हणणं आहे. लॅम्बोर्गिनी ग्राहकांसाठी 'ॲड पर्सोनम' नावाचा एक खास पर्सनलायझेशन प्रोग्राम चालवते. या प्रोग्रामद्वारे ग्राहक त्यांच्या कारसाठी खास कलर कॉम्बिनेशन्स, कार्बन फायबरचे घटक, कस्टम स्टिचिंग आणि लोगो यांसारख्या अनेक पर्यायांमधून निवड करू शकतात.