Kitchen Tips: उन्हाळ्यात बटाट्यांना कोंब फुटू नयेत म्हणून वापरा 'या' टिप्स

Kitchen Tips: उन्हाळा वाढला की घरातल्या आणि स्वयंपाकघरातील काही समस्या डोकं वर काढतात. उन्हाळ्यात बटाटे खराब होऊ नयेत, त्यांना कोंब फुटू नयेत किंवा ते सडू नयेत असं वाटत असेल, तर या काही सोप्या टिप्स नक्की फॉलो करा.

बटाटे साठवण्याच्या सोप्या टिप्स

बटाटा म्हणजे भाज्यांचा राजा. घरात दुसरी कोणती भाजी नसली तरी बटाट्यावर 4-5 दिवस आरामात निघून जातात. बटाटा टिक्कीपासून ते रस्सा भाजीपर्यंत, बटाटा सगळीकडे लागतोच. त्यामुळे बहुतेक घरांमध्ये बटाट्यांचा स्टॉक असतोच. पण काही दिवसांतच या बटाट्यांना कोंब फुटतात आणि ते खराब होतात. असं होऊ नये म्हणून बटाटे कसे साठवायचे, हे जाणून घ्या.

खराब झालेला बटाटा कसा दिसतो

बटाटा खराब झालाय हे ओळखणं काहींना अवघड वाटतं. थोडे कोंब आले असतील तर तो बटाटा वापरता येतो. पण बटाटा हिरवा झाला असेल, त्यावर पांढरी बुरशी आली असेल किंवा वास येत असेल, तर तो लगेच फेकून द्या. खूप मऊ, सुरकुतलेले किंवा पाणी सुटलेले बटाटेही खराब समजले जातात.

योग्य तापमान

बटाटे खराब होऊ नयेत यासाठी योग्य तापमान राखणं गरजेचं आहे. त्यांना खूप गरम किंवा खूप थंड ठिकाणी ठेवू नका. बटाटे नेहमी थंड आणि कोरड्या जागी ठेवावेत. जास्त उष्णतेमुळे बटाटे लवकर सुकतात आणि त्यांना कोंब फुटतात. किचनमधील एखाद्या कपाटात किंवा पॅन्ट्रीमध्ये ठेवणं उत्तम.

सूर्यप्रकाशापासून दूर

बटाटे जास्त काळ चांगले राहावेत असं वाटत असेल, तर त्यांना थेट सूर्यप्रकाश लागेल अशा जागी ठेवू नका. सूर्यप्रकाशामुळे बटाटे हिरवे होऊ शकतात, जे आरोग्यासाठी चांगलं नाही. बटाटे नेहमी अंधाऱ्या जागी ठेवा. कागदी पिशव्या, पुठ्ठ्याचं बॉक्स किंवा बंद कपाटात ठेवणं हा उत्तम पर्याय आहे.

हवा खेळती राहणे आवश्यक

बटाटे नेहमी हवा खेळती राहील अशा ठिकाणी ठेवा. त्यांना टोपलीत, उघड्या भांड्यात किंवा कागदी पिशवीत ठेवणं महत्त्वाचं आहे. प्लास्टिकच्या पिशव्या किंवा हवाबंद डब्यांमध्ये बटाटे ठेवणं टाळा, कारण यामुळे ते लवकर खराब होतात.

बटाटे फ्रिजमध्ये साठवावेत का?

अनेक जण बटाटे जास्त काळ ताजे राहावेत म्हणून फ्रिजमध्ये ठेवतात. पण ही सवय योग्य नाही. फ्रिजमध्ये ठेवल्याने बटाट्याची चव आणि पोत दोन्ही खराब होतात. हो, पण जर तुम्ही बटाटे कापले किंवा सोलले असतील, तर ते पाण्यात टाकून फ्रिजमध्ये ठेवू शकता. पण ते 24 तासांच्या आत वापरावे लागतील.

कांद्यासोबत बटाटे

कांदा आणि बटाटा हे जणू काही सोबतीच आहेत. अनेक घरांमध्ये कांद्याच्या बाजूलाच बटाट्यांची जागा असते. पण कांद्यातून निघणाऱ्या वायूमुळे बटाट्यांना लवकर कोंब फुटतात आणि ते खराब होतात. त्यामुळे, कांदा आणि बटाटा नेहमी वेगवेगळं ठेवणंच उत्तम.