WhatsApp Update: आता व्हॉट्सॲप नसलेल्यांशीही चॅट करता येणार, 'गेस्ट चॅट' फीचर लवकरच!

WhatsApp Update व्हॉट्सॲपने 'गेस्ट चॅट' नावाचं एक नवीन फीचर टेस्टिंगसाठी आणलं आहे. या फीचरमुळे, ज्यांच्याकडे व्हॉट्सॲप नाही अशा लोकांशीही एका वेब लिंकद्वारे चॅट करता येणार आहे. सध्या हे फीचर प्रायोगिक टप्प्यात असून, यात फक्त टेक्स्ट मेसेज पाठवता येतात आणि चॅट १० दिवसांनी आपोआप डिलीट होतं.

WhatsApp Update कॅलिफोर्निया: व्हॉट्सॲप आता एक असं नवीन फीचर तपासत आहे, ज्यामुळे तुम्ही ॲप न वापरणाऱ्या लोकांशीही मेसेजवर बोलू शकाल. या फीचरचं नाव 'गेस्ट चॅट' (Guest Chat) असं आहे. सध्या हे फीचर काही मोजक्या युजर्ससाठीच उपलब्ध करून देण्यात आलं आहे. अँड्रॉइड, आयओएस आणि वेब या तिन्ही प्लॅटफॉर्मवर याची चाचणी सुरू आहे. या फीचरमुळे युजर्सना इतरांशी संवाद साधणं अधिक सोपं आणि सोयीस्कर होईल, असा कंपनीचा प्रयत्न आहे.

व्हॉट्सॲप गेस्ट चॅट कसं काम करतं?

ज्या लोकांकडे व्हॉट्सॲप नाही, त्यांच्याशी सहजपणे संवाद साधता यावा, हा 'गेस्ट चॅट' फीचरचा मुख्य उद्देश आहे. साधारणपणे, व्हॉट्सॲपवर चॅट करण्यासाठी समोरच्या व्यक्तीनेही ॲप इन्स्टॉल केलेलं असणं गरजेचं असतं. पण या नवीन फीचरमध्ये, युजरला फक्त एक इन्व्हाइट लिंक पाठवायची आहे. ती लिंक वापरून दुसरी व्यक्ती थेट वेब ब्राउझरमध्ये चॅट सुरू करू शकते.

हे फीचर वापरण्यासाठी 'Invite a Friend' किंवा कॉन्टॅक्ट लिस्टमधील 'Guest' ऑप्शनद्वारे एक लिंक तयार करता येते. लिंक उघडल्यावर, गेस्ट युजरला फक्त आपलं नाव टाकावं लागेल आणि लगेच मेसेज पाठवता येतील. या चॅट्सवर 'Guest' असं लेबल दिलेलं असेल, ज्यामुळे तुम्ही रजिस्टर्ड अकाऊंट नसलेल्या व्यक्तीशी बोलत आहात, हे लगेच ओळखता येईल.

प्रायव्हसीची काळजी घेण्यासाठी गेस्ट चॅट्सना सुद्धा एंड-टू-एंड एन्क्रिप्शनची सुरक्षा देण्यात आली आहे. म्हणजेच, चॅटमध्ये सहभागी असलेले लोकच ते मेसेज वाचू शकतील. तरीही, ही लिंक चुकीच्या लोकांपर्यंत पोहोचण्याची शक्यता असल्याने, ती शेअर करताना काळजी घ्यावी, असा सल्ला तज्ज्ञांनी दिला आहे.

व्हॉट्सॲप गेस्ट चॅटची काही लिमिटेशन्स

सध्या या फीचरला काही मर्यादा आहेत. यात फक्त साधे टेक्स्ट मेसेजच पाठवता येतात. व्हॉइस नोट्स, फोटो, व्हिडिओ किंवा ग्रुप चॅटसाठी यात सपोर्ट नाही. याशिवाय, हे चॅट्स सुमारे १० दिवसांनंतर आपोआप एक्सपायर होतात (कालबाह्य होतात). त्यानंतर पुन्हा चॅट सुरू करण्यासाठी नवीन लिंक तयार करावी लागेल. युजर्सना गेस्ट युजर्सना ब्लॉक करण्याची सोयही देण्यात आली आहे. हे फीचर अजूनही टेस्टिंगमध्ये असून, ते सर्वांसाठी कधी उपलब्ध होईल याची तारीख कंपनीने जाहीर केलेली नाही, असं रिपोर्ट्समध्ये म्हटलं आहे.