Gold Demand : सणासुदीच्या तोंडावर सोन्याची मागणी वाढली, बाजारपेठ पुन्हा तेजीत; दागिने आणि गुंतवणुकीकडे कल

वर्ल्ड गोल्ड कौन्सिलच्या (WGC) ताज्या रिपोर्टनुसार, भारताची सोन्याची बाजारपेठ पुन्हा एकदा उभारी घेत आहे. दागिन्यांची वाढती मागणी, गुंतवणुकीतील स्थिरता आणि आयातीमधील वाढ यामुळे येत्या सणासुदीच्या काळात ही तेजी आणखी वाढण्याची शक्यता आहे.

मुंबई : वर्ल्ड गोल्ड कौन्सिलच्या (WGC) ताज्या रिपोर्टनुसार, भारताची सोन्याची बाजारपेठ पुन्हा एकदा उभारी घेत आहे. येत्या सणासुदीच्या काळात ही तेजी आणखी वाढण्याची शक्यता आहे. दागिन्यांची वाढती मागणी, गुंतवणुकीतील स्थिरता आणि आयातीमधील वाढ यामुळे बाजारात पुन्हा एकदा सकारात्मक वातावरण निर्माण झालं आहे.

किमती पुन्हा वाढल्या, बाजारात उत्साह

जून महिन्यात सोन्याच्या दरात मोठी घसरण झाली होती आणि जुलैमध्ये दर स्थिर होते. पण आता पुन्हा एकदा दर वाढू लागले आहेत. आंतरराष्ट्रीय बाजारात ऑगस्टच्या पहिल्या दोन आठवड्यांत सोन्याचे दर ९ टक्क्यांनी वाढून ४,३९१ डॉलर प्रति औंस झाले. तर भारतीय बाजारात १४ ऑगस्टपर्यंत सोन्याचा भाव जवळपास ७ टक्क्यांनी वाढून १,५१,७४४ रुपये प्रति १० ग्रॅमवर पोहोचला. चलनविषयक धोरणातील बदल, अमेरिकन डॉलरची घसरण आणि गोल्ड ईटीएफ (ETFs) मध्ये पुन्हा एकदा गुंतवणूक वाढल्यामुळे सोन्याच्या दरांना आधार मिळाला आहे.

दागिने आणि गुंतवणूक दोन्ही सेगमेंटमध्ये मागणी वाढली

किमती वाढताच प्रत्यक्ष सोन्याच्या मागणीतही वाढ दिसून आली आहे. अनेक ग्राहकांनी दरातील बदलांना खरेदीची संधी मानून सोने खरेदी केली. ज्यांनी आधी खरेदी पुढे ढकलली होती, ते ग्राहकही आता बाजारात परतले आहेत. सोनारांनी सणासुदीच्या तयारीसाठी आपल्या दुकानात माल भरायला सुरुवात केली आहे, त्यामुळे उत्पादकांकडे ऑर्डरचा ओघ वाढला आहे.

गुंतवणुकीच्या बाबतीतही चांगला प्रतिसाद मिळत आहे. भारतीय गोल्ड ईटीएफमध्ये जुलै महिन्यात १,५६० कोटी रुपयांची निव्वळ गुंतवणूक झाली. ही रक्कम मागील महिन्याच्या तुलनेत ५५ टक्क्यांनी कमी होती. ईटीएफ होल्डिंग्स १ टनाने वाढून १२० टन झाली, तर 'अॅसेट्स अंडर मॅनेजमेंट' (AUM) २ टक्क्यांनी वाढून १,७३,३०० कोटी रुपयांवर पोहोचली. ऑगस्टच्या पहिल्या दोन आठवड्यांत ईटीएफमध्ये अंदाजे १,१७९ कोटी रुपयांची अतिरिक्त गुंतवणूक झाली.

व्यापार आणि आयातीतही तेजी

जुलै महिन्यात सोन्याच्या फ्युचर्स ट्रेडिंगमध्येही सुधारणा झाली. 'मल्टी कमॉडिटी एक्सचेंज ऑफ इंडिया' (MCX) वरील रोजच्या सरासरी व्यवहारांचे प्रमाण मागील तीन महिन्यांतील १३.५ टनांवरून १४.९ टनांपर्यंत वाढले. तर, रोजची सरासरी उलाढाल ९ टक्क्यांनी वाढून २१,४०० कोटी रुपये झाली.

सोन्याच्या आयातीचे आकडेही वाढत्या मागणीचे संकेत देत आहेत. जूनमध्ये १.९७ अब्ज डॉलरची आयात झाली होती, जी जुलैमध्ये दुप्पट होऊन ४.१६ अब्ज डॉलरवर पोहोचली. आयातीचे प्रमाणही जवळपास २० टनांवरून ४०-४५ टनांपर्यंत वाढले. वर्ल्ड गोल्ड कौन्सिलच्या मते, ही वाढलेली आयात म्हणजे प्रत्यक्ष मागणी वाढल्याचे आणि सणासुदीसाठी उत्पादक आणि विक्रेते मालसाठा करत असल्याचे स्पष्ट लक्षण आहे.