चहा बनवल्यानंतर उरलेली पावडर तुम्ही फेकून देताय? हे आहेत फायदे, जाणून घ्या

जवळपास प्रत्येक घरात रोज सकाळी आणि संध्याकाळी चहा पितात. चहा बनवल्यानंतर उरलेली चहा पावडर बहुतेक लोक कचराकुंडीत टाकून देतात. पण तिचे फायदे कळल्यावर तुम्ही पुन्हा असं करणार नाही. 

झाडांसाठी उत्तम खत

वापरलेली चहा पावडर झाडांसाठी खूप उपयुक्त आहे. यामुळे मातीला सेंद्रिय पदार्थ मिळतात. फुलांच्या झाडांसाठी हे विशेषतः फायदेशीर आहे. चहा पावडरमधील दूध आणि साखर काढून टाकण्यासाठी ती पाण्याने धुवून उन्हात वाळवावी. त्यानंतर ती थेट मातीत किंवा खतामध्ये मिसळून झाडांना घालावी.

भांडी सहज स्वच्छ करता येतात

नॉन-स्टिक भांड्यांवरील डाग आणि वास काढण्यासाठी वापरलेली चहा पावडर मदत करते. चहा पावडर पाण्यात उकळून त्यात थोडे व्हिनेगर मिसळा. ते पाणी भांड्यात टाकून थोडा वेळ ठेवा. नंतर नेहमीच्या डिशवॉश लिक्विडने धुतल्यास भांडी चमकतील.

फ्रिजमधील दुर्गंधी दूर करा

फ्रिजमधून येणाऱ्या दुर्गंधीवर चहा पावडर हा एक उत्तम उपाय आहे. वापरलेली चहा पावडर स्वच्छ धुवून सुती कापडात बांधून फ्रिजच्या कोपऱ्यात ठेवा. यामुळे फ्रिजमधील दुर्गंधी पूर्णपणे निघून जाईल.

त्वचेच्या काळजीसाठी उपयुक्त

वापरलेली चहा पावडर त्वचेसाठीही फायदेशीर आहे. यापासून स्क्रब बनवता येतो. चहा पावडरमध्ये मध, दही किंवा लिंबाचा रस मिसळून फेस पॅक म्हणून वापरता येतो. तसेच, चहा पावडर कोमट पाण्यात भिजवून त्या पाण्यात पाय ठेवल्यास पायांच्या भेगा आणि वेदना कमी होतात.

केसांसाठी नैसर्गिक कंडिशनर

चहा पावडर केसांसाठी नैसर्गिक कंडिशनरप्रमाणे काम करते. ती केसांना चमक देते. चहा बनवल्यानंतर उरलेली चहा पावडर स्वच्छ धुवून, गाळून पाण्यात उकळावी. त्या पाण्याने नियमित केस धुतल्यास केस निरोगी दिसतात.